ސެންޓޭ ޖިމަށްދަނީ ހަށިގަނޑު ރީތިކޮށްގެން، ބޮޑުކޮށްގެން، ކަޓުއަރުވައިގެން ކުރިއަށް އޮތް އަހަރު މިސްޓަރ މޯލްޑިވްސް ކާމިޔާބުކުރުމުގެ މާތް ނިޔަތުގައެވެ.
ފާތުންއަކީ އަބަދުވެސް ރީތި ކުއްޖެކެވެ. މިހާރަކަށް އައިސް ހަށިގަނޑު ރީއްޗަށް ބެހެއްޓުމަށް އިތުރަށް މަސައްކަތް ކުރާތަންވެސް އެބަފެނެއެވެ. ފާތުން ބޭނުންވަނީ މަޝްހޫރު މޮޑެލްއަކަށްވާށެވެ.
ސެންޓޭގެ އެހެރީ ޝަރަފުވެރި މިސްޓަރ މޯލްޑިވްސް މުބާރާތް ކާމިޔާބުކޮށް، ދިވެހިރާއްޖެ އަށް ލިބުނު ފުރުޞަތެއްގައި އޭޝިޔާގެ ބޮޑީބިލްޑިން މުބާރާތުގައި ބައިވެރިވުމަށް އިންޑޮނޭޝިޔާއަށްދާން ފުރަން އެއަރޕޯޓަށް ގޮހެވެ. މުޅި ގައުމު އޮތީ ސެންޓޭއާއެކުއޭވެސް ހީވާ ކަހަލައެވެ. ސެންޓޭއަށް ހެޔޮއެދި، ލިޔެފައިވާ ޚަބަރުތަކާއި ލިޔެކުންތަކުން ރާއްޖޭގެ މީޑިޔާ އޮތީ ފުރިފައެވެ. ސޯޝަލް މީޑިޔާވެސް ފެންނަނީ ހަމަ އެފަދައިންނެވެ. ސެންޓޭ ފުރުވަން ޒުވާނުންގެ ވަޒީރާއި ކުޅިވަރު ވަޒީރުވެސް އެއަރޕޯޓަށް ވަޑައިންނެވިއެވެ.
ފާތުން އެހެރީ މިސްވޯލްޑުގައި ވާދަކުރުމަށް ރަޝިޔާއަށް ދާން ވިސާ ހޯދަން ކޮޅުނބަށް ގޮހެވެ. އަސްތަ އަސްތާއެވެ. އެޚަބަރު ނޫސްތަކަށް އަރައިފިއެވެ. އެފަކީރަށް ލަޢުނެތް ނުދޭ އާދަމުގެ ދަރިއެއް މި ދިވެހި އުޑުދަށުގައި ނެތްކަހަލައެވެ. އެންމެފަހުން ސަރުކާރުން ވެސް އެކަން ކުށްވެރިކޮށް ބަޔާންވެސް ނެރެފިއެވެ. ދީނާ ސަގާފަތާ ޚިލާފު ކަމަކަށްވެގެންނޯލަވެ.
ގިނަ ބަޔަކު ކެތްމަދުވެފައި ތިބީ މަންޒަރު ބަލާށެވެ. ސެންޓޭ ބޮޑީ ބިލްޑިންގ މުބާރާތަށް އިންޑޮނޭޝިޔާއަށް ގޮސް ހަށިގަނޑު ދައްކާލަން ސްޓޭޖަށް އަރާ އެހުރީ މުޅި ގައިގައި ތެޔޮ ވަށައިގެން ހުސް ޖަންގިޔަލުގައެވެ. ފާތުންވެސް މިސްވޯލްޑު މުބާރާތަށް ގޮސް ދައްކާނީ ފާތުންގެ ހަށިގަނޑެވެ. ހަށިގަނޑުގެ ވަނާތަކެވެ. ލައިގެން ހުންނާނެ އެއްޗެއް އަދި ނޭނގެއެވެ.
އެކަމަކު… މި މުނާފިގުކަމުގެ ސިލްސިލާއަށް ނިމުން ގެންނަން އެބަޖެހެއެވެ. އަންހެނަކު އޮރިޔާންވުމުން ދީނާ ސާގާފަތާ ޚިލާފުވީކަމަށް ވެފައި، ފިރިހެނަކު އޮރިޔާންވުމުން ގައުމު އެކަމާ ފަޚުރުވެރިވާން ޖެހޭ ސަބަބެއް ނެތެވެ.
