މިއަދު މުޅި އިސްލާމީ އުންމަތް ސިއްސުވާލި ޚަބަރަކީ ފަލަސްޠީންގެ މިނިވަންކަމަށް ޖިހާދުކުރާ ހަމާސް ޖަމާޢަތުގެ އެންމެ އިސް ލީޑަރު ކަމަށްވާ އިސްމާޢީލް ހަނިއްޔާ ޝަހީދުކޮށްލި ޚަބަރެވެ.

އީރާންގެ އައު ރައީސް ހުވާ ކުރެއްވުމުގެ ޙަފުލާގައި ބައިވެރިވަޑައިގަތުމަށްޓަކައި އީރާންގެ ވެރިރަށް ތެހެރާންގައި ހުންނަވަނިކޮށް އޭނާ ޝަހީދުކޮށްލާފައި ވަނީ ހުރުމަށް ހަމަޖެހިފައިވާ ގޭގައި ހުންނަވަނިކޮށް ބަޑިން ޙަމާލާދީ ބޮޑީގާޑުންނާ ވެސް އެކުގައި ކަމަށް ރިޕޯޓްތައް ބުނެއެވެ. ތުުހުމަތު ކުރެވޭގޮތުގައި މިއީ އިޒްރޭލް އާއި އެމެރިކާ އާއި ގުޅިގެން ހިންގާފައިވާ އޮޕަރޭޝަނެކެވެ. މިަކަމާ ގުޅިގެން އީރާން ސަރުކާރުން ބުނެފައި ވަނީ ހަނިއްޔާ ޝަހީދުކޮށްލާފައި ވަނީ އެމީހުންގެ ފަސްގަނޑުގައި ކަމަށްވާތީ، އޭނާގެ ލޭގެ ބަދަލު ހިފާނެ ކަމަށެވެ.

އިސްމާޢީލް ހަނިއްޔާ އުފަންވީ 8 މެއި 1963 ގައި ޣައްޒާގައެވެ. ޣައްޒާގެ އިސްލާމިކް ޔުނިވާރސިޓީން އަރަބި ބަހުގެ މަތީ ތަަޢުލީމް ޙާޞިލްކުރައްވާފައި ވެއެވެ. ވަރަށް ޅައުމުރުފުޅުގައި ފުރަތަމަ އިންތިފާޟާ ޙަރަކާތުގައި ބައިވެރިވެ، އިސްރާޢީލުގެ އަަތްދަށުން ފަލަސްޠީންގެ ބިންތައް މިނިވަންކުރުމަށް ގޮވާލާ މުޒާހަރާތަކުގައި ބައިވެރިވެވަޑައިގެންފައި ވެއެވެ. އަދި އެތައް ފަހަރެއްގެ މަތިން ހައްޔަރުކޮށް ޖަލައް ލާފައި ވެއެވެ.

2006 ވަނަ އަހަރު ފަލަސްޠީންގެ ބޮޑުވަޒީރު ކަމަށް އިސްކުރެވިފައި ވެއެވެ. އެހެން ނަމަވެސް ރައީސް މަހްމޫދު އައްބާސްގެ އަމުރަކަށް ހަނިއްޔާ ވަނީ މަޤާމުން ދުރުކެވިފައެވެ. އެއީ ފަތަޙަ ޖަމާޢަތާއި ހަމާސް ޖަމާޢަތާ ދެމެދު ޖެހުނު މައްސަލަތަކުގެ ތެރޭގައެވެ. އެހެން ނަމަވެސް އެ ނިންމެވުމަށް ހަނިއްޔާ ޢަމަލުކުރައްވާފައެއް ނުވެއެވެ. 2006 ވަނަ އަހަރުން ފެށިގެން 2017 ވަނަ އަހަރުގެ ފެބްރުއަރީ އާއި ހަމައަށް ޣައްޒާގައި ހަމާސްގެ އެންމެ އިސް ލީޑަރަކީ އިސްމާޢީލް ހަނިއްޔާއެވެ. ކުޑަ ދުވަސްކޮޅެއްގެ މެދުކެނޑުމަކަށް ފަހު 6 މެއި 2017 ގައި އަނެއްކާ ވެސް ހަމާސްގެ ޕޮލިޓިކަލް ބިއުރޯގެ ޗެއާމަންކަމަށް އައްޔަން ކުރެވިފައި ވެއެވެ.

އަވަހާރަ ކޮށްލެއްވުމުގެ ރޭވުންތަކާއި ޙަރަކާތްތަކުގެ ސަބަބުން ފަހުން ދިރިއުޅުއްވަމުން ގެންދެވީ ޤަތަރުގައެވެ. އެފަދަ އެއް ޙަމަލާއެއްގައި ހަނިއްޔާގެ އުފަން ތިން ދަރިންނާއި، ކާފަ ތިން ދަރިން ޝަހީދުކޮށްލާފައި ވެއެވެ. މިއަދު އިސްމާޢީލް ހަނިއްޔާ ޝަހީދުކޮށްލި ޚަބަރާއެކު މުޅި މުސްލިމް އުންމަތައް ލިބުނީ ކުއްލި ސިހުމެކެވެ. އަދި ބޮޑު ހިތާމައެކެވެ. އެހެނީ އެފަދަ ލީޑަރުންގެ ހިތްވަރު އިންތިހާއަށް ބޭނުންވެފައިވާ ދަނޑިވަޅެއްގައި ގެއްލިގެން އެދިޔައީ މުހިންމު ޝަޙުސިއްޔަތެކެވެ.