މުޙައްމަދު އިހުސާން އަކީ ފޯކައިދޫގެ ފުޓްބޯޅައަށް ނުހަނު ގިނަ ގުނަ ޚިދުމަތްތަކެއް ކޮށްދީފައިވާ އަދި މިހާރު ކުރަމުން ގެންދާ މޮޅު ގޯލްކީޕަރެކެވެ. ފޯކައިދޫ އެފްސީން ވިދާލި އިހުސާން އަކީ މިއަދު އަތޮޅާއި، ސަރަޙައްދުގެ އިތުރުން ރާއްޖޭގައި ވެސް ނަންހިނގާނެ ހުނަރުވެރި ގޯލްކީޕަރެކެވެ.
މިލައުތުރު ހޭންޑްބޯޅަ މުބާރާތުގައި ފޯކައިދޫ ހޭންޑްބޯޅަ ކުލަބުގެ ހެޑް ކޯޗަކީ ވެސް އިހުސާނެވެ. ހޭންޑްބޯޅަ އަކީ ފުޓްބޯޅަ އާއި މުޅިން ތަފާތު ކުޅިވަރަކަށް ވީ ނަމަވެސް އިހުސާންގެ ފަރާތުން ފެންނަމުންދާ ކުޅިވަރުގެ ރޫޙާއި، ވިސްނުމާ ރޭވުންތެރިކަމަކީ މިއަދު ފޯކައިދޫގެ ރައްޔިތުންގެ އިތުރުން ށ. އަތޮޅުގެ ހުރިހާ ރައްޔިތުން ވެސް ފާހަގަކުރާ ކަމެކެވެ.
އެއްވަނަ މިލައުތުރު ހޭންޑްބޯޅަ މުބާރާތުގައި ފޯކައިދޫއަށް މާބޮޑު ކާމިޔާބީއެއް ލިބިފައި ނުވި ނަމަވެސް، މިހާރު ކުރިއަށްދާ ދެވަނަ މިލައުތުރު ހޭންޑްބޯޅަ މުބާރާތުގައި ފޯކައިދޫ ކުޅުނު އެއްވެސް މެޗަކުން ބަލިނުވެ ވަނީ ފައިނަލަށް ދަތުރުކޮށްފައެވެ. ޒުވާން ކުޅުންތެރިންނާއެކު އިހުސާން ފެށި ދަތުރު ވަރަށް ވެސް ކާމިޔާބެވެ.
އިހުސާންގެ ހޭންޑްބޯޅަ ކޯޗިންގ ކެރިއަރާ ގުޅޭގޮތުން މިލައުތުރު އޮންލައިންގެ ފަރާތުން ސުވާލުކޮށްލުމުން ބުނީ ކުރިންވެސް ހޭންޑްބޯޅަ ކޯޗިންގެ ދާއިރާގައި މުހިންމު މަސައްކަތްތަކެއް ކުރެވިފައިވާ ކަމަށެވެ. އެގޮތުން ފޯކައިދޫ ކައުންސިލް މުބާރާތުގައި މަސައްކަތްކޮށްދިން ޓީމަށް މުބާރާތުގެ ޗެމްޕިއަންކަން ހޯދައިދެވިފައިވާ ކަމަށެވެ. އެހެން ނަމަވެސް އެއްވަނަ މިލައުތުރު ހޭންޑްބޯޅަ މުބާރާތުގައި އެކަށީގެންވާ ރަނގަޅު ކާމިޔާބީއެއް ނުލިބުމުން، މި މުބާރާތުގައި އެކަން ބަދަލުކޮށްލުމަށް އަޒުމް ކަނޑައެޅި ކަމަށެވެ.
ދެވަނަ މިލައުުތުރު ހޭންޑްބޯޅަ މުބާރާތުގައި ފޯކައިދޫ ޓީމް ގޮވައިގެން ނިކުތުމުގެ ކުރިން ހޭންޑްބޯޅަ ކޯޗިންގ ކޭމްޕެއް ފުރިހަމަކޮށް އިތުރު ތަމްރީނުތައް ވަނީ ހޯދާފައެވެ. ނަތީޖާއެއްގެ ގޮތުން އިހުސާން ކޯޗް ފާހަގަކުރެވެނީ މި މުބާރާތުގައި އެންމެ ކާމިޔާބު ކޯޗުގެ ގޮތުގައެވެ. އޭނާ އިތުރަށް ބުނީ ފައިނަލް މެޗް ކާމިޔާބުކުރުމަށްޓަކައި ޓީމް ތައްޔާރުވެފައިވާ ކަމަށާއި، ރަނގަޅު ރޭވުންތަކާ ވިސްނުންތަކެއް އެބައޮތްކަމަށެވެ. އެހެން ނަމަވެސް އެކަންކަމާ ގުޅޭ ތަފުޞީލުތައް ދެވެން ނެތްކަމަށެވެ.
