ކުޑަ އީދު ޗުއްޓީއަށް އާއިލާ ކައިރިއަށް ގޮސް، އުފާވެރި ވަގުތުކޮޅެއް ހޭދަކޮށްލުމަށް ފަހު، އުނގެނުމުގެ މާތް މަޤުޞަދު ޙާޞިލުކުރުމަށް ފެށި ދަތުރުގައި މާލެއަށް ދިއުމަށް ދެބެއިން ފުރީ ހޮޅުދޫ ބޯޓުގައި ކަނޑުމަގުންނެވެ. ނަމަވެސް ދަތުރުގެ މެދުތެރެއިން ބޯޓުގައި އަލިފާން ރޯވެ، ފުރާނަ އަތްމައްޗަށް ލައިގެން ދެބެންނަށް ޖެހުނީ ކަނޑަށް ފުންމާލާށެވެ.

ބޯޓުގައި އަލިފާން ރޯވިއިރު މުޝްފިގާއި އޭނާގެ ކޮއްކޮ މިންޝާވީ ޝަރީފަށް އޮތީ ނިދިފައެވެ. އަލިފާނުގެ ހާދިސާއާއެކު މީހުންގެ ހަޅޭކުގެ އަޑަށް ހޭލެވުނުއިރު މުޅި ބޯޓު އަނދަނީއެވެ. އަދި ބޮޑަށް އަލިފާން ރޯވެފައިވަނީ ވެސް ލައިފް ޖެކެޓުތައް ބަހައްޓާފައި ހުރި ދިމާލުގައެވެ.

އަނދަމުންދިޔަ އަލިފާންގަނޑުގެ ބޯ ދުންތަކުގެ ތެރެއިންލާފައި ގޮސް މުޝްފިގު އޭނާގެ ކޮއްކޮއާ ދެމީހުންނަށް ދެ ލައިފް ޖެކެޓު ގެނައި ނަމަވެސް، ބޯޓުން ފުންމާލަން ދިޔަ ވަގުތު މުޝްފިގުގެ އަތުގައި އޮތް ލައިފް ޖެކެޓު އެހެން މީހަކު ޖަހައިގަތީއެވެ. އޭނާ އިސްކަންދިނީ ކޮއްކޮގެ ލައިފް ޖެކެޓު އެޅުވުމަށެވެ. އަދި އޭގެ ފަހުގައި އޭނާ ލައިފް ޖެކެޓް އަޅައިގެން ކޮއްކޮ ގޮވައިގެން އެކުގައި ފުންމާލުމަށެވެ. ނަމަވެސް އެފަކީރު އެހާ މަސައްކަތުން މަގަތުކުރި ލައިފް ޖެކެޓް އެހެން މީހަކު ޖަހައިގަތީއެވެ. އަދި މުޅި ބޯޓުގައި ރޯވުމާއެކު އިތުރު އެހެން އެއްވެސް ގޮތެއް ނެތި ދެބެން މޫދަށް ފުންމާލިއިރު މުޝްފިޤަށް އަޅާލާނެ ލައިފް ޖެކެޓެއް ވަރު ވެސް ނުލިބުނެވެ.

މުޝްފިޤަކީ އެހާ ރަނގަޅަށް ފަތަން އެނގޭ ކުއްޖަކަށް ނުވުމުން، ކޮއްކޮގެ އެހީގައި ފެނުމަތީގައި އޮތުމަށް ވަަރަށް ހިތްވަރު ކުރިއެވެ. ނަމަވެސް ކޮއްކޮ އަތުން ބޭބެ ދޫވެގެންދިޔައީ އެވެ. އަދި ވީނުވީއެއް ނޭނގި މާސިންގާ ކަނޑަށް ގެއްލުނީއެވެ. ބޯޓުގައި ދަތުރުކުރި 18 މީހުންގެ ތެރެއިން ނުފެނި ވަނީ ހަމަ އެކަނި އޭނާއެވެ.

يا ﷲ! އިބަ އިލާހު ޔޫނުސްގެފާނު ބޮޑުމަހުގެ ބަނޑުތެރޭ ރައްކާތެރި ކުރެއްވި ފަދައިން، ގަދަވެ ހެޔޮ ޙާލުގައި، ލ. މާވަށު އުމުރުން 25 އަހަރުގެ ޒުވާން ހުނަރުވެރި އަލީ މުޝްފިގް، އޭނާގެ ޢާއިލާއާ ހަމައަށް ވާޞިލުކޮށް ދެއްވާނދޭވެ. އަދި މި ހިތާމަވެރި ވަގުތު ޢަލީ މުޝްފިޤުގެ ޢާއިލާއަށް ކެތްތެރިކަން ދެއްވާނދޭވެ. އާމީން!