ކަޅު ހެދުންލައި މޫނުބުރުގާ އަޅައިގެން މާލޭގެ މަގުތަކުގައި އުޅޭ އަންހެނަކާ އިތުރު ފިރިހެނެއް ގުޅިގެން މަކަރާއި ހީލަތުން މީހުންގެ އަތުން ފައިސާ ހޯދާކަމުގެ ތުހުމަތާއެކު އެމީހުންނަށް ސަމާލުވުމަށް ގޮވާލާ ފޭސްބުކްގައި އާންމުންގެ މީހަކު ޕޯސްޓްކޮށްފިއެވެ.

އެ ޕޯސްޓްގައިވާގޮތުން އަންހެން މީހާ އަކީ ތ. ތިމަރަފުށީ ފޭދޫގެ  ނަދާ އިބްރާހިމް ކިޔާ މީހެކެވެ. އަދި އޭނާ އަކީ 3 ކުދިންގެ މަންމައެއް ކަމަށާއި، އާއިލާއަށް ފިލައިގެން ފިރިހެން މީހާއި އެކު މާލެ އައިސް އުޅޭ ކަމަށެވެ. އަދި އޭނާގެ އެންމެ ހަގު ދަރިފުޅަށް ވާނީ 1 މަހާއި 3 ދުވަސް ކަމަށާއި، އެނބުރި ދަރިންގެ ގާތަށް ނުގޮސްގެން ވަރިކޮށްފައި ވާކަމަށެވެ. އަދި އޭނާއާއެކު މިހާރު އެ އުޅޭ ފިރިހެން މީހާ އަކީ ހދ. ކުޅުދުއްފުށީ ނަގިލި  އާދަމް ނަސީރު ކަމަށް މައުލޫމާތު ލިބިފައިވާކަމަށެވެ.

އެ ދެމީހުންނަކީ އެއްވެސް މަސައްކަތެއް ނުކޮށް މީހުންގެ އަތުން އެކިގޮތްގޮތަށް ފައިސާ ހޯދައިގެން އުޅޭ ބައެއްކަމަށާއި، ކުލީ ކޮޓަރިތަކަށް ގޮސް ނިދާ ފެންވަރާ ހެދުމަށް ފަހު އެކި ބަހަނާތައް ދައްކާފައި އެ ތަންތަނަށް ވެސް ފައިސާ ނުދީ ފިލާބައެއް ކަމަށެވެ. އެހެން ކަމުން އެއްވެސް މީހަކު އެމީހުންނަށް ފައިސާ ނުދިނުމަށާއި، ވިޔަފާރީގެ މުޢމަލާތެއް ނުކުރުމަށާއި، އިތުރަށް ސަމާލުވުމަށް އެދޭކަމަށެވެ.

އެމީހުންގެ ބަހެއް ހޯދުމަށް ކުރި މަސައްކަތް ވަނީ ނާކާމިޔާބުވެފައެވެ.