ޕީއެންސީން ރެކޯޑު ހެދުމަށް 14 ނޮވެމްބަރުގައި މާލޭގައި ބޭއްވި ބޮޑު ޖަލްސާއަށް ށ. ފޯކައިދޫން މާލެ އައި ސަޕޯޓަރުންނަށް ޕޮކެޓުމަނީގެ ގޮތުގައި ދިނީ 500 ރުފިޔާ އެވެ. ށ. އަތޮޅުގެ އެހެން ހުރިހާ ދާއިރާއަކުން އައި ޕީއެންސީ ސަޕޯޓަރުންނަށް 1000 ރުފިޔާ ލިބިފައި ވެއެވެ. އެހެން ކަމުން ފޯކައިދޫގެ ސަޕޯޓަރުންގެ ތެރޭގައި މައްސަލަ ޖެހި، ޕޮކެޓްމަނީ ލޫޓުވާލީ ކަަމަށް ބައެއް މީހުން ބުނަން ފަށައިފި އެވެ.
މި ނޫހާ ވާހަކަދެއްކި ފަރާތަކުން ކަށަވަރު ކޮށްދިން ގޮތުގައި، އެ ޖަލްސާއަށް ޕީއެންސީ ސަޕޯޓަރުން މާލެ ގެނައީ ޕާޓީގެ ފަރާތުން ދެކޮޅު ޓިކެޓުގެ އިތުރުން ކޮންމެ މީހަކަށް 1000 ރުފިޔާގެ ޖީބުފައިސާއެއް ދޭގޮތަށެވެ. އެހެން ނަމަވެސް އެމީހުންނަށް ދިނީ އެންމެ 500 ރުފިޔާ ކަމަށެވެ. ށ. އަތޮޅުގެ އެހެން ދާއިރާތަކުގެ ރައްޓެހިންގެ ފަރާތުން އެނގުނު ގޮތުގައި އެމީހުންނަށް 1000 ރުފިޔާ ލިބިފައި ވެއެވެ. އަދި އެހެން ދާއިރާތަކުގެ މަޖިލިސް މެންބަރުންގެ ފަރާތުން ވެސް އެކަން ޔަޤީންވެފައިވާ ކަމަށެވެ. އެހެންކަމުން ފޯކައިދޫ ސަޕޯޓަރުންނަށް މަދުން ލިބުމަކީ ޤަބޫލުކުރެވޭ ކަމެއް ނޫން ކަމަށާއި، ކޮންމެވެސް ބަޔަކު އެ ފައިސާކޮޅުގައި ވެސް ޖެހިއްޖެ ކަމަށެވެ.
އަދި އޭނާ އިތުރަށް ކިޔައިދިން ގޮތުގައި ފޯކައިދޫ ޕީއެންސީގައި އިސްކޮށް އުޅޭ އެއްވެސް މީހަކު އެރޭ ޖަލްސާއަށް ވެސް ނުދާ ކަމަށާއި، އެކަމާއި ގުޅިގެން ވެސް ޓީމުގެ ތެރޭގައި މައްސަލަ ޖެހުނު ކަމަށެވެ. އަދި ދިން ފައިސާކޮޅުން ނުފުދިގެން އެއް ބަޔަކު ނިދީ އާޓިފިޝަލް ބީޗުގައި ކަމަށާއި، އަނެއް ބަޔަކު ތިބީ ހޭލާ ފުޑްކޯޓުތަކުގައި ކަމަށެވެ. އެހެން ނަމަވެސް ޕާޓީއާ މެދު ހިތްބަރުކަމެއް ނެތްކަމަށާއި، މިއީ ރަށުން އެމީހުންގެ މައްޗަށް އިސްކޮށްފައިތިބި މީހުންގެ ނާޤާބިލުކަން ކަމަށާއި، މަޖިލިސް މެންބަރުގެ ފަރުވާކުޑަކަން ކަމަށެވެ. އަދި އިތުރަށް ބުނީ ދެން މިކަހަލަ ކަމަކަށް އަންނާނީ ސީދާ އަތަށް ފައިސާ އެރީމާ ކަމަށެވެ. މިފަހަރު އައީ ރައީސް ޑރ. މުޙައްމަދު މުޢިއްޒު ދެކެ ވާ ލޯތްބެއްގެ ސަބަބުން ކަމަށެވެ.
ކިޔުންތެރިންގެ ހިޔާލު