ށ. އަތޮޅު ކައުންސިލުން އިންތިޒާމުކުރާ މިލައުތުރު ހޭންޑްބޯޅަ މުބާރާތުގެ ފައިނަލް މެޗުގެ ކުޅުން ރޭގަނޑު ބާއްވާތީ، ފައިނަލުގައި އެއްކޮޅުން ވާދަކުރާ ފޭދޫ ހޭންޑްބޯޅަ ކުލަބުގެ ސަޕޯޓަރުންގެ ކަންބޮޑުވުންތައް ސޯޝަލް މީޑިޔާއަށް ބަންޑުން ކޮށްލައިފިއެވެ.
ފައިނަލް މެޗް ކުޅުމަށް ހަމަޖެހިފައި ވަނީ ފޯކައިދޫގައި ކަމަށްވެފައި، އެމީހުން ކުޅިބަލަން ދާންޖެހެނީ ކަނޑުދަތުރުކޮށްފައި ކަމަށް ވާތީ، ރޭގަނޑު ބޭއްވުމަކީ އެއްވެސް އިންސާފެއް ނޫންކަމުގައި އެމީހުން ދެކެއެވެ. އެހެނީ ފައިނަލްގައި ކުޅޭ އަނެއް ޓީމަކީ ފޯކައިދޫ ހޭންޑްބޯޅަ ކުލަބު ކަމަށްވާތީ އާއި، މެޗު ކުޅެނީ ފޯކައިދޫގައި ކަމަށް ވާތީ އެމީހުންގެ ސަޕޯޓަރުންނަށް އެއްވެސް ދަތިކަމެއް ނެތުމުގެ އިތުރުން ފައިދާތަކެއް ވާނެތީއެވެ. އެއީ މިފަދަ މުބާރާތްތައް ހޯސްޓުކުރާ ރަށަށް އޮންނާނެ ހޯމް އެޑްވާންޓޭޖެެއް ކަން ޔަޤީނެވެ.
ފޭދޫގެ ސަޕޯޓަރުންގެ ހުރިހާވެސް ނުރުހުމެއް އޮތީ ށ. އަތޮޅު ކައުންސިލަށެވެ. އެއީ މި މުބާރާތް އިންތިޒާމުކުރާ ބެލެނިވެރި ފަރާތްކަމުގައި ވާތީއެވެ. އެހެން ނަމަވެސް އެކައުންސިލްގެ މިދައުރުގެ ނައިބު ރައީސް އަކީ ވެސް ފޭދޫ ކައުންސިލްގެ ވެސް ރައީސެވެ. އެހެންކަމުން ފޭދޫ ސަޕޯޓަރުންގެ މި ކަންބޮޑުވުންތަކާ މެދު އޭނާ ވިސްނަވާނެއެވެ.
ފޭދޫ ހޭންޑްބޯޅަ ކުލަބަކީ އެއްވަނަ މިލައުތުރު ހޭންޑްބޯޅަ މުބާރާތުގެ ޗެމްޕިއަންއެވެ. އެހެންކަމުން އެމީހުން މިއަހަރުގެ މުބާރާތަށް ނިކުމެފައި ވަނީ ޗެމްޕިއަންކަން ދިފާއުކުރާށެވެ. އަދި ޓީމަށް ސަޕޯޓުކުރުމަށްޓަކައި ފޭދޫގެ ރައްޔިތުން ތިބީ ކެތްމަދުވެފައެވެ. އެހެން ނަމަވެސް ފައިނަލް މެޗުގެ ކުޅުން ރޭގަނޑު އޮތުމަކީ އެމީހުންނަށް ވަރަށް ބޮޑު ގޮންޖެހުމަަކަށް ވާނެއެވެ. ސަބަބަކީ މެޗު ނިންމާފައި އެނބުރި ރަށަށް ދިއުމަށްޓަކައި ދަތުރުކުރަންޖެހޭނީ ރޭގަނޑު ކަަމަށް ވާތީއެވެ.
ފޯކައިދޫ އާއި ފޭދޫ އަކީ އަވައްްޓެރި ދެ ރަށަށް ވެފައި، ޒަމާނުއްސުރެ ގާތް ގުޅުމެއް އޮންނަ ދެ ރަށަށް ވެފައި، މިފަދަ ކުޅިވަރު ޙަރަކާތަކުން ދެރަށުގެ ދެމެދުގައި އޮތް ރަޙްމަތްތެރި ގުޅުމަށް އެއްވެސް އުނިކަމެއް އަތުވެއްޖެ ނަމަ އެއީ ވަރަށް ދެރަކަމެކެވެ.
