ރޯދަ ހަދިޔާއަކަށް ބ. އޭދަފުށީގެ ހުރިހާ ގެއަކަށް ކާށި ދޭން އެރަށު ކައުންސިލުން ނިންމައިފި އެވެ.

އޭދަފުށީ ކައުންސިލުން ބުނީ، އަންނަ މާރިޗު މަހު ފަށާ މިއަހަރުގެ ރޯދަ މަހަށް ރޯދަ ހަދިޔާގެ ގޮތުގައި އެރަށުގެ މީހުން ދިރިއުޅޭ ކޮންމެ ގެއަކަށް 30 ކާށި ދިނުމަށް ނިންމާފައިވާކަމަށެވެ. އަދި ކުނި އުކާލުމުގައި ރަޖިސްޓްރީ ކޮށްފައިވާ ބިދޭސީ ފަރާތަކަށްވެސް 30 ކާށި ދިނުމަށް ނިންމާފައިވާ ކަމަށް ކައުންސިލުން ވަނީ ބުނެފައެވެ.

ކައުންސިލުން ބުނީ އޭދަފުށީގައި 500 އަށްވުރެ ގިނަ ގޭގައި މީހުން ދިރިއުޅޭ ކަމަށާއި ގިނަ އަދަދެއްގެ ބިދޭސީންވެސް އެ ރަށުގައި ދިރިއުޅެ ކަމަށެވެ.

ރޯދަމަސް ފެށުމުގެ ކުރިން އޭދަފުށީގެ ހުރިހާ ގެއަކަށްވެސް ކާށި ބަހައި ނިންމުމަށް ކައުންސިލުން ވަނީ ނިންމާފައެވެ. އެގޮތުން ރަށުގެ އެކި ސަރަހައްދުތަކަށް ބަހާލައިގެން ކާށި ދުކުރަން ނިންމާފައިވާ ކަމަށް ކައުންސިލުން ބުނެއެވެ.  އޭދަފުށީ ކައުންސިލުން އެ ރަށުގެ ރައްޔިތުންނަށް ދިނުމަށް ކާށި ހޯދަނީ އޭދަފުއްޓާއި ޖެހިގެން ދެކުނުން އޮންނަ މާއްޑޫންނެވެ.

ރޯދަ ހަދިޔާގެ ގޮތުގައި އޭދަފުށީގެ ރައްޔިތުންނަށް ކާށި ދޭން ނިންމި އިރު އާއްމު މަސްމަހުގައި ވެސް އޭދަފުށީ ރައްޔިތުންނަށް ބޭނުންވާ ވަރަށް ކައުންސިލުން ކާށި ހޯދައި  ހެޔޮ އަގެއްގައި ވިއްކަމުން ގެންދާކަން ފާހަގަ ކުރެވެ އެވެ.