ކުޑަ މުއްދަތެއްގެ ތެރޭގައި މިސަރުކާރުން ރައްޔިތުންގެ ލޯބި ހޯދައިފިކަމަށް ފުނަދޫ ދާއިރާގެ ޢިއްޒަތްތެރި މެންބަރު މުޙައްމަދު މަމްދޫހު ވިދާޅުވެއްޖެއެވެ.
މިސަރުކާރުގެ ދިފާޢުގައި މީޑިޔާތަކުގައި އެންމެ ޙަރަކާތްތެރި އެއް މެންބަރަކީ ފުނަދޫ ދާއިރާގެ މެންބަރު މަންޑޭއެވެ. އަދި މަންޑޭ އަކީ ރައީސް ޑރ. މުޙައްމަދު މުޢިއްޒުގެ ވަރަށް އަރިސް ބޭފުޅެއްް ކަމަށް ނަންވެފައި ހުންނެ ބޭފުޅެކެވެ. މަންޑޭގެ މަސައްކަތަށް ސައްތައިން ސައްތަ ދޭވަރުވާ ކަމަށް ބައެއް ފަރާތްތަކުން ބުނެއެވެ. އެހެން ނަމަވެސް ދާއިރާގައި ހިމެނޭ ތިން ރަށުންކުރެ އެއްވެސް ރަށެއްގައި ތަރައްޤީގެ އެއްވެސް ކަމެއް އަދި ފެއްޓޭގޮތެއް ނުވާތީ ކަންބޮޑުވުން ފާޅުކުރާ މީހުން ވެސް މަދެއް ނޫނެވެ.
ސަރުކާރުގެ ކާމިޔާބީތަކާ ގުޅޭގޮތުން މަންޑޭ ވިދާޅުވީ ”ގިނަ ރަށްރަށުގެ ނެޓްވޯކް އަޕްގްރޭޑުކުރުމަށް ބޭނުންވާ ކޭބަލް އެރަށްރަށަށް ފޮނުވުމާއި ނެޓްވޯކް އަޕްގްރޭޑުކުރުމާއި، ރަށްރަށަށް ބޭނުންވާ، އިންޖީނު ފޯރުކޮށްދިނުމާއި، ހުއްޓިފައި ހުރި، އިންޖީނުގެތަކުގެ މަސައްކަތް ފެށުމާއި، އާ އިންޖީނުގެތައް ނިންމާ، އިންޖީނުތައް ބަދަލުކޮށް، ޚިދުމަތް ހަރުދަނާ ކުރުމަށް މިވީ، 1 އަހަރާއި 4 މަހެއްހާ ދުވަހު ގިނަ މަސައްކަތްތަކެއް ކުރެވިފައިވާކަން، ލޮބުވެތި ދިވެހި ރައްޔިތުންނަށް ސާފު. އިންތިހާބުތަކަށް ކަޑަ ޖަހާ އުސޫލުން، ކަންކަން މިސަރުކާރުން، ނުކުރާކަމުގެ ސާފު ހެކި ފެނިގެން މިދަނީ“ މިހެންނެވެ.
މަންޑޭ އަކީ ފުނަދޫ ދާއިރާގެ ޒުވާނުންގެ މަޤުބޫލުކަން ލިބިވަޑައިގެން ރައްޔިތުންގެ މަޖިލިސްއަށް އިންތިޚާބުވި ފަރާތެކެވެ. އެހެން ކަމުން ޒުވާނުންގެ އުންމީދުތައް މަންޑޭގެ މައްޗަށް ވަރަށް ބޮޑެވެ. ދާއިރާގެ ޒުވާނުން ދެކޭގޮތުގައި އެމީހުންގެ ޙާލަތު ބަދަލުކޮށްލަދެއްވާނެ މެންބަރަކީ ވެސް އެއީ އެވެ.
