މުރަކަ ދިރުވައި، ފަރުތައް އިޢާދަކުރަން ”ރީފްސީޑް“ ގެ ނަމުގައި ޕްރޮޖެކްޓެއް ފަށައިފި އެވެ.
މަސްވެރިކަމާ ބެހޭ ވުޒާރާގެ ދަށުން ހިންގަމުން އަންނަ މޯލްޑިވްސް މެރިން ރިސާޗް އިންސްޓިޓިއުޓުން ފެށި މި ޕްރޮޖެކްޓް ކުރިއަށް ގެންދަނީ އޮސްޓްރޭލިއާގެ އިންސްޓިޓިއުޓް ފޮ މެރިން ސައިންސްގެ އިތުރުން ކޮމަންވެލްތް ސައިންޓިފިކް އެންޑް އިންޑަސްޓްރިއަލް ރިސާޗް އޯގަނައިޒޭޝަނާ ގުޅިގެން ކުރިއަށްގެންނެވެ.
ތިން އަހަރު ދުވަހުގެ މި މަޝްރޫއު ރަސްމީކޮށް ފަށާފައި ވަނީ އިއްޔެއެވެ. މި ޕްރޮޖެކްޓަށް 1.5 މިލިއަން ޑޮލަރު ހޭދަވާއިރު މިކަމާ ބެހޭ ގޮތުން މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވީ މި ފަދަ މަޝްރޫޢެއް ފެށުމުގެ ބޭނުމަކީ މޫސުމަށް އަންނަ ބަދަލުތަކާއި ދުނިޔެ ހޫނުވުމުގެ ސަބަބުން ގާ ހުދުވުމާއި ފަރުތައް ނެތިދިއުމުގެ މައްސަލައިން އަރައިގަނެ ރާއްޖޭގެ ފަރުތައް އަލުން އިޢާދަކުރުން ކަމަށެވެ.
ވަޒީރު ވިދާޅުވީ އެކި ސަބަބުތަކާ ހުރެ މުރަކަ ނެތިގޮސް، ފަރުތައް ހަލާކުވުމުގެ މައްސަލަ އެންމެ ގިނައިން ދިމާވާ އެއް ޤައުމަކީ ރާއްޖެކަން ފާހަގަ ކުރެވޭ ކަމަށާއި އަލަށް ފެށި ޕްރޮޖެކްޓްގެ ސަބަބުން ޒަމާނީ ޓެކްނޮލޮޖީގެ އެހީގައި މުރަކަ ހައްދައި އާލާކުރެވި ފަރުތައް އިޢާދަކުރުމަށް ކުރެވޭ މަސައްކަތަށް އިތުރު ކުރިއެރުމެއް ލިބި، ރާއްޖޭގެ ފަރުތަކަށް ދިރުން ގެނެސްދޭނެ ކަމަށެވެ.
މުރަކަ ދިރުވައި އާލާކޮށް، ފަރުތައް އިޢާދަކުރުމުގެ މަސައްކަތަށް މި ސަރުކާރުން ޚާއްސަ ސަމާލު ކަމެއް ދޭނެ ކަން ފާހަގަ ކުރައްވަމުން ވަޒީރު ވިދާޅުވީ ”ރީފްސީޑް“ ގެ ދަށުން އޮސްޓްރޭލިޔާގެ މެރިން ސައިންސް އިންސްޓިޓިއުޓް އިން ދިވެހި ފަސް ޒުވާނަކު މި ދާއިރާ އިން ތަމްރީންކޮށްފައިވާ ކަމަށެވެ.
ފަރުތައް ހިމެނޭ ޚާއްސަ ޒޯންތަކެއް ކަނޑައަޅައި އެ ތަންތަން ހިމާޔަތްކުރުމުގެ މަސައްކަތް ވެސް މިހާރު ކުރެވެމުން އަންނަ ކަމަށް ވަޒީރު ވިދާޅުވިއެވެ.
މި މަޝްރޫޢުގައި ބޭނުންކުރާނީ ޒަމާނީ ޓެކްނޮލޮޖީއާއެކު މުރަކަ ދިރުވައި އާލާކުރުމަށް އޮސްޓްރޭލިޔާއިން ތައްޔާރުކޮށްފައިވާ ނިޒާމެކެވެ އެ ނިޒާމު ޤާއިމުކޮށްފައި ކ. މަނިޔަފުށީގަ އެވެ.
