ރައީސް އަށް ފެނިވަޑައިންގަންނަވާނެ ވަރުގެ ސިޓީއެއް ޝުނާނާ އެންޑް ކޯއިން ރައީސް އޮފީހަށް ފޮނުވައިފިއެވެ. މިސިޓީއަކީ އެޗްޑީސީއިން ހަވާލުކޮށްގެން ޖާހު ކުންފުނިން (ޖައުސާ ޖައުފަރުގެ ޖައުސާ ކުންފުނި) ހުޅުމާލޭގައި އިމާރާތްކުރާނެ ކަމަށް ބުނެ، އެޑްވާންސްކޮށް ވިއްކި އެޕާޓްމަންޓުތައް އޭގެ ވެރިފަރާތްތަކަށް ނުލިބިގެން އެ ފަރާތުގެ ނަމުގައި ފޮނުވި ސިޓީއެކެވެ. ރާއްޖޭގައި ރިއަލްސްޓޭޓު ވިޔަފާރި ކުރާފަރާތަކުން އާންމުކޮށް ކަންކުރާ ބީދައިން، ޖާހު ކުންފުނިންވެސް މީގެ 7 ވަރަކަށް އަހަރު ކުރިން ވިއްކި އެޕާޓްމަންޓުތައް ނިންމައި ގަތްފަރާތަކާ ހަވާލުކޮށްފައި ނުވެއެވެ. މިކަމާ ގުޅިގެން މަޝްހޫރި ޤާނޫނީވަކީލު އަލްއުސްތާޛާ ޝުނާނާ ވަނީ މީގެ 2 އަހަރު ކުރިން ސިވިލް ކޯޓަށް މައްސަލައެއްވެސް ހުށަހަޅާފައެވެ. މައްސަލަ އޮތީ ކޯޓުގައެވެ. ކުރިއެރުމެއް ލިބިފައިނުވެއެވެ.

ދިވެހި ސަރުކާރުން ހިންގާ ބޯހިޔާވަހި ކަމުގެ މަޝްރޫޢެއްގެ ތެރެއިން ފުރުޞަތު ލިބުމަކީ ހުދަންބަރެއް ހޮވުން ފަދަ ކަމެކެވެ. ނަމަވެސް ބޯހިޔާވަހިކަމަކީ އަސާސީ ހައްގެކެވެ. ސަރުކާރުން ކަށަވަރުކޮށްދޭންޖެހޭ އަދި ޤާނޫނުއަސާސީއިންވެސް ޔަގީންކޮށްދީފައިވާ އަސާސީ ހައްގެކެވެ. ކަންއޮތީ މިހެންކަމުގައިވިޔަސް، ސަރުކާރުގެ ސޯޝަލް ހައުސިންގެ ތެރެއިން ލިބޭ ފުރުޞަތުތައް ހަނިކަމުން ބައެއް ފަރާތްތަކުން އުމުރު ދުވަހު މަސައްކަތްކޮށްގެން އެއްކުރާ ފައިސާއިން ކޮމާޝަލް އުޞޫލުން ވިއްކާ އެޕާޓްމަންޓަކަށް ފައިސާ ދެއްކުމުންވެސް، އެ އެޕާޓްމަންޓު ހޯދަން ކުރަންޖެހޭ މަސައްކަތް ކޯރާޑިއަކުން ފަރުބަދައެއް ކެނޑުން ފަދަ ބުރަ މަސައްކަތަކަށް މިއޮންނަނީ ވެފައެވެ.

ޝުނާނާ އެންޑް ކޯ ގެ ފަރާތުން ރައީސް އޮފީހަށް ފިސާރި ބޮޑު ސިޓީއެއް އިއްޔެއް ފޮނުވިއިރު، މީގެ ދުވަސްކޮޅެއް ކުރިން ރައީސް އޮފީހަށް އެޗްޑީސާގެ ކުރީގެ މެނޭޖިންގ ޑިރެކްޓަރާ ގުޅިގެން ފޮނުވި ސިޓީއެއް ރައީސަށް ލިބިވަޑައި ނުގަންނަވާ ކަމަށް ރައީސް ވިދާޅުވިއެވެ. އެކަމާ ވަރަށް ގިނަބަޔަކު ހައިރާންވެ، ރައީސް އޮފީހަށް ފޮނުވާ ސިޓީތައް ރައީސަށް ލިބިވަޑައިގަންނަވާނެ ގޮތެއް ހޯދައި އެކަމާ ވިސްނައި ފިކުރުކޮށް ހެދިކަމަށް ވެއެވެ. މިފަހަރު އަލްއުސާތާޛާ ޝުނާނާ ފޮނުއްވީ ރައީސަށް ލިބިވަޑައިގަންނަވާނެ އަދި ފެނިވަޑައިގަންނަވާނެ ވަރުގެ ސިޓީއެކެވެ.