ބޭންކް އޮފް މޯލްޑިވްްސްގެ ކަސްޓަމަރުންތަކެއްގެ އެކައުންޓުން އެ ބޭންކްގެ މުވައްޒަފަކު ވަގަށް ފައިސާ ނެގިކަން ސާބިތުވެއްޖެއެވެ. ކްރިމިނަލް ކޯޓުގެ ޙުކުމްގައި ވަނީ ބ. އޭދަފުށި, ހިޔާވަހި, އަލީ މާޒިން ކަސްޓަމަރުންގެ އެކައުންޓުން ވަގަށް ފައިސާ ނެގިކަން ސާބިތު ވާކަމަށެވެ.
ޢަލީ މާޒިންގެ މައްޗަށް ކޮށްފައިވަނީ ހިޔާނާތްތެރިވުމުގެ ކުށުގެ ދައުވާއެވެ. މާޒިންގެ މައްޗަށް ދަޢުވާކޮށްފައި ވަނީ ކަސްޓަމާރ ސާވިސް އެސިސްޓެންޓެއްގެ ގޮތުގައި ހުރެ, މަޤާމުގެ ޙައިސިއްޔަތުން ލިބިފައިވާ މަޢުލޫމާތާއި ބާރުގެ ބޭނުންކޮށްގެން މެއި 14, 2021 އިން ސެޕްޓެމްބަރު 23, 2021 ގެ ނިޔަލަށް އެކި ދުވަސް މަތިން ކަސްޓަމަރުންގެ އެކައުންޓުން ފައިސާ ނެގިކަމުގެ ދަޢުވާއެވެ.
ކޯޓް ހުކުމުގައި ބުނެފައި ވަނީ 13 ކަސްޓަމަރެއްގެ މައުލޫމާތު ބީއެމްއެލްގެ ސީއާރްއެމް ސިސްޓަމްއިން ބަދަލުކޮށް, އެ ކަސްޓަމަރުންނަށް އެނގުމަކާ ނުލާ އިންޓަނެޓް ބޭންކިންގ ޚިދުމަތަށް ރަޖިސްޓްރީކޮށްފައިވާ ކަމަށެވެ. އެމީހުންގެ އެކައުންޓުތަކުން ޖުމުލަ 482611.41 ރުފިޔާ ސައްހަ ނޫން ކްރެޑިޓް ކާޑު ޕޭމަންޓުތަކަށާއި، ފޮރެކްސް ޓްރޭޑްކުރުމުގެ މުޢާމަލާތްތަކަށް މާޒިންގެ އަމިއްލަ އެކައުންޓަށް ޖަމާކޮށްފައިވާ ކަމަށެވެ.
ޢަލީ މާޒިން ވަނީ ދައުވާއަށް އޭނާ އަމިއްލައަށް އިޢުތިރާފުވެފައި ވާތީ މި މައްސަލަ ކުރިއަށް ގެންގޮސްފައި ވަނީ އަވަސް ނިޔާ މައްސަލައެއްގެ ގޮތުގައެވެ. ކުށުގެ އަދަބަކީ 1 އަހަރާ 7 މަހާ 6 ދުވަހަށް ޖަލަށްލުމެވެ. އެހެން ނަމަވެސް ޕީޖީއާއެކު ހެދިފައިވާ އެއްބަސްވުމެއްގެ ދަށުން އަދަބު ލުއި ކުރެވިފައި ވާކަމަށާއި، އެގޮތުން 9 މަހާ 18 ދުވަހަށް ޖަލުޙުކުމް ބަދަލުވެގެންދާނެ ކަމަށާއި، 40 ގަޑީ އިރު މުޖުތަމަޢަށް ޚިދުމަތްކުރުމާއި، 56،200 ރުފިޔާގެ ޖޫރިމަނާ ދައްކަންޖެހޭ ގޮތަށް އެއްބަސްވެފައި ވާކަމަށެވެ.
