އިންޑިޔާގެ ދީނީ ފެސްޓިވަލެއް ކަމަށްވާ މަހާކުމްބަށް މިނާފަތި ވިއްކަން ގޮސް އުޅުނު އަންހެން ކުއްޖެއްގެ ރީތިކަންފެނި، އެތަށް ބަޔަކު އާޝޯޚުވެ، އެ އަންހެން ކުއްޖާއަށް ޚާއްޞަ ސަމާލުކަމެއް ލިބިއްޖެއެވެ. އިންޑިޔާގެ މަދްޔަޕްރަދޭޝްގެ އިންދޫރަށް އުފަން މޮނަލިޒާ ބޯސްލޭ އަކީ ވަރަށް އާދައިގެ ފަޤީރު ޢާއިލާއަކަށް ނިސްބަތްވާ އުމުރުން ސޯޅަ އަހަރުގެ ކުއްޖެކެވެ. މީހުން ބުނާގޮތުން މޮނަލިޒާއަށް ލިބިފައިވަނީ އާދަޔާ ޚިލާފު ރީތި ލޮލެކެވެ. އިރުއޮއްސޭއިރު އުޑުގެ ވިލާތަކުން އަރާ ރީތި ކުލަތައް މޮނަލިޒާގެ ލޮލުގެ ކަޅިން ސިފަވާ ކަމަށް ސޯޝަލް މީޑިޔާގައި ބައެއް މީހުން ބުނެފައިވެއެވެ.

ފެސްޓިވަލަށް ގޮސްއުޅުނު ބަޔަކު މޮނަލިޒާގެ ފޮޓޯ ސޯޝަލް މީޑިޔާގައި ޢާންމު ކުރުމުން މޮނަލިޒާއަށް ލިބުނު ކުއްލި މަޝްހޫރުކަމާއެކު ފެސްޓިވަލަށް ގޮސްއުޅުނު އެތަށް ބަޔަކުވަނީ މޮނަލިޒާއާއެކު ސެލްފީ ނެގުމަށާއި ވީޑިޔާ ކުރުމަށް މޮނަލިޒާ މިނާފަތި ވިއްކަން އުޅުނު ސަރަޙައްދަށް އެއްވެފައެވެ. ގާތްގަނޑަކަށް 4.4 މިލިޔަން މީހުން ޒިޔާރަތްކުރާނެ ކަމަށް ބެލެވޭ މަހާކުމްބު ފެސްޓިވަލަކީ އިންޑިޔާގެ އެކިސަރަހައްދުތަކުން މީހުން ބައިވެރިވާ ހިންދޫންގެ ދީނީ ބޮޑު ފެސްޓިވަލެކެވެ. އެފެސްޓިވަލުގެ ހަވާސާގައި ސަގާފީ ހަރަކާތްތަކާއި ކުދި ވިޔަފާރިތައްވެސް މީހުން ކުރެއެވެ. މޮނަލިޒާވެސް މިފެސްޓިވަލަށް ދިޔައީ އާންމުދަނީ ހޯދުމުގެ ގޮތުން އޭނާގެ އާއިލީ މެމްބަރުންނާއެކު މިނާފަތި ވިއްކުމަށެވެ.

ޚަބަރުތައް ލިބޭގޮތުން، މީޑިޔާއާއި އެތަށް ބައެއްގެ ފަރާތުން ލިބުނު އާދަޔާ ޚިލާފު ސަމާލުކަމާހުރެ، އުނދަގޫވެގެން މޮނަލިޒާ މި ފެސްޓިވަލް ދޫކޮށް، މިހާރު ވަނީ އަނބުރާ ރަށަށް ގޮސްފައެވެ. ނަމަވެސް މޮނަލިޒާ ރަށަށް ދިޔައީ ބޮޑު މަޝްހޫރުކަމާއެކު ކަމުން، މޮނަލިޒާ ފަހާ މީޑިޔާތަކުން ވަނީ އޭނާ ދިރިއުޅެ އިންދޫރަށް ގޮސް ގެދޮށަށްވެސް ގޮސްފައެވެ.