ރައްޔިތުންގެ ސިއްރު މައުލޫމާތު ނަހަމަގޮތުގައި ބޭނުންކުރުމުންވެސް އެކަމާ ވާހަކަދައްކަވާނެ ފަރާތެއްވެސް މިގައުމުގައި ނެތީބާއޭ ހިތަށް އަރައެވެ.
އައިޑީ ކާޑު ހެދުމުގެ މަސައްކަތް ކުރާ ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރް) ގެ ތެރޭގައި ސަރުކާރު ހިންގާ ޕީއެންސީއަށް މެމްބަރުން އިތުރު ކުރުމުގެ މަސައްކަތް ހޯމް މިނިސްޓްރީގެ ސިޔާސީ މުވައްޒަފުން ކުރެއްވި ކަމަށް ހޯމް މިނިސްޓްރީގެ ބައެއް ވެރިން މިވަނީ އެއްބަސްވެފައެވެ.
ފޮޓޯތައް މީސްމީޑިޔާގައި ދައުރުވާން ފެށުމާއެކު ސަރުކާރުގެ އިސްވެރިން އަނގަ ބަންދުވެ ވާހަކަތައް އޮޅުވާލަން ވަނީ މަސައްކަތް ކޮށްފައެވެ. ނަމަވެސް ޑީއެންއާރްގެ ތެރޭގައި ނަގާފައިވާ ފޮޓޯތަކާއި ބައެއް އާންމުން އެމީހުން ސޮއިކޮށްފާ ޕާޓީ ނޫން އެހެން ޕާޓީއަކަށް ރަޖިސްޓްރީ ވެފައިވާކަން އެނގުނު ހިސާބުން ގިނަ ބައެއްގެ ކަންބޮޑުވުން މިކަމުގައި ހިއްސާ ކުރަން ފެށިއެވެ.
ސަރުކާރު އޮފީސްތަކުގައި ޕާޓީ ޖަގަހަ ހިންގައި، އިލެކްޝަނަށް ވަގު ފޯމު ހުށައެޅި މައްސަލައިގައި ރައީސް ޑރ. މުޙައްމަދު މުޢިއްޒު ޖަވާބުދާރީ ވާންޖެހޭނެ ކަމަށް އިދިކޮޅު ފަރާތްތަކުން މިހާރު ވަނީ ގޮވަން ފަށާފައެވެ. އެގޮތުން ޑިމޮކްރެޓްސްގެ ފުރަތަމަ ރަނިންމޭޓް ހުސެން އަމްރު އާއި ސަރުކާރާ އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލްވެސް ވަނީ މި މައްސަލަ ބެލުމަށް ގޮވާލާފައެވެ.
އެކްސްގައި ކުރެއްވި ޕޯސްޓެއްގައި އަމްރު ވަނީ މި މައްސަލައިގައި ސަރުކާރު ހިންގާ ޕީއެންސީގެ ރައީސްގެ ހައިސިއްޔަތުން އަދި ރާއްޖޭގެ ރައީސްގެ ހައިސިއްޔަތުން ރައީސް މިކަންކަމާ ޖަވާބުދާރީ ވާންޖެހޭނެ ކަމަށް ވިދާޅުވެފައެވެ.
މި މައްސަލައިގައި ފައްޔާޒު ވިދާޅުވީ ޕީއެންސީއަށް ވަގު ފޯމު ފުރީ ރައްޔިތުންގެ ޒާތީ މައުލޫމާތު ރައްކާކުރެވިފައިވާ ދައުލަތުގެ މުއައްސަސާއެއްގެ ތެރޭގައި، ދައުލަތުގެ މުދާ ބޭނުންކޮށްގެން، އެ ތަނުގެ މުވައްޒަފުން ކަމަށެވެ. އަދި ޑީއެންއާރުގެ ވެރިން މި ކުށަށް އިއުތިރާފުވެފައިވާތީ މައްސަލަ ބަލައި އިދާރާތަކުން ފިޔަވަޅު އަޅަން ޖެހޭ ކަމަށް އޭނާ ވިދާޅުވިއެވެ. އަދި ޕީއެންސީ އިން އީސީއަށް މިދިޔަ މުއްދަތުގައި ހުށަހެޅި ފޯމުތައް ބާތިލުކުރަން ޖެހޭ ކަމަށްވެސް ވިދާޅުވެފަ އެވެ.
