ށ. އަތޮޅު ކައުންސިލުން އިންތިޒާމުކުރި “މިލަތުރު ހޭންޑްބޯޅަ މުބާރާތް-2024” ގެ ޗެމްޕިއަންކަން ފޭދޫ އަންހެނުންގެ ހޭންޑްބޯޅަ ކުލަބުން ކާމިޔާބުކޮށްފިއެވެ. ފޭދޫ އަކީ މިލައުތުރު އެއްވަނަ ހޭންޑްބޯޅަ މުބާރާތުގެ ވެސް ޗެމްޕިއަން ޓީމެވެ.
މިރޭ ފޯކައިދޫ ރަސްމީ ކުޅިވަރު ދަނޑުގައި އޮތް ފައިނަލް މެޗުގައި ބައްދަލުކުރީ ފޯކައިދޫ ހޭންޑްބޯޅަ ކުލަބާ ފޭދޫ ހޭންޑްބޯޅަ ކުލަބެވެ. މި މެޗް 24 – 16 ލަނޑުން ކާމިޔާބުކުރީ ފޭދޫއެވެ.
ފޯރިގަދަ ކުޅުމެއް ފެނިގެންދިޔަ ފައިނަލް މެޗުގައި ދެ ޓީމަށް ވެސް ލަނޑު ޖަހާނެ ގިނަ ފުރުޞަތުތަކެއް ވަނީ ލިބިފައެވެ. މެޗުގެ ކުރީކޮޅު ވަރަށް އެއްވަރު ކުޅުމެއް ފެނިގެންދިޔަ ނަމަވެސް ފަހު ހާފުގައި ފޭދޫ ޓީމުން ކުޅުން އިތުރަށް ވަރުގަދަކޮށް ފުލު ފުލުގައި ފޯކައިދޫގެ ގޯލު ފޫއަޅުވާލުމުގެ ނަތީޖާއެއްގެ ގޮތުން ލަނޑުގެ ތަފާތު ބޮޑުކޮށްލިއެވެ.
މެޗް ޕްރެޝަރާ ވަރުބަލިކަމުގެ ސަބަބުން ފޯކައިދޫގެ ކުޅުންތެރިންނަށް ހެދުނު ގޯސްތަކުގެ ފައިދާ ނަގާ ފޭދޫ ޓީމުން މުޅި މެޗުގެ ކޮންޓްރޯލް ނަގާފައި ވެއެވެ. އަދި ފަހު ހާފުގައި އެމީހުން ފެނިގެންދިޔައީ ވަރަށް އިތުބާރާ ޔަޤީންކަމާއެކު ކުޅެމުންދިޔަ މަންޒަރެވެ.
މި މެޗުގެ ފަހު ހާފުގައި ހިނގި ގޯހަކާ ގުޅިގެން ފޭދޫ ޓީމްގެ ކެޕްޓަން ޝިފާނާއަށް ރަތްކާޑު ދައްކާ ދަނޑުން ފޮނުވާލަންޖެހިފައި ވެއެވެ. އެއީ މި މުބާރާތުގައި ފެނިގެންދިޔަ އެންމެ ތަޖުރިބާކާރު ހުނަރުވެރި މޮޅު ކުޅުންތެރިޔާއެވެ. ފޭދޫ އަކީ ށ. އަތޮޅުގައި ހޭންޑްބޯޅައަށް އެންމެ ގަދަ ރަށްކަމުގައި އަނެއްކާ ވެސް ސާބިތުކޮށްދީފިއެވެ.
