ސަރުކާރުގެ ދަނޑުވެރިކަމާބެހޭ ކުންފުނިކަމަށްވާ އެގްރޯ ނޭޝަނަލް ކޯޕަރޭޝަންގެ މެނޭޖަރ އަޙްމަދު ޝަރީފު ވަޒީފާއާ ބެހޭ ޤާނޫނާ ޚިލާފަށް ވަޒީފާއިން ވަކިކުރުމުން އޭނާގެ ޙައްޤު ހޯދުމަށްޓަކައި ފެށި މަސައްކަތުގެ އެންމެ ފަހުގެ މަރުޙަލާ ސިވިލް ކޯޓުގައި އޮތް ދުވަސް ވެގެންދިޔައީ އޭނާގެ ވެސް އެންމެ ފަހު ދުވަހަށެވެ. އިއްޔެގެ ހެނދުނުގެ ވަގުތެއްގައި ވަރަަށް ކުއްލިގޮތަކަށް ޝަރީފު ވަނީ ނިޔާވެފައެވެ.
ސިވިލް ކޯޓުން އިއްޔެ ކުރި ޙުކުމް
އިންސާފު ލަސްވުމަކީ ވެސް އިންސާފު ނުލިބުން ފަދަ ކަމެކެވެ. އިއްޔެގެ ހެނދުނުގެ ވަގުތެއްގައި ވަރަށް ކުއްލި ގޮތަކަށް ޝަރީފު ނިޔާވީ އޭނާއަށް ގެއްލިފައިވާ ޙައްޤު ނުލިބިއެވެ. އެހެން ނަމަވެސް އޭނާ ނިޔާވި ދުވަސް ވެގެންދިޔައީ އޭނާގެ ޙައްޤު އޭނާއަށް ނަގައިދީ އެންމެ ފަހުގެ ޙުކުމް ދިވެހިރާއްޖޭގެ ސިވިލް ކޯޓުން ކުރި ދުވަހެވެ.
މައްސަލަ ހިނގާފައިވާ ގޮތަށް ބަލާއިރު، ވަޒީފާއާބެހޭ ޤާނޫނާ ޚިލަފަށް އެގްރޯނެޓްގެ މެނޭޖަރުކަމުން އަޙްމަދު ޝަރީފު ވަކިކޮށްފައި ވަނީ އެއްވެސް ނޯޓިސްއެއް ވެސް ދިނުމަކާ ނުލާ ވަރަށް ކުއްލިގޮތަކަށެވެ. އެހެންކަމުން އޭނާއަށް ގެއްލިގެންދިޔަ ޙައްޤު ހޯދުމަށްޓަކައި އޭނާގެ ފަރާތުން ވަޒީފާއާވެހޭ ޓުރައިބިއުނަލަށް މައްސަލަ ހުށަހެޅިއެވެ. ވަޒީފާއާވެހޭ ޓުރައިބިއުނަލުން މައްސަލަ ބެލުމަށްފަހު، ވަޒީފާއިން ވަކިކުރި މުއްދަތުގައި ލިބެންޖެހޭ މުސާރަ އާއި އިނާޔަތްތަކާއެކު ވަޒީފާ އަނބުރާ ރުޖޫއަކުރުމަށް ޙުކުމް ކުރިއެވެ. އެގޮތަށް ޙުކުމް ކުރުމުން ވެސް އެގްރޯ ނޭޝަނަލް ކޯޕަރޭޝަނުން އޭނާއަށް ވަޒީފާ އަނބުރާ ދީފައެއް ނުވެއެވެ.
ވަޒީފާއާބެހޭ ޓުރައިބިއުނަލްގެ ޙުކުމާ އެއްގޮތަށް އެގްރޯ ނޭޝަނަލް ކޯޕަރޭޝަނުން ޢަމަލުކޮށްފައި ނުވާތީ، އަޙްމަދު ޝަރީފުގެ ފަރާތުން ސިވިލް ކޯޓަށް މައްސަލަ ހުށަހެޅިއެވެ. އަދި 8 އޮކްޓޯބަރު 2024 ވަނަ ދުވަހުގެ 12:00 ގެ ކުރިން ޓުރައިބިއުނަލްގެ ޙުކުމުގައިވާ ގޮތަށް އޭނާއަށް ލިބެންޖެހޭ ފައިސާ ދައްކާ ޚަލާސްްކުރުމަށް އެގްރޯ ނޭޝަނަލް ކޯޕަރޭޝަންގެ މައްޗަށް ޙުކުމްކޮށްފައި ވެއެވެ. އެހެން ނަމަވެސް ކޯޓުގެ ޙުކުމާ އެއްގޮތަށް އެގްރޯ ނޭޝަނަލް ކޯޕަރޭޝަނުން ޢަމަލުކޮށްފައެއް ނުވެއެވެ.
ސިވިލް ކޯޓުގެ ޙުކުމާ އެއްގޮތަށް އެގްރޯ ނޭޝަނަލް ކޯޕަރޭޝަނުން ޢަމަލުކޮށްފައި ނުވާތީ، އަޙްމަދު ޝަރީފުގެ ފަރާތުން 10 އޮކްޓޯބަރ 2024 ވަނަ ދުވަހުގެ ތާރީޚުގައި އެކަން ވަނީ ކޯޓަށް އަންގާފައެވެ. އަދި އެގްރޯ ނޭޝަނަލް ކޯޕަރޭޝަންގެ އެކައުންޓްތަކުގައި ހުރިތޯ ބަލައި، އެ އަދަދު ކޯޓަށް ނަގައިދެއްވައި، ޙުކުމް ތަންފީޒުކޮށްދެއްވުމަށް އެދިފައިވެއެވެ.
އަޙްމަދު ޝަރީފުގެ ފަރާތުން ހުށަހެޅި މައްސަލައާ ގުޅިގެން އެގްރޯ ނޭޝަނަލް ކޯޕަރޭޝަންގެ އެކައުންޓްތަކުގައި ހުރި ފައިސާ ކޯޓުން ހިފެހެއްޓުމަށް ފަހު، އޭނާއަށް ލިބެންޖެހޭ ޖުމްލަ ފައިސާ 536921.67 (ފަސްލައްކަ ތިރީސް ހަހާސް ނުވަސަތޭކަ އެކާވީސް ރުފިޔާ ފަސްދޮޅަސް ހަތްލާރި) ސިވިލް ކޯޓަށް ނަގާ ޙުކުމް ތަންފީޒުކޮށް ނިންމިކަމަށް ކަނޑައަޅައި އެމައްސަލަ ނިންމާފައިވަނީ އިއްޔެގައެވެ. ހަމަ އިއްޔެގައި އޭނާވެސް ވަނީ މި ފަނާވަނިވި ދުނިޔެއާ ވަކިވެގެންގޮސްފައެވެ. އާދޭހެވެ. އިންސާފު ލަސްވުމަކީ ވެސް އިންސާފު ނުލިބުން ފަދަ ކަމެކެވެ. މާތް ﷲ އެ މަރްޙޫމްގެ ފުރާނަފުޅަށް ހެޔޮ ރަޙްމަތް ލައްވައި، ސުވަރުގެ މިންވަރު ކޮށްދެއްވާށި އަދި އާއިލާއަށް ކެތްތެރިކަމާ ސާބިތުކަން ދެއްވާށި. އާމީން.
