ށ. ފޯކައިދޫ ގުރަހަ، ފާޠިމަތު ފަޒްލާ (ފާތުން) އަކީ މަދުރަސީ ޙަޔާތުން ފެށިގެން ވެސް  އެރަށުގައި ފާހަގަކޮށްލެވޭ، ކަންކަމުގައި އިސްނަގައި އުޅޭ ވަރަށް ޙަރަކާތްތެރި، ނުހަނު ހީވާގި އަދި ހިތްހެޔޮ ޒުވާނެކެވެ. ޒަވާޖީ ޙަޔާތް ފެށި ފަހުން ދިމާވި ބޮޑެތި ގޮންޖެހުންތަކުން އަރައިގަނެ އަލުން ފިޓްނަސް ރަނގަޅު ކުރުމަށްޓަކައި ވީ ޤުރުބާނީ އަކީ އެފަދަ އެހެން ކަނބަލުންނަށް ރަނގަޅު ފިލާވަޅުތަކެއް ލިބޭނެ ޝައުޤުވެރި ވާހަކައަަކަށް ވީތީ، އެކަމާ ގުޅޭ ތަފުޞީލުތައް ކިޔުންތެރިންނަށް ތިލަކޮށްދިނުމުގެ މަޤުޞަދުގައި މިލައުތުރުގެ ފަރާތުން ބައްދަލުކޮށް އިތުރު މަޢުލޫމާތު ހޯދީމެވެ.

ކޯވިޑް 19 ގެ ދުވަސްވަރުގައި ގޭގައި ބަންދުވެފައި ހުންނަން ޖެހުމާއެކު ފާތުން އިޚުތިޔާރުކުރީ ފިޓްނަސް ރަނގަޅު ކުރުމަށްޓަކައި ކަސްރަތުކުރުމެވެ. އެގޮތުން ކުރި މަސައްކަތުގެ ނަތީޖާއެއްގެ ގޮތުން އޭނާގެ ހަށިގަނޑު ރީތިވެ، ވަރަށް ފިޓް ޒުވާނަކަށް ވިއެވެ. ދުޅަހެޔޮ ޞިއްޙަތެއްގައި ހުރުމަށާއި ހަށިގަނޑު ރީތިކޮށް ބެހެއްޓުމަށް މަސައްކަތްކުރުމަކީ ވަރަށް ކުރާހިތުން ކުރާކަމެއް ކަމުގައި ފާތުން ބުންޏެވެ. ފާތުންނަކީ މިހާރު ތިންކުދިންގެ މަންމައެކެވެ. ފުރަތަމަ ދަރިފުޅު ލިބުމަށް ފަހުގައި ދޫވެގެންދިޔަ ފިޓްނަސް އަލުން ހޯދީ ކޯވިޑް ދުވަސްވަރުގައި ތަންފީޒުކުރި ޞިއްޙީ ކުއްލިނުރައްކަލުގެ ޙާލަތާ ގުޅިގެން އައި ފުރަބަންދުގައެވެ. ފާތުން ހުރީ އެކަމާ ވަރަށް ބޮޑަށް އުފާވެ ހިތްހަމަޖެހިފައެވެ.

ދެވަނަ ކުއްޖަކަށް ބަލިވެއިންކަން އެނގުނީ ވަރަށް ކުއްލިގޮތަކަށެވެ. އަދި ޑޮކްޓަރު ބެލުމަށް ފަހު ބޭބީ ރަނގަޅު ނޫންކަމުގެ ޚަބަރު ދިނުމުން ފާތުންގެ ޙަޔާތަށް ބޮޑު އަނދިރި ވިލާގަނޑެއް އައި ކަހަލައެވެ. އާއިލާގެ ތެރޭގައި އޮތް އުފާވެރިކަން ހިނދުކޮޅެއްގެ ތެރޭގައި ނެތި ގޮސް ހާސްކަމާ ހިތްދަތިކަމުގެ ތެރެއަށް ޣަރަޤުވެގެން ދިޔައެވެ. އަދި އިތުރަށް ޔަޤީންކުރުމަށްޓަކައި ރާއްޖެއިން ބޭރަށް ގޮސް އިތުރު ޓެސްޓަތައް ހެދިއެވެ. އެގޮތުން އިންޑިޔާއިން އަލުން ޓެސްޓްތައް ހެދުމުން ވެސް ޔަޤީންވީކަމަކީ ބޭބީ އަކީ ޑައުންސިންޑްރޯމް ކުއްޖަކަށްވުމުގެ އިތުރުން ބޮޑެތި ޞިއްޙީ މައްސަލަތަކެއް ހުރިކަމާއި، ފުރިހަމައަށް އުފެދިފައި ނުވާކަމެވެ. އަދި ވިހެޔަސް ދުނިޔޭގައި އޮތުމުގެ ފުރުޞަތު ވަރަށް ކުޑަކަމަށް އިންޑިޔާއިން ބެލި ޑޮކްޓަރުން ބުނުމުން ފާތުންނަށް ދުނިޔެ ވިހަކުނބުރަކަށް ވީފަދައެވެ. ދެންވާނެ ގޮތެއްވެސް ނޭނގޭ ޙާލު ފާތުންނަށް ގޮތް ހުސްވި ފަދައެވެ. އަދި ޑޮކްޓަރުންގެ އެންމެ ފަހުގެ ލަފަޔަކަށް “ޑީއެންސީ” ކަމަށް ބުނުމުން ހިތް ކުދިކުދި ވެގެންދިޔައެވެ.

އިންޑިޔާގެ ހޮސްޕިޓަލެއްގައި ހާސްކަމާއި މާޔޫސްކަމުގައި ދެމަފިރިން ތިއްބާ، އެއްދުވަހަކު ޝައިޚް އަޙްމަދު ސަމީރު ގުޅުއްވިއެވެ. އަދި ކުއްޖާއަކީ ޚާއްސައެހީއަށް ބޭނުންވާ ކުއްޖަކަށް ވެދާނެކަމަށާއި، ދުނިޔޭގައި އޮތުމުގެ ފުރުޞަތު ނެތްކަމަށް ޑޮކްޓަރުން ބުނެފައިވާކަން އެނގޭކަމަށާއި، ޑީއެންސީ ހެދުން އެއީ އެންމެ ރަނގަޅު ގޮތްކަމަށް ލަފާދީފައިވާކަން ވެސް އެނގޭކަމަށާއި، އެހެން ނަމަވެސް އެހެން ނަހަދާ ދަރިފުޅު ވިހެއުމަށް ނަޞޭޙަތްތެރިވިއެވެ. ކޮންމެ ފުރާނައެއް ވެސް ޚަލްޤު ކުރައްވަނީ މާތް ﷲ ކަމަށާއި، އެކުއްޖާ ދުނިޔޭގައި އޮންނާނެކަމެއް ނުވަތަ ނޫންކަމެއް ކަނޑައަޅަން އެއްވެސް މީހަކަށް ނޭނގޭނެ ކަމަށާއި، ހިތުގެ ވިންދު ހިނގަ ހިނގާ ހުއްޓާ އެފަދަކަމެއް ކުރަން ހެޔޮނުވާނެކަމަށާއި، އެއީ ފާފަވެރި ވެދާނެކަމެއް ކަމަށް ބުނެ ނަޞޭޙަތް ދިނެވެ.

އޭގެ ފަހުން ފާތުންގެ ހިތުގައި ފުނިޖެހިފައި އޮތް ސުވާލުތަކަށް ޖަވާބު ލިބި މަޑު މަޑުން ހާސްކަން ފިލާ ގޮސްފިއެވެ. އަދި ޑޮކްޓަރުންގެ ނިންމުމާ ދެކޮޅަށް، ކުއްޖާ ވިހެއުމަށް ޢަޒުމް ކަނޑައެޅިއެވެ. އަދި އެހެން ހުރިހާ ވިސްނުންތަކާއި ފިކުރުތައް ދޫކޮށްލިއެވެ. އެހިނދު ފާތުންގެ ހިތަށް ފިނިކަމަކާއި ހިތްހަމަޖެހުން ލިބެން ފެށިއެވެ. އަދި އެކުއްޖާ ވިހާނެކަމަށާއި، ދުނިޔޭގައި ވެސް އޮންނާނެ ކަމަށާއި، ފަޅި ސިކުންތުކޮޅެއްގެ ތެރޭގައި ވެސް ކަންކަން ބަދަލުވެދާނެ ކަމަށް ޤަބޫލުކުރެވި މާތް ﷲ އަށް ވަކީލުކުރުމަށް ފަހު އެނބުރި މާލެ އައެވެ.

ދަރިފުޅު ވިހެއުމުން ދެން ކަންތައްވީ ކިހިނެތް؟

ފާތުންގެ ބަނޑަށް ދުވަސްފުރުމުން އޮޕަރޭޝަން ކޮށްގެން ކުއްޖާ ނެގިއެވެ. ނަމަވެސް ކުރިންވެސް ޑޮކްޓަރުން ބުނިގޮތަށް ކުއްޖާ ވެގެންދިޔައީ ބަލިކުއްޖަަކަށެވެ. އަދި ހިތުގައި އުފެދުމުގެ މައްސަލައެއް ހުރުމުން އެމަޖެންސީކޮށް އޮޕަރޭޝަނެއް ކުރަންޖެހޭތީ ރާއްޖެއިން ބޭރަށް ފުރުވާލަން ރާއްޖޭގެ ޑޮކްޓަރުން ނިންމިއެވެ. އެފަދަ ނާޒުކު ޙާލަތެއްގައި ވެސް ހިތްވަރުގެ މައްޗަށް ހިތްވަރުލާފައި ދަރިފުޅު ގޮވައިގެން އިންޑިޔާއަށް ފުރީ ވިހައިގަދަވެސް ނުވަނީހެވެ. އަދި އެއީ ކޯވިޑް އާލަމީ ވަބާއެއްގެ ދުވަސްވަރު ކަމަށް ވީތީ، ނުހަނު ދަތި އުނދަގުލާއެކު އިންޑިޔާއަށް ގޮސް ދަރިފުޅުގެ ފަރުވާގެ ކަންތައް ފުރިހަމަ ކުރިއެވެ. އިތުރު އެއްވެސް އެހީތެރިއެއް ނެތި އެކަނިމާ އެކަނިވެސް އެތައް ދުވަހެއް އިންޑިޔާގައި ހޭދަކުރީ އެއްވެސް ޖެހިލުމެއް ނެތި ހިތްވަރުގަދަ ނަމޫނާ މަންމައެއްގެ ގޮތުގައެވެ. ފިރިމީހާ އަކީ ޤައުމީ ދިފާޢީ ބާރުގެ ޚިދުމަތުގައި އުޅޭ މީހަކަށް ވީތީ، ހުރިހާ ދުވަހެއްގައި އެކުގައި ހުރެވޭގޮތް ނުވުމުންވެސް އެއްވެސް ހާސްކަމެއް ނެތި އެންމެހާކަމެއް މެނޭޖުކުރުމާއެކު ތަޙައްމަލް ކުރިއެވެ.

އިންޑިޔާގައި އެތައް ދުވަހެއް ހޭދަކުރުމަށް ފަހު، އެނބުރި މާލެ އައިތަނާ އަނެއްކާ ވެސް ބަނޑަށް އުނދަގޫތަކެއް ވާތީ ޑޮކްޓަރަށް ދައްކަން ޖެހުނެވެ. އަދި ޓެސްޓު ހެދުމުން އެނގުނީ ތިންވަނަ ކުއްޖަކަށް ބަލިވެއިންކަމެވެ. އަނެއްކާ ރިހޭފައި މައްޗަށް ފޮއި ވެއްޓުނީއެވެ. ނަފުސާނީ ގޮތުންނާއި، ޖިސްމާނީ ގޮތުން އިންތިހާ ވަރުބަލިވެފައި ހުރި ފާތުންނަށް އަނެއްކާ ވެސް ބޮޑު އިމްތިޙާނެއް ކުރިމަތިވިއެވެ. އެހިނދު އަނެއްކާވެސް ބުއްދި އިސްކޮށް، އެހުރިހާކަމަކީ ވެސް ދުނިޔެމަތީގެ އިމްތިޙާނުކަމަށް ބަލައި، ކަށިން ހިތްވަރުލާފައި ކުރިމަތިލިއެވެ. އެހެން ނަމަވެސް ގާތްގާތުގައި ބަނޑުބޮޑުވުމުން ޞިއްޙީ މައްސަލަތަކާ ކުރިމަތިލާން ޖެހުނެވެ. އާދަޔާ ޚިލާފަށް މީހާ ބަރުވެ ހަށިގަނޑު ބުރަހެލިވެގެން ދިޔައެވެ.

މާތް ﷲ އަށް ޙަމްދު ހުއްޓެވެ. ތިންވަނަ ކުއްޖަކީ ބަލިކުއްޖެއް ނޫނެވެ. އެހެނަސް ފުރަތަމަ ދަރިފުޅަށް 6 އަހަރުގައި، ތުއްތު ތުއްތު ދެކުދިންގެ ކަންކަން ބެލެހެއްޓުމަކީ ވަރަށް ބޮޑު ބުރައަކަށް ވިއެވެ. އަދި ދެކުދިން ކުރެ އެއްކުއްޖަކީ އާންމު އެހެން ކުދިންނާ ތަފާތު ބަލިކުއްޖަކަށް ވީތީ، ދިމާވާ ގޮންޖެހުންތައް އެހާމެ ގިނަވިއެވެ. އެހެންކަމުން ވިހާގަދަވެ، ދެކުދިން ލޭފެންޖެހެންދެން މަންމަ ގާތުގައި މަޑުކޮށްލުމަށް އުފަންރަށް ފޯކައިދޫއަށް ދިރިއުޅުން ބަދަލުކޮށްލިއެވެ.

ބަރުދަން ލުއިކުރުމާއި، އަލުން ފިޓްނަސް ހޯދުމުގެ މަސައްކަތް ފެށުން:

ތިންވަނަ ކުއްޖާ ވިހައިގެން ރަށަަށް ދިޔައިރު، ފާތުން ހުރީ އާދަޔާ ޚިލާފަށް ފަލަވެފައެވެ. ބަރުދަނުގައި 85 ކިލޯ ހުރުމުން ހަރަކާތްތެރިވާން ވެސް އުނދަގޫވި ކަމަށް ފާތުން ކިޔައިދިނެވެ. އެހެން ނަމަވެސް ވިހޭތާ 1 މަހާ 25 ދުވަސްތެރޭގައި، ރަށުގެ ޖިމްގައި އަމިއްލަ އިރުޝާދުގެ ދަށުން ބަރުދަން ލުއިކުރުމުގެ ކަސްރަތުތައް ފެށިއެވެ. އަދި އަމިއްލައަށް ޓާގެޓެއް ކަނޑައަޅައި، ލިބޭ ވަގުތުތައް ރަނގަޅަށް ބަހާލައިގެން ފެށި މަސައްކަތް ވެގެންދިޔައީ މުޅި ޙަޔާތް ބަދަލުކޮށްލި މުހިންމު މަރްޙަލާއަކަށެވެ. ފަސްވަގުތު ނަމާދުކުރުމަށް އާދަވުމާއި، ގޭތެރޭގެ ކަންކަމާއި ދަރިންގެ ހުރިހާކަމެއްގައި އިތުރަށް ވަގުތު ހޭދަކުރުމާއި، ކަސްރަތު ޙަރަކާތްތައް އިންތިޒާމީ ގޮތެއްގައި ރާވައިގެން ކުރަން ފެށުމުން މަހެއްހާ ދުވަސްތެރޭގައި 75 ކިލޯއަށް ބަރުދަން ލުއިވެއްޖެއެވެ. އަދި 6 މަސްދުވަސް ތެރޭގައި 35 ކިލޯ ލުއިކޮށް ޓާގެޓް ކަމަށްވާ 50 ކިލޯއަށް ބަރުދަން ލުއިކުރިއެވެ.

ހަށިހެޔޮކަން އިޔާދަކުރުމަށް ކުރި މަސައްކަތް ފޮޓޯއިން:

ބަރުދަން 85 ކިލޯގައި:

ބަރުދަން 75 ކިލޯގައި:

ބަރުދަން 69 ކިލޯގައި:

ބަރުދަން 65 ކިލޯގައި:

ބަރުދަން 58 ކިލޯގައި:

ބަރުދަން 55 ކިލޯގައި:

ބަރުދަން 50 ކިލޯގައި:

ފާތުން އިތުރަށް ބުނިގޮތުގައި ފިޓްކޮށް ހުރުމަކީ ވަރަށް މުހިންމު ކަމެއް ކަމަށާއި، މިފަދަ ބޮޑު ބަދަލެއް ގެންނަން ދިރިއުޅުމުގެ އާދަތަކަށް ބޮޑެތި ބަދަލުތަކެއް ގެންނަން ޖެހުނުކަމަށެވެ. އެހެން ނަމަވެސް، ބައެއް މީހުން ނުކައި ތިބުމާއި ބޭސް ބޭނުންކޮށްގެން ހިކެން މަސައްކަތްކުރާ ވާހަކަ އަޑުއަހަމެވެ. އެއީ އެއްގޮތަކަށް ވެސް ރަނގަޅު ގޮތެއް ނޫންކަމަށެވެ. ފާތުން ކިޔައިދިން ގޮތުގައި ފުދޭވަރަކަށް ރަނގަޅަށް އަބަދުވެސް ކައިއުޅޭކަަމަށާއި، އެހެންނަަމަވެސް ބައެއް ކަހަލަ ޒަމާންވީ އާދަތައް ވެސް ދޫކޮށްލި ކަމަށެވެ. އެގޮތުން ޖެހޭ ކޮންމެ ވަގުތެއްގައި، ޖެހޭ ކޮންމެ އެއްޗެއް ކެއުމަކީ ހެދޭ ވަރަށް ބޮޑު ގޯހެއް ކަމަށާއި، އެކި ކަހަލަ ފިޒީ ބުއިންތަކާއި، ފެންސީ ކާނާތައް ކެއުމާ އެއްކޮށް ދުރުވާންޖެހޭ ކަމަށެވެ.

މިހާރު ފާތުން ބޭނުންވަނީ ފިޓްނަސްގެ ދާއިރާއިން ތަމްރީން ހޯދުންކަމަށާއި، އެއީ އެހެން މީހުންނަށް ހިތްވަރުދީ ދުޅަހެޔޮ މުޖުތަމަޢެއް ބިނާކުރުމުގައި ޙިއްސާ ވުމަށާއި، އަމިއްލަ ޙަޔާތުން ލިބުނު ފިލާވަޅުތައް އެހެން އަންހެން ކުދިންނަށް ބުނެދިނުމަށް ކަމަށެވެ.

ފާތުން ބުނިގޮތުގައި، ދިރިއުޅުމުގެ ޙަޔާތުގައި ކިތަންމެ ބޮޑުކަމެއް ދިމާވިޔަސް އެކަމުން އަރައިގަނެވޭނެ ކަމަށާއި، އެކަމަށް ބޭނުންވާނީ ގަދައަޅާ މަސައްކަތްކުރުމާއެކު ހެޔޮ ދުޢާކުރުން ކަމަށެވެ. ފާތުން ތަޙައްމަލުކުރި ކަންކަމުން އަރައިގަނެވި، އެނބުރި ވަޒީފާއަށް ވެސް ދާން ފެށިފައި ވީހިނދު، ކުރެވޭ އިހުސާސަކީ ޙަޔާތުގައި ކަންތައްތަކެއް ޙާޞިލުވެއްޖެކަމުގެ އުފާވެރިކަމެެވެ. އަދި ބަލިކުއްޖެއް ހުރުމަކީ ދެރަވާންޖެހޭކަމެއް ނޫންކަމަށާއި، އެއީ ވަރަށް ބޮޑު ނިޢުމަތެއް ކަމަށެވެ. ފާތުން ބުނިގޮތުގައި އެ ދަރިފުޅުގެ ގައިގާ ބައްދާލުމުން އަނެއް ދެކުދިންގެ ގައިގާ ބައްދާލުމުން ނުލިބޭހާ އުފާ ލިބޭ ކަމަށާއި، އެހާ ލޯބި ލޯބި ތިން ދަރިން ލިބިފައިވުމީ ވަރަށް ބޮޑު އުފަލެއް ކަމަށެވެ. ނިންމާލަމުން ހިނިތުންވުމާއެކު ބުނީ “ދިރިއުޅުމުގެ ޙަޔާތުގައި ކިތަންމެ ބޮޑުކަމެއް ކުރިމަތި ވިޔަސް، އުންމީދު އައުކޮށް ގަދައަޅާ މަސައްކަތްކުރޭ! ނަމާދުކޮށް ދުޢާކުރޭ! ފަޅި ސިކުންތުކޮޅެއްގެ ތެރޭގައި ވެސް ކަންކަން ބަދަލުވެގެން ހިނގައިދާނެ.” މިހެންނެވެ.