މިއަހަރުގެ ރޯދަމަހުގައިވެސް އައްޑޫ ސިޓީގައި އިހުޔާ ޕްރޮގްރާމް ކުރިޔަށް ގެންދަން އައްޑޫގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީން ނިންމައިފިއެވެ.
އިހުޔާ ޕްރޮގްރާމް ކުރިއަށް ގެންދަން ނިންމައި އެ ޕްރޮގްރާމުގެ ތާވަލު މިއަދު ވަނީ އާންމުކޮށްފަ އެވެ. ”ދަރުމަ ފޯރަމް“ ގެ ނަމުގައި ކުރިއަށް ގެންދާ މި ޕްރޮގްރާމުގައި ޖުމްލަ ފަސް ފޯރަމް ބާއްވާނެ އެވެ.
މި ފޯރަމްތައް ބާއްވަން ހަމަޖެހިފައި ވަނީ އައްޑޫގެ ސްކޫލްތަކުގަ އެވެ. އޭގެ ތެރޭގައި ހިމެނެނީ ހިތަދޫ ސްކޫލް، މަރަދޫ އިރުޝާދިއްޔާ ސްކޫލް، ފޭދޫ ސްކޫލް، ހުޅުމީދޫގައި ހުންނަ ސ. އަތޮޅު މަދަރުސާ އަދި ހިތަދޫގައި ހުންނަ އައްޑޫ ހައި ސްކޫލެވެ.
މި ފޯރާމްތަކާ ގުޅޭގޮތުން މައުލޫމާތު ދެމުން އަންހެނުންގެ ކޮމިޓީން ބުނީ ކޮންމެ ފޯރަމެއްގައި ވެސް ހާޒިރުވާ މީހުންގެ މެދުގައި ގުރުއަތު ނަގައި ހޮވޭ ފަރާތްތަކަށް ހާއްސަ އިނާމުތަކެއް ދޭނެ ހަމަޖެހިފައިވާ ކަމަށެވެ.
ފާއިތުވި އަހަރުވެސް މިފަދަ ޕްރޮގްރާމެއް އައްޑޫގައި ބާއްވާފައިވާއިރު އެ ޕްރޮގްރާމަށްވެސް ވަރަށް ބޮޑު ތަރުހީބެއް ލިބުނުކަން ފާހަގަ ކުރެވެއެވެ.