އެޑޮލްފް ހިޓްލަރު ޑިމޮކްރެސީގެ ނަމުގައި ދައުލަތެއްގެ ބާރުތައް ގޮށްމުށުގެ ތެރެއަށް ލުމަށް ހިންގާލި މަސައްކަތަކީ ޑިމޮކްރެޓިކް ނިޒާމުތައް ޤާނޫނީ ގޮތުން މެނިޕިއުލޭޓްކޮށްގެން ޚުދުމުޚްތާރު ވެރިކަމެއް ގެނެވިދާނެ ކަމުގެ ފުރިހަމަ މިސާލެކެވެ. އަސްކަރީ ބާރުން ނުވަތަ އަނިޔާވެރިކަމާއެކު ބަޣާވާތެއް ރާވައި ހިންގުމުގެ ބަދަލުގައި ހިޓްލަރު ވެރިކަމަށް އައީ ޖަރުމަނުވިލާތުގެ ޤާނޫނުއަސާސީގެ ދަށުން ޤާނޫނީ ހަމަތަކުގެ މަތިންނެވެ. ނަމަވެސް ޚުދުމުޚްތާރު ވެރިކަމަކަށް ވެރިކަން ބަދަލުކޮށްލީ ޤާނޫނުއަސާސީގެ ދަށުން ލިބިދީފައި އޮތް ބާރުތައް ޙީލާތްތެރިގޮތުގައި ބޭނުންކޮށްގެންނެވެ.

މިކަމެއް ފެށުނީ 1933 އަހަރު ޖަރުމަނުވިލާތުގެ ޗާންސެލަރ ނުވަތަ ބޮޑުވަޒީރުގެ މަޤާމަށް އޭނާ ޢައްޔަންކުރެވުނު ހިސާބުން ފެށިގެންނެވެ. ޖަރުމަނުވިލާތުގެ ސިޔާސީ އިސްވެރިންނާއި ޖަރުމަނުގެ ގިނަ ރައްޔިތުން އޭރުތިބީ ހިޓްލަރު ދެއްކި ހުވަފެނީ ވަޠަނީ ވިސްނުމެއްގެ ތެރޭގައި ޢަރަޤުވެ، ނޭނގުމެއްގެ ތެރޭގައެވެ. ޑިމޮކްރެޓިކް ނިޒާމަކުން ޚުދުމުޚްތާރު ނިޒާމަކަށް ޖަރުމަނުވިލާތް ބަދަލުކޮށްލުމުގެ ހީލަތްތެރި އެދުންވެރިކަން ހިޓްލަރުގެ ކިބައިގައި އޮތް މިންވަރު ރޭކާވެސް ނުލާ ކަހަލައެވެ. ކޮންމެއަކަސް، ހިޓްލަރަށް ޖަރުމަނުވިލާތުގެ ބޮޑުވަޒީރުކަން ލިބި، ކުޑަ ދުވަސްކޮޅެއްގެ ތެރޭގައި ޖަރުމަނުވިލާތުގެ ރައިޝްޓަގް (ޕާލަމެންޓް) ގައި އަލިފާނުގެ “ހާދިސާއެއް” ހިނގިއެވެ. މިހާދިސާ ވެގެންދިޔައީ ޖަރުމަނުވިލާތުގެ ޤާނޫނުއަސާސީގެ 48 ވަނަ މާއްދާގެ ދަށުން ހިޓްލަރު ނެރުނު ރައިޝްޓަގް ފަޔަރ ޑިކްރީ ނެރުމަށް މަގުފަހިކޮށްދިން ކަމަކަށެވެ. މި ޤަރާރުގެ ސަބަބުން ޤާނޫނުއަސާސީގައި ކަނޑައެޅިފައިވާ އަސާސީ އެތަށް މަދަނީ ޙައްޤުތަކަކާއި މިނިވަންކަމެއް ހިފެހެއްޓި، ހިޓްލަރުގެ ބައިވެރިންނަށް އިދިކޮޅު ސިޔާސީން ހައްޔަރުކޮށް، އިދިކޮޅު ސިޔާސީންގެ އަޑުތައް މުޅިންހެން މަޑުކޮށް ސިޔާސީ ހަރަކާތް ހިންގުން މަނާކުރުމުގެ ފުރުޞަތު ހިޓްލަރަށް ލިބުނެވެ.

އޭގެފަހުން ޖަރުމަނުގެ ޑިމޮކްރެސީ ނައްތާލުމަށް ހިޓްލަރުދިން އެންމެ ވަރަގަދަ އެއް ހަމަލާއަކަށްވީ 1933 އަހަރުގެ މާރިޗު މަހު ފާސްކުރެވުނު އެނޭބްލިންގ އެކްޓެވެ. ބިރުދެއްކުމާއި، ނުފޫޒު ފޯރުވުމާއި، ވެރިކަމުގެ ނިޒާމުގެ ތެރޭގައި ހުރި އުނިކަންކަމާއި ސިފަތަކުގެ ނާޖާއިޒު ބޭނުންކޮށްގެން ހިޓްލަރު މި ޤާނޫނު ފާސްކުރުމަށް ބޭނުންވާ ތިންބައިކުޅަ ދެބައިގެ އަޣުލަބިއްޔަތު ހޯދައި ޤާނޫނު ފާސްކުރީ ފަސޭހަކަމާއެކުއެވެ. މި ޤާނޫނުން އޭނާއަށް ރައިޝްޓަގްގެ ހުއްދައަކާ ނުލައި ހިތުހުރި ޤާނޫނުތައް ހެދުމުގެ ބާރު ލިބުނެވެ. އެހިސާބުން ފެށިގެން ޖަރުމަނު ވިލާތުގެ ހުރިހާ ޑިމޮކްރެޓިކް މުއައްސަސާތައް ނައްތާލައި، އިދިކޮޅު ޕާޓީތައް މަނާކޮށް، ހުރިހާ ބާރުތަކެއް އޭނާގެ އަތަށް އޮޅާލައި މުޅި ޖަރުމަނުވިލާތް އޭނާގެ ބާރުގެ ދަށަށް ގެނެއެވެ. 1934 ވަނަ އަހަރު ޖަރުމަނުވިލާތުގެ ރައީސް ހިންޑެންބަރގް އަވަހާރަވިއިރު، ހިޓްލަރު ވަނީ ޤާނޫނީ ގޮތުން އޭނާގެ މަޤާމު ފިއުރަރ (ޒަޢީމް) ގެ ގޮތުގައި ފައްކާކޮށްފައެވެ. އޭގެ ފަހުން ފެނިގެން ދިޔައީ ދުވަހަކުވެސް ޖަރުމަނުވިލާތް ނުދެކޭފަދަ އަނިޔާވެރި ވެރިކަމެކެވެ.

ހެޔޮވެރިކަމުގެ ނަމުގައި ޑިމޮކްރެޓިކް ނިޒާމު ފުޅަކޮށް، ޚުދުމުޚްތާރު ނިޒާމަކަށް ވެރިކަން ފުރޮޅާލުމަކީ އެހާ އުނދަގޫ ކަމެއް ނޫން ދެއްތޯއެވެ. ކޮންމެއަކަސް، ލޯކުރިމަތިން ހިނގާ ބައެއް ކަންކަމާއި ފެންނަ މަންޒަރުތަކުން މިވާހަކަ ހަމަ ބުނެލާ ހިތްވީއެވެ. ބޭކާރު ވާހަކަ ނުދެއްކިޔަސް ބުނަން މިއުޅޭ އެއްޗެއް ބުއްދިވެރިންނަށް ވިސްނޭނެއެވެ.