ޒަމާނީ ދަނޑުވެރިކަން ށ އަތޮޅަށް ތަޢާރަފުކޮށް، ދަނޑުވެރިން އަހުލުވެރިކުރުމަށްޓަކައި ށ. އަތޮޅު ކައުންސިލާއި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އާއި ށ. ބިލެތްފަހީ ކައުންސިލް ގުޅިގެން 7 ދުވަހުގެ މުއްދަތަށް ކުރިއަށް ގެންދިޔަ ދަނޑުވެރިކަމުގެ ތަމްރީން ޕްރޮގްރާމް ކާމިޔާބުކަމާއެކު ނިންމާލައިފިއެވެ.
ށ. ބިލެތްފައްސަކީ އަތޮޅުގައި މީހުން ދިރިއުޅޭ ރަށްތަކުގެ ތެރެއިން ދަނޑުބިން އެންމެ ތަނަވަސް އެއް ރަށެވެ. އަދި ޒަމާނުއްސުރެ ދަނޑުވެރިކަން ކުރަމުން އަންނަ ރަށެކެވެ. އެހެން ނަމަވެސް އެމީހުން ދަނޑުވެރިކަން ކުރަނީ އާންމު ދަނޑުވެރިކަމުގެ އުކުޅުތަކާއި ވަޞީލަތްތައް ބޭނުންކޮށްގެންނެވެ. އެހެންކަމުން މި ފަދަ ތަމްރީން ޕްރޮގްރާމްތަކުގެ ސަބަބުން ޒަމާނީ ދަނޑުވެރިކަމަށް ހޭލުންތެރިވެގެންދާނެއެވެ.
ދިވެހިރާއްޖެ އަކީ ބިންކުޑަ ޤައުމަކަށް ވުމުގެ އިތުރުން ބިމުގެ ފެންފަށަލަ ވެސް ތުނި ޤައުމަަކަށް ވާތީ، ޒަމާނީ ޓެކްނޮލޮޖީގެ ވަޞީލަތްތައް ބޭނުންކުރަން ވަނީ ޖެހިފައެވެ. އަދި އެފަދަ ވަޞީލަތްތައް ތަޢާރަފުކޮށް، ރައްކާތެރިގޮތުގައި ބޭނުންކޮށްފި ނަމަ ދަނޑުވެރި ނަފާ އިތުރުކުރެވިދާނެ ކަމަށް ދަނޑުވެރިކަމުގެ މާހިރުން ވިދާޅުވެއެވެ.
