މާލޭގެ މަގުތައް ތޮއްޖެހި ހިނގާ މީހުންނަށާއި، އުޅަނދުތައް ދުއްވާ މީހުންނަށް އުނދަގޫތައް ދިމާވަމުންދާކަމީ ހަމަ އެންމެން ވެސް ޤަބޫލް ކުރާނެ ޙަޤީޤަތެކެވެ. އެހެން ކަމުން ވެހިކަލް ޕާކުކުރުމުގައި ޤަވައިދަށް ޢަމަލުކުރުމަކީ އަހުލުވެރިވާންޖެހޭ އަޚުލާޤެކެވެ.
މަގުތަކުގެ ކަން ކަންމަތީގައި ޕާކުކުރުމާއި، ކަފިހުރަސްތަކުގައި ޕާކުކުރުމާއި، ޕޭވްމަންޓް މަތީ ޕާކުކުރުމާއި، މީހުން ވަދެ ނިކުމެ އުޅޭ ގޯޅިތައް ބަންދުވާ ގޮތަށް ޕާކުކުރުމަކީ ޙައްލުކުރަން ޖެހޭ މައްސަލަތަކެވެ. މިހާރަކަށް އައިސް ފެންނަ އަނެއް މަންޒަރަކީ ތަފާތު އިވެންޓްތަކާއި ކަންކަމުގައި ފުލުހުން ބޭނުންކުރާ ޕްލާސްޓިކް ބެރިކޭޑްތައް އެއްވެސް ހަމައެއް އުޞޫލެއް ނެތި ޖެހުނުތާކަށް ދޫކޮށްލާފައި ހުންނަ މަންޒަރެެވެ. އެގޮތުން ކަންމަތީ އާއި، ކަފިހުރަސްތަކާއި، ޕާކުކުރުމަށް އޮންނަ ކުޑަ ޖާގަކޮޅުގައި ތިން ހަތަރު ބެރިކޭޑް ހުރުމުގެ ސަބަބުން ވަރަށް ބޮޑަށް އުނދަގޫ ވެއެވެ.
މާލެ ފަދަ ތޮއްޖެހިފައި އޮތްތަނެއްގައި ފުލުހުން ވެސް ބެރިކޭޑް ޖެހުމާއި، ބޭނުންކުރެއް ވުމުގައި އެއަށް ވުރެ، ޒިންމާދާރު ވާންޖެހެއެވެ. ބޮޑު ބަޖެޓާއި، އެންމެ ގިނަ މުވައްޒަފުންނާއި، އުފުލާނެ ވެހިކަލްތަކާއި، ބަހައްޓާނެ ބިންތައް ވެސް އެންމެ ގިނަ މުޢައްސަސާއެއްގެ ފަރާތުން މިއީ ފެނިގެން ވާނެކަމެއް ނޫނެވެ. ފުލުހުންނަށް ލިބިދީފައިވާ ޤާނޫނީ ބާރަކީ ރައްޔިތުންނަށް ތަކުލީފަކަށް ވެގެން ނުވާނެއެވެ.
ބައެއް މީހުން ދެކޭގޮތުގައި މިހާރު ވެހިކަލް ޓޯކުރާ އުޞޫލުން ބެރިކޭޑްތައް ވެސް ޓޯކުރަން ވެއްޖެ ކަމަށެވެ.
