ރާއްޖޭގެ ފޮރިން ރިޒާވް ހުސްވާން އުޅޭ ކަމުގެ ބިރުވެރި އަލާމާތްތަކެއް ފެންނަ ކަމަށް ތަޖުރިބާކާރުން ބުނަން ފަށައިފިއެވެ. ރައްޔިތުންގެ ހިތްތަކުގައި ނުތަނަވަސް ކަމެއް އުފެދިފައި ވަނިކޮށް އެމްއެމްއޭ އިން ވެސް އެފަދަ މޭރުމަކުން ވާހަކަދައްކަވައިފި އެވެ.
ފޮރިން ރިޒާވް ހުސްވެދާނެ ކަމަށާއި، އިތުރު ކުރުމަށް ހުރި މަގުތައް ބަންދުވެފައި ވާކަމަށް ދެކެވޭ ވާހަކަތަކަށް ބާރު ލިބޭ މުޢާމަލާތްތަކެއް ދައުލަތުގެ ކަމާ ގުޅުން ހުރި އިދާރާތަކުން ކޮށްފައި ވުމާއި، އެފަދަ އިންޒާރުތަކެއް ދުރާލާ ދީފައި ވުމަކީ ޤައުމުގެ ޙާލަތު އޮތް ގޮތް ދަލާލާތު ކޮށްދޭ ކަމެކެވެ. އެހެން ވެއްޖެ ނަމަ ރާއްޖެއަށް ބޭނުންވާ ކާބޯތަކެއްޗާއި ބޭހާއި އެހެނިހެން ސިއްޙީ އާލާތްތަކާއި ވަޞީލަތްތައް ލިބުމަށް ހުރަސް އެޅިދާނެއެވެ.
ރާއްޖޭގެ ވިޔަފާރިތަކުން ކުރެވޭ މުޢާމަލާތްތަކަށް ބޭރުގެ ޤައުމުތަކަށް އަދާކުރަންޖެހޭ ޕޭމަންޓްތައް ނުދެއްކި ވިޔަފާރިތައް ހުއްްޓާލަން ޖެހިދާނެއެވެ. އެފަދަ ޙާލަތެއް މެދުވެރިވެއްޖެ ނަމަ، ރައްޔިތުންނަށް ބޭނުންވާ އެތަކެއް ޒަރޫރީ ކަންކަން ފުރިހަމަ ނުކުރެވި ޙާލުގައި އުޅެން ޖެހިދާނެއެވެ.
ޙަޤީޤަތުގައި ވެސް ތަދުމަޑުކަމެއް ކުރިމަތި ވަމުންދާ ނަމަ އެކަމަށް ރައްޔިތުން ހޭލުންތެރި ވާން ޖެހެއެވެ. އަދި ފުރިހަމަ މަޢުލޫމާތު ފޯރުކޮށްދެވެން ޖެހޭނެއެވެ. ކުއްލިއަކަށް ނުތަނަވަސް ކަމެއް ލިބޭ ގޮތައް ޢަމަލު ކޮށްފި ނަމަ ޤައުމުގައި ބިރުވެރި ކަމެއް އުފެދި ދާނެއެވެ. ރައްޔިތުންގެ ދުޅަހެޔޮކަން ހައިޖާނަކަށް ވެދާނެއެވެ.
ޢާންމު ރައްޔިތުންގެ އެކައުންޓްތަކުގައި ރައްކާކޮށްފައި ހުރި ޑޮލަރުކޮޅު ވެސް ނުލިބޭތަން އަތުވެދާނެއެވެ. މިއީ ވެސް ރައްޔިތުންގެ ކަންބޮޑުވުން އޮތް ކަމެކެވެ. ސުވާލަކީ ޤައުމުގެ މާލީ އިޤްތިޞާދީ ޙާލަތު އޮތީ އެހާ ހިސާބުގައި ތޯއެވެ. ކަމާ ބެހޭ އިދާރާތަކުން ސާފު މަޢުލޫމާތު ޙިއްސާ ނުކުރަނީ ކީއްވެތޯއެވެ.
