މިލައުތުރު

ސަމާލުވޭ: ދިރާގުގެ ނަމުގައި ފޭސްބުކްގައި ހިންގާ ލެޕްޓޮޕް ސްކޭމް ވަރުގަދަކޮށް، އިތުރު ޕޭޖުތައް އުފައްދައިފި.

މިހާރަކަށް އައިސް ފޭސްބުކްގައި ހިންގާ ސްކޭމްތައް މިވަނީ ވަރަށް ބޮޑަށް އިތުރުވެފައެވެ. އެގޮތުން ރާއްޖޭގެ އެންމެ ބޮޑެތި އަދި އެންމެ އިތުބާރުކުރެވޭ ފަދަ ވިޔަފާރި ކުންފުނިތަކުގެ ނަމުގައި ވެސް އެފަދަ ސްކޭމްތަކެއް އެބަ ހިންގައެވެ.

މިހާރު ފެންނަ އެފަދަ ބައެއް ސްކޭމް ޕްރޮމޯޝަންތަކުގެ ތެރޭގައި ދިރާގުގެ ނަމުގައި ހިންގާ ލެޕްޓޮޕް ޕްރޮމޯޝަނަކާއި، ވެލާނާ އިންޓަނޭޝަނަލް އެއާޕޯޓުގެ ނަމުގައި ހިންގާ ދަބަސް ޕްރޮމޯޝަނެއް ފާހަގަކޮށްލެވެއެވެ. މިއީ އާންމުން ވަރަށް ބޮޑަށް ސަމާލުވާން ޖެހޭ ކަމެކެވެ. އެހެނީ މިފަދަ ކުންފުނިތަކުގެ ނަމުގައި ކޮށްފައި ހުންނަ ޕޯސްޓްތައް ރަނގަޅަށް ބަލައިނުލާ ބައިވެރިވެވިއްޖެ ނަމަ، އެމީހުންގެ މަޅީގައި ޖެހި ފައިސާތަކެއް ގެއްލި، އެކައުންޓް ކޮމްޕްރޮމައިޒް ވެދާނެއެވެ.

ދިރާގުގެ ނަމުގައި ހިންގާ ލެޕްޓޮޕް ޕްރޮމޯޝަން ސްކޭމް އެއްވަގުތެއްގައި އެތައް ޕޭޖެއްގައި ސްޕޮންސަރ ކޮށްފައި ވެއެވެ. އަދި މީހުންގެ އިތުބާރު ހޯދުމަށްޓަކައި، ވޮރަންޓީ ލިބޭނެކަމަށާއި، ޤާނޫނީ ގޮތުން އެއްވެސް މައްސަލައެއް ނެތްކަމަށާއި، ބޮޑު ޑިސްކައުންޓެއް ދެނީ ކަމަށާއި، ދެ އަހަރަަށް ވުރެ ގިނަ ދުވަސްވެފައިވާ ސްޓޮކް ހުސްކޮށްލަނީ ކަމަށް ލިޔެފައި ވެއެވެ. އަދި ދައްކަންޖެހޭނީ އެންމެ 29 ރުފިޔާ ކަމަށާއި، ސީދާ ގެއަށް ޑެލިވަރީ ކޮށްދޭނެ ކަަމަށެވެ. މިއީ ވަރަށް ފަސޭހައިން މީހުންގެ ހިތް ލަންބާލެވިދާނެ ފަދަ ކަންކަމެވެ.

މީގެ އިތުރުން ވެލާނާ އިންޓަނޭޝަނަލް އެއާޕޯޓްގެ ނަމުގައި ހިންގާ ދަބަސް ސްކޭމެއްގައި ބުނެފައިވަނީ ވެރިފަރާތުން ނުގެންގޮސް ގިނަ ދުވަސްވެފައިވާ ދަބަސްތައް ހުސްކޮށްލަން ހިންގާ ޕްރޮމޯޝަނެއް ކަމަށާއި، ބޭނުން ކޮންމެ ދަބަހެއް 32.32 ރުފިޔާއަށް ލިބޭނެ ކަމަށެވެ. ފޭސްބުކް ކޮމެންޓް ސެކްޝަނަށް ބަލައިލާއިރު، މި ޕްރޮމޯޝަންގައި ބައިވެރިވާން ހަދަންޖެހެނީ ކިހިނެތްތޯ ބައެއް ދިވެހީން ސުވާލުކޮށްފައި ވެއެވެ. އެހެން ކަމުން ބައެއް މީހުން މިހާރުވެސް މި މަޅީގައި ޖެހިފައި ވުމަކީ އެކަށީގެންވާ ކަމެކެވެ.

One Reply to “ސަމާލުވޭ: ދިރާގުގެ ނަމުގައި ފޭސްބުކްގައި ހިންގާ ލެޕްޓޮޕް ސްކޭމް ވަރުގަދަކޮށް، އިތުރު ޕޭޖުތައް އުފައްދައިފި.”

  1. gamAru

    dunie nukevigen ulhey moya kithamme dhivehinneh mimalheega jeheyne

މި ލިޔުމަށް 48 ގަޑިއިރު ހަމަވެފައި