ފޯކައިދޫގައި ކުރިއަށްދިޔަ މީ އޭ މައިލޯ ފުޓްސަލް ޓޯނަމަންޓް 2024 ގެ ފައިނަލުގައި މެޗުގައި ބައްދަލުކުރީ ވައިޓް ރައިޑާސް އަދި ޑީ.އެމް.ޓީއެވެ. ފޯކައިދޫ ރަސްމީ ފުޓް ބޯޅަ ދަނޑުގައި ކުރިއަށް ދިޔަ މިމެޗު ވައިޓް ރައިޑާސް ޓީމުން ކާމިޔާބުކޮށްފައިވަނީ 0-6 ލަނޑުންނެވެ. މި މެޗުގެ މޮޅު ކުޅުންތެރިއަކީ ވައިޓް ރައިޑާސްގެ ޖާޒީ ނަންބަރ 7 މުހައްމަދު ރިޝްވާންއެވެ.
މި މެޗުގައި ދެ ޓީމުގެ ފަރާތުން ވެސް ފޯރިގަދަ ކުޅުމެއް ފެނިގެންދިޔައެވެ. ނަމަވެސް ވައިޓް ރައިޑާސް ކުޅުން ވަރުގަދަކޮށް ގިނަ ގޯލުތަކެއް ވަނީ ޖަހާފައެވެ. މެޗު ތެރޭގައި ކޮންމެ ވެސް ވަރެއްގެ ހިތްހަމަނުޖެހުންތަކެއް ހިނގި ނަމަވެސް އެކަން ހައްލުކޮށް ކުޅުން ވަނީ ކުރިއަށް ގެންގޮސްފައެވެ.
މުބާރާތުގެ ވަނަތަކަށް ބަލާއިރު މުބާރާތުގެ އެންމެ މޮޅުކުޅުންތެރިޔާގެ މަގާމު ހޯދާފައިވަނީ ވައިޓް ރައިޑާސްގެ ޖާޒީ ނަންބަރ 7 މުހައްމަދު ރިޝްވާންއެވެ. އަދި މުބާރާތުގެ އެންމެ ގިނަ ގޯލު ޖެހި ކުޅުންތެރިއަކީ ވެސް ރިޝްވާންއެވެ. މުބާރާތުގެ ޕްރޮމިސިން ޕްލޭޔަރ އަކީ ބީ.އެލް.ބީ ޓީމުގެ އިފްޝާން ރަޝީދުއެވެ. މުބާރާތުގެ ފެއަރ ޕްލޭ ޓީމަކީ އަލަސްކާ ސްޕޯޓްސްއެވެ. ރަނަރަޕް ޓީމަކީ ޑީ.އެމް.ޓީއެވެ.
މުބާރާތުގެ އެންމެ މޮޅު ފަސް ކުޅުންތެރިންނަކީ:
- އަބްދުލް މުހައިމިން ( އަލަސްކާ ސްޕޯޓްސް)
- ޠޯއިފް އަބްދުލް މަޖީދު ( ޑީ.އެމް.ޓީ)
- އަބްދުﷲ މާލިކް ( ވައިޓް ރައިޑާސް)
- މުހައްމަދު ރިޝްވާން (ވައިޓް ރައިޑާސް)
- ދަނގޭ ( ވައިޓް ރައިޑާސް)
މީގެ އިތުރުން މުބާރާތުގެ އެންމެ މޮޅު ކީޕަރ އަކީ ވައިޓް ރައިޑާސްގެ ގޯލް ކީޕަރ ތޯރިގްއެވެ.
މީ އޭ މައިލޯ ފުޓްސަލް ޓޯނަމަންޓަކީ ށ.ފޯކައިދޫ ޒުވާނުންގެ މެދުގައި ފުޓްސަލްގެ ރޫހު ދިރުވައި އާލާކުރުމަށާއި، ފޯކައިދޫގައި ހުނަރުވެރި ޤާބިލް ފުޓްސަލް ކުޅުންތެރިންތަކެއް އުފެއްދުމުގެ މާތް މަޤުސަދުގައި ބާއްވަމުން ގެންދާ މުބާރާތެކެވެ. މި މުބާރާތަކީ ސިލްސިލާކޮށް ކޮންމެ އަހަރަކުވެސް ބާއްވަމުން އަންނަ ފޯރިގަދަ ފުޓްސަލް މުބާރާތެކެވެ.
