ބްރޯޑްކާސްޓިންގ ދުވަހުގެ މުނާސަބަތުގައި މީޑިޔާ ކޮމިޝަނުން ނެރުނު ބަޔާނުގައި ތާރީޚަށް އަލިއަޅުވާލާފައި ވެއެވެ. އަދި ފިތުނަ އުފެދޭ އެންމެހާ ކަންކަމުން މީޑިޔާތައް ދުރުވުމަށް ނަސޭޙަތްތެރިވެފައި ވެއެވެ.
ރާއްޖޭގައި ބްރޯޑްކާސްޓު ކުރުމުގެ ތާރީޚަށް ބަލާއިރު ސެނެކޯ ރޭޑިއޯ އާއި 1967 ގައި މޯލްޑިވްސް އައިލެންޑް ބްރޯޑްކާސްޓިންގ ސާވިސް އުފެދި އަދި 1969 ގައި ރޭޑިއޯ މޯލްޑިވްސްގެ ނަމަށް ބަދަލުވެ، 1980 ގައި ޚިދުމަތް އިތުރަށް ފުޅާކޮށް ދިވެހިރާއްޖޭގެ އަޑުގެ ނަމުގައި ހިދުމަތްދޭން ފެށިއެވެ.
އަދި 1978 ގައި ޓެލެވިޜަން މޯލްޑިވްސް (ޓީވީއެމް) އުފެެއްދުމުގެ އިތުރުން 2007 ގައި އަމިއްލަ ފަރާތްތަކަށް ބްރޯޑްކާސްޓްކުރުމުގެ ފުރުސަތު ހުޅުވާލާފައި ވެއެވެ. މި ތާރީޚީ ބަދަލުތަކުގެ ތެރެއިން 2010 ވަނަ އަހަރު އަމަލުކުރަން ފެށި ބްރޯޑްކާސްޓްކުރުމުގެ ގާނޫނާ އެކު ބްރޯޑްކާސްޓަރުންނަށް ހާއްސަ ގާނޫނީ އޮނިގަނޑެއް ލިބިގެންދިޔައެވެ.
މީގެ އިތުރުން މިދިޔަ އަހަރު ސެޕްޓެމްބަރު 18 ގައި ތަސްދީގުކުރެވުނު މީޑިއާ އަދި ބްރޯޑްކާސްޓިން ރެގިއުލޭޝަން ގާނޫނުގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އުފެދި، ބްރޯޑްކާސްޓިން ދާއިރާއަށް ޒަމާނީ ބަދަލުތަކެއް މިވަނީ އައިސްފައެވެ.
އެމްއެމްބީސީން މިހުރިހާ ކަމެއް ފާހަގަކުރަނީ ބޮޑެތި ކާމިޔާބީތަކެއްގެ ގޮތުގައެވެ.
ކިޔުންތެރިންގެ ހިޔާލު