ޕީސީބީގެ ނައިބް ރައީސްކަމުން މުހައްމަދު ފިރާޒް ވަކިކުރީ ކީއްވެކަމެއް ސާފު ނުވިޔަސް އެއީ ކީއްވެގެން އެޅުއްވި ފިޔަވަޅެއްތޯ މީހުން ސުވާލުކުރަން ފަށައިފިއެވެ.

ފިރާޒް އެމަޤާމަށް ފުރަތަމަ ޢައްޔަން ކުރެއްވީ 2022 ވަނަ އަހަރުގެ ނޮވެމްބަރު މަހުގައެވެ. މި މަހުގެ 25 ވަނަ ދުވަހުން ފެށިގެން އެ މަޤާމުން ވަކިކޮށްފައި ވާކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވިދާޅުވެއެވެ. އެ ބޯޑުން ކުރެއްވި ޕޯސްޓެއްގައި ޕީސީބީގެ ނާއިބެއްގެ ގޮތުގައި ބޯޑަށް ކޮށްދެއްވި ޚިދުމަތްތަކަށް ޝުކުރު އަދާކުރައްވާފައި ވެއެވެ.

މީސްމީޑިޔާގައި ޕީއެންސީއަށް ކެމްޕެއިން ކުރިކަމުގެ ތުހުމަތުގައި މީގެ ކުރިން ރައްޔިތުންގެ މަޖިލީހުގެ އެސްއޯއީ ކޮމިޓީން ވަނީ ފިރާޒުގެ މައްސަލައެއް ބަލާފައެވެ. އެއީ ޕީސީބީގެ ރައީސާއި ނައިބު ރައީސަށް ސިޔާސީ ޕާޓީތަކުގައި ރަޖިސްޓްރީވެ ސިޔާސީ ޙަރަކާތްތަކުގައި ބައިވެރިވުމަކީ މަނާކަމެކެވެ.

އެހެން ނަމަވެސް ފިރާޒު ވަނީ މިދިޔަ އަހަރު ޕީއެންސީއަށް ސޮއިކޮށްފައެވެ. އަދި ވަރަށް ޙަރަކާތްތެރި ގޮތެއްގައި ސޯޝަލް މީޑިޔާގައި ސިޔާސީ ގޮތުން އަމިއްލަ ރަޢުޔުތައް ނެރެ، ސެލްފީތައް ޙިިއްސާކޮށް، އިދިކޮޅު ފަރާތްތަކަށް ފާޑުކިޔައި، ބޯޑުގެ ޤާނޫނީ ވާޖިބުތަކާއި ޒިންމާތަކާއި، ތަސައްވުރަށް އުނިކަން ލިބޭ ފަދަ ބަހުސްތައް ކުރައްވާފައެވެ. ޕްރައިވަޓައިޒޭޝަން ބޯޑަކީ ކުންފުނިތައް ޒިންމާދާރު ކުރުމުގެ މަސައްކަތް މަތިކޮށްފައިވާ މިނިވަން އިދާރާއެކެވެ.