ތ. ވޭމަންޑޫ ސްކޫލުން ފެންނަނީ ޒަމާނީ ވަޞީލަތްތައް ބޭނުންކޮށްގެން އަމިއްލަ ފަރުމާތަކަށް ފެނުގައި ގަސް އިންދާ ހައްދާ އޭގެން ތާޒާ ތަރުކާރީއާ މޭވާގެ ބާވަތްތައް ފައްކާވާ ހިތްގައިމު މަންޒަރުތަކެކެވެ.
އެ ސްކޫލުގަައި ކިޔަވާކުދިންގެ ހިތްތަކުގައި ދަނޑުވެރިކަމަށް ލޯބިޖެއްސުމަށާއި، ގަސް އިންދާ ހެއްދުމުގެ ރައްކާތެރި އާދަތައް އަށަގެންނެވުމަށް ހިންގާ ސްކޫލް ގާޑްނިންގ ޕްރޮގްރާމްގެ ދަށުން ފެނުގައި ގަސްހައްދާ ސިސްޓަމްތައް ޤާއިމުކޮށްފައި ވެއެވެ. އެގޮތުން ލެޓިއުސް އާއި ކަމްބާ ގިނަ އަދަދަކަށް ހައްދާފައި ވެއެވެ.
މިހާތަނަށް އެތައް ފަހަރެއްގެ މަތިން ގިނަ އަދަދެއްގެ ކިއުކަމްބާ އާއިި ލެޓިއުސް ހާވެސްޓުކޮށްފައި ވެއެވެ. އަދި ކޮންމެ ފަހަރަކު ކަނޑާ ހާވެސްޓް ވެސް ރަށަށް ވިއްކާ ހުސްކޮށްލައެވެ. މި ޙަރަކާތުގެ އެންމެ ހިތްގައިމުކަމަކީ މުޑުވައްކުރުމުން ފެށިގެން ގަސްތައް ބެލެހެއްޓުމާއި، ހާވެސްޓުކުރުމާއި، ހާވެސްޓުކުރާ ތަކެތި ވިއްކުމުގައި ވެސް ދަރިވަރުން ޢަމަލީގޮތުން ބައިވެރިވާކަމެވެ.
ވޭމަންޑޫ ސްކޫލުގެ މި މަޝްރޫޢަކީ އެފަދަ އެހެން ސްކޫލުތަކަށް ވަރަށް ފުރިހަމަ ނަމޫނާ މިސާލެއްކަމުގައި ފުދެއެވެ. އަދި މިއީ ރާއްޖޭގައި ފައްކާކުރެވިދާނެ ދަނޑުވެރިކަމުގެ ވައްތަރެއްކަން ދަލީލުކޮށްދޭ ފުރިހަމަ މިސާލެކެވެ.
