ދުވާލެއްގެ މައްޗަށް މަދުވެގެން 50،000 ރުފިޔާ ނަގައިގެންވެސް ވެމްކޯއަކަށް އައްޑޫގެ ކުނި މެނޭޖުނުކުރެވޭ ކަމަށް އައްޑޫ ސިޓީ މޭޔަރ އަލީ ނިޒާރު ވިދާޅުވެއްޖެއެވެ.
މޭޔަރ ނިޒާރު ވިދާޅުވީ އައްޑޫގައި ހުރި ވެމްކޯގެ ކުނި ކޮއްޓަށް ކުނި ވެއްދުމަށް ދުވާލަކު 50،000.00 ރުފިޔާ ދައްކަން ޖެހޭ ކަމަށެވެ. އަދި އައްޑޫ ސިޓީގެ އަވައްތަކުން ކުނިނެގުމަށް ނަގާ އަގު ވެމްކޯއިން ނިންމާފައިވަނީ ކައުންސިލްއާއި މަޝްވަރާ ކުރުމެއްނެތި ކަމަށް ނިޒާރު ވިދާޅުވިއެވެ.
”އައްޑޫ ސިޓީގެ އާއްމު ސަރަހައްދު ތަކުންނާއި ، މިސްމިތްތަކާއި އޮފީސްތަކާއި އަދި ޕާކްތަކުގެ ކުނި އަގު ދީ ކައުންސިލްއިން ޖަމާކުރަމުން ގެންގޮސްފައިވަނީ ވެމްކޯއިން ބަލަހައްޓާ ކުނި ކޮއްޓަށް.“ މިފަހުން ވެމްކޯއިން މިކަން ކުރުމަށް ނަގާ އަގަށް ބަދަލު ގެނައުމުން ކަންބޮޑުވުން ފާޅުކުރަމުން މޭޔަރު ވިދާޅުވިއެވެ.
ނިޒާރު ވިދާޅުވީ އެއްވެސް ވިސްނުމެއް ދިރާސާއެއް މަޝްވަރާއެއް ނެތި މިޒާތުގެ ދެއުޅިއެއް ނުވާ ނިންމުންތައް ސަރުކާރުން ނިންމަމުން އަދި ބަދަލު ކުރަމުން ދިއުމަކީ ރައްޔިތުންނަށް ދެވޭ ހިދުމަތްތައް ދިނުމަށް އުދަގޫތައް ދިމާވެ ހުއްޓަން ދިމާވެދާނެ ކަމެއް ކަމަށެވެ.
މި އަހަރު ޖެނުއަރީ މަހުން ފެށިގެން އައްޑޫގެ އާއްމު ސަރަހައްދުތަކުން ނެގޭ ކުނި ގެންދެވޭނެ ތަނެއް ނެތި ފުނިޖެހެމުން ދާކަން މޭޔަރ ނިޒާރު ފާހަގަ ކުރެއްވިއެވެ. އަދި މިމައްސަލާގައި ކަމާގުޅުންހުރި ފަރާތްތަކާއި މަޝްވަރާކުރެވުނަސް އަދިވެސް ހައްލު ހޯދިފައިނުވާކަން އޭނާ ފާހަގަ ކުރެއްވިއެވެ.
