މަޝްހޫރު ހުކުރު ނޫހާއި މިއަދު ނޫހާއި ހަވީރު ނޫހާއި ރާއްޖޭގެ އެހެން ނޫސްތަކާއި މަޖައްލާތަކަށް ލިޔުއްވާފައިވާ ލިޔުންތެރިޔާ އަދި މިހާރު ދަނޑުވެރިކަމުގެ މާހިރެއް ވެސް ކަމުގައިވާ ފާރޫޤު އަޙްމަދު 3 ޖަނަވަރީ 2021 ގައި އާފަތިސް ނޫހަށް “ބިޑިބޯ ފަނޑިޔާރު ވިއްކާ ނިޔާ” މި ސުރުހީއަށް ލިޔުއްވާފައިވާ ވަރަށް ތަފްޞީލީ ރިޕޯޓުގައި އެބުނާ ފަނޑިޔާރަކީ ކާކުތޯ ސުވާލުކޮށްލަން ޖެހެއެވެ.
އެ ލިޔުމުގައި ލިޔުންތެރިޔާ ފާރޫޤު އަޙްމަދު ލިޔުއްވާފައި ވަނީ މިފަދައިންނެވެ. “ބިޑިބޯ ފަނޑިޔާރު ވިއްކާ ނިޔާގެ ވާހަކަޔަކީވެސް އެފަދަ ކަމެކެވެ. ޢަދުލަކަށް އަދި އިންސާފަކަށް ނުބަލާ ތާނގައި، ދީނަކަށް މިއްލަތަކަށްވެސް ނުބަލައެވެ. ފަނޑިޔާރުކަން ކިޔެވުނީ ކައިރި ކަރަޔަކުންނާއި ރާއްޖެއާ ދުރުހިސާބަކުން ކަމަށްވާތީ ކަންނޭނގެއެވެ. އިސްލާމީހަމަތަކާ ބީރައްޓެހި، ހުޅަނގުގެ އިންސާނީ ޙައްޤުތަކަށް ” ލޯބިކުރާ ” ވިސްނުމެއްގެ ވެރިޔެކެވެ. ވެރިކަމުގެ ނިޒާމު ގަޑުބަޑުވެ ހެވާއި ނުބައި ވަކިނުކުރެވޭ މުޖުތަމަޢެއްގައި، ވެރިކަންކުރާ މީހުންނާ ދޯޅުވެފައި އެއްވިސްނުމެއްގައި ޢަމަލާއި ފިކުރު ހުންނާތީ، ބިޑިބޯ ފަނޑިޔާރަށް ވެސް، އަންހެނަކަށްވިޔަސް ފަނޑިޔާރުކަން ކުރުމުގެ ފުރުޞަތު ލިބުނެވެ. ދެތުންފަތަށް ކަޅުކުލަ އަރާވަރަށް، ހެސްކިޔާފައި ބިޑިބޮވެއެވެ. ބޮލުގައި ކުލަޖައްސާލިޔަސް އޯކޭ އެވެ. ހަށިގަނޑުގެ ވަނާތައް ހާމަވާގޮތަށް ހެދުން އެޅެއެވެ. އިސްލާމީ މުޖުތަމަޢެއްކަމުގައިވާތީ، އެންމެ ނިކަމެތި މީހާއަށް ދާނދެން ޖަމާޢަތުގެ އެންމެން ކަހަލަ ގޮތަކަށް ބުރުގާ އެޅިޔަސް، ބޮލުގެ އިސްތަށިތައް ހާވާލައިގެން އިނދެ، ޙުކުމް ކޮށްލެވެއެވެ. އެހެން ފަނޑިޔާރުން އެތައް ދުވަހަކު ބަލަމުން އަންނަ މައްސަލައެއްގައި، ޢަދްލު އިންސާފުގެ ބޭރުން، ވަކިގޮތަކަށް ޙުކުމެއް ކޮށްލަން މަޖުބޫރުވާ ޙާލަތުގައި، ކުއްލިޔަކަށް ގޮނޑިޔަށް އަރާ ބޭނުން ޙުކުމެއް ބޭނުން ގޮތަކަށް ކޮށްލެވެއެވެ. ޙައްޤެއް ބާތިލެއް ނޯވެއެވެ.”
ލިޔުންތެރިޔާ ސިފަކޮށްފައި އެވާ ފަނޑިޔާރަކީ ކާކު ކަން ދިވެހީންނަށް ކަށަވަރުވާން ޖެހެއެވެ. އެހެނީ މިރާއްޖޭގެ ޝަރުޢީ ނިޒާމުގައި އެފަދަ ފަނޑިޔާރުން ތިބިއްޔާ އެއީ ވަރަށް ދެރަކަމެކެވެ. އެއްވެސް ފަނޑިޔާރަކު، އެއްވެސް ކޯޓެއްގައި ނިޔާ ވިއްކާނަމަ އެއީ ވަރަށް ނުރައްކާތެރި ކަމެކެވެ. އަދުލު އިންސާފު ގެއްލިއްޖެ މުޖުތަމަޢެއްގައި އެއްވެސް ހަމަޖެހުމެއް، ކުރިއެރުމެއް، ރައްކާތެރިކަމެއް ނޯންނާނެތީއެވެ. ޝަރުޢީ ނިޒާމަށް ކުރެވޭ މިފަދަ ތުހުމަތުތަކުގެ ދޮގުތެދު ޔަޤީންވެއި އޮތުމަކީ ކޮންމެހެން ވެސް ބޭނުންތެރި ކަމެކެވެ.
