މިލައުތުރު ފުޓްސަލް މުބާރާތުގައި މިއަދު ހަވީރު ކުޅުނު ކުއާޓަރ ފައިނަލް މެޗުގައި ކޮމަންޑޫ އާއި ބިލެތްފަހި ބައްދަލުކުރި މެޗު 3 – 2 ގެ ނަތީޖާއަކުން ކޮމަންޑޫ ކާމިޔާބު ކޮށް މުބާރާތުގެ ސެމީ ފައިނަލަށް ދަތުރުކޮށްފިއެވެ.
އާދަޔާ ޚިލާފަށް ފޯރި ގަދަ ކުޅުމެއް ފެނިގެންދިޔަ މި ކުއާޓަރ ފައިނަލް މެޗުގައި ފުރަތަމަ ގޯލެއް ކާމިޔާބުކުރީ ކޮމަންޑޫ އެވެ. މެޗު ފެށުނުތާ 30 ސިކުންތުގެ ތެރޭގައި ކޮމަންޑޫ ކާމިޔާބުކުރި ގޯލަކީ މި މުބާރާތުގައި އެންމެ އަވަހަށް ޓީމަކުން ކާމިޔާބުކުރި ގޯލެވެ. ފުރަތަމަ ހާފުގައި ބިލެތްފަހި ވެސް ނުރައްކާތެރި ގިނަ ހަމަލާތަކެއް ކޮމަންޑޫ ގޯލަން ފޮނުވާލިއެވެ. އެހެން ނަމަވެސް ކޮމަންޑޫގެ ކުޅަދާނަ ގޯލްކީޕަރު ހަމަލާތައް ވަނީ ސޭވް ކޮށްފައެވެ.
ކޮމަންޑޫ ޓީމް އިތުރު ގޯލެއް ކާމިޔާބުކޮށް ނަތީޖާ 2 – 0 އަށް ތަފާތު ފުޅާކޮށްފައިވަނިކޮށް ބިލެތްފަހީގެ ފުރަތަމަ ގޯލު ކާމިޔާބުކޮށް ތަފާތު ކުޑަ ކޮށްލިއެވެ. އަދި ފަހު ހާފުގައި ބިލެތްފަހިން އިތުރު ގޯލެއް ކާމިޔާބުކޮށް ނަތީޖާ ހަމަހަމަ ވެސް ކޮށްލި އެވެ. އެހެން ނަމަވެސް ބިލެތްފަހިން ގޯލެއް ކާމިޔާބުކުރިތާ ކުޑަ އިރުކޮޅެއްގެ ތެރޭގައި ކޮމަންޑޫ އަނެއްކާ ގޯލެއް ކާމިޔާބުކޮށް މެޗުގެ ލީޑު ނެގިއެވެ.
މެޗުގެ އެންމެ ފަހު މިނެޓްކޮޅުގެ ތެރޭގައި ބިލެތްފަހިން ގޯލެއް ކާމިޔާބު ކުރެވޭތޯ ވަރަށް މަސައްކަތް ކުރިނަމަވެސް ފުރިހަމަ ވަގުތު ހަމަވިއިރު ކުރީގައި އޮތީ ކޮމަންޑޫ އެވެ. މި މެޗުގެ މޮޅު ކުޅުންތެރިޔަކީ ކޮމަންޑޫގެ ޖޯޒީ ނަންބަރު 14 ރުބެން އެވެ. މި މެޗުން މޮޅުވުމާއެކު ކޮމަންޑޫ ސެމީ ފައިނަލަށް ދަތުރުކުރީއެވެ. އަދި ބިލެތްފަހި މުބާރާތުން ކެޓީއެވެ.
ކިޔުންތެރިންގެ ހިޔާލު