އަަންހެން ކުއްޖަކު ރަހީނުކޮށް ކަރުގައި ވަޅި ޖައްސާ ފުލުހުންނަށް ފިލަން އުޅުނު މީހަކު ވަނީ ހައްޔަރު ކޮށްފައެވެ. އަންހެން ކުއްޖާ ސަލާމަތް ކުރުމަށް ފުލުހުން ހިންގި އޮޕަރޭޝަންގައި އެކުއްޖާ ސަލާމަތްކުރީ ބާރުގެ ބޭނުން ކޮށްގެންނެވެ.
އަންހެން މީހާއަށް ގެއެއްގެ ތެރޭގައި ފިރިހެނަކު އަނިޔާކޮށް، މަގުމައްޗަށް ނެރުމަށް ފަހު ވެސް އަނިޔާކޮށް، ސައިކަލަށް ގަދަކަމުން އެރުވުމަށް ފަހި ކަރުގައި ވަޅި ޖައްސައިގެން ފިލަން މަސައްކަތް ކޮށްފައި ވެއެވެ. އަދި ފުލުހުން އެ އަންހެން މީހާ ސަލާމަތް ކުރަން އުޅެފިނަމަ އެމީހާ މަރާލާނެކަމަށް ބުނެ ފުލުހުންނަށް އިންޒާރުދީފައި ވެއެވެ.
އަންހެން ކުއްޖާގެ ފުރާނަ ސަލާމަތް ކުރުމަށް ފުލުހުން ކުރެއްވި މަސައްކަތަށް އާންމުންގެ ޝުކުރާ ތަޢުރީފު ލިބިފައި ވެއެވެ. ފުލުހުން ބާރުގެ ބޭނުން ކުރުމުގެ ސަބަބުން އެ ފިރިހެންމީހާއަށް އަނިޔާވެފައިވާތީ އޭޑީކޭގައި އޭނާއަށް ފަރުވާ ދެމުންދާ ކަމަށް ވަނި ބުނެފައެވެ. އަދި އެ އަންހެންމީހާއަށް އައިޖީއެމްއެޗްގައި ފަރުވާ ދެމުން ގެންދާކަމަށް ފުލުހުން ވަނީ ބުނެފައެވެ. އަދި މި މައްސަލައިގައި ފުލުހުން އިތުރަށް ތަހުގީގުކުރަކުން ގެންދާކަމަށް ވަނީ ބުނެފައެވެ.
ރައްޔިތުންގެ މަޖިލިސްގެ ޢިއްޒަތްތެރި މެންބަރު އަޙްމަދު އަޒާން ކުރެއްވި ޕޯސްޓެއްގައި ވިދާޅުވެފައި ވަނީ ރޭގައި މާލޭގައި އަންހެނަކު ރަހީނުކޮށް މަރާލަން އުޅުނު އާދަމް އަތުހަރަކީ 2022 ވަނަ އަހަރު ރައީސް އިބްރާހީމް މުހައްމަދު ސޯލިހުގެ އަމުރަށް ޖަލުން މިނިވަން ކޮށްފައިވާ މީހެއް ކަމަށް ވެއެވެ. މިފަދަ ނުރައްކާތެރި އެތައް ބަޔަކަށް ރައީސް ސޯލިހް ވަނީ އަދަބު ލުއިކޮށްދީ މިނިވަންކޮށްފައި ވާކަމަށާއި، ރައީސް ޑރ.މުއިއްޒުގެ ސަރުކާރުން މިފަދަ ފަރާތްތަކާއި މެދު އަޅަންޖެހޭ ފިޔަވަޅުތައް އަޅާ ރާއްޖެއަކީ އަމާންކަމާއި އުފާވެރިކަމާއިއެކު އުޅެވޭނެ ތަނަކަށް ހައްދަވާނެ ކަމަށެވެ.
އަންހެން ކުއްޖާ މަރާލަން އުޅުނު އަހުތަރަކީ މިލަންދޫ ދާއިރާގެ ކުރީގެ މެންބަރު ޢަލީ ރިޒާގެ ކޮއްކޮއެއް ކަމަށް މަޢުލޫމާތު ލިބެއެވެ. އޭނާ އަކީ ޖަލުބަންދުގައި ހުއްޓާ މިދިޔަ ރިޔާސީ އިންތިޚާބުގެ ކެމްޕެއިން ތެރޭގައި މިނިވަންކޮށް ށ. ފުނަދޫ ފެނަކަ ބްރާންޗްގެ ސުޕަވައިޒަރުކަން ދީފައި ހުރި މީހެއް ކަމަށް ވެސް މަޢުލޫމާތު ލިބެއެވެ. އޭނާ މާލެ އައިސްގެން އުޅެނީ ޗުއްޓީއެއްގައި ކަމެއް، ވަޒީފާއިން ވަކިވެގެން ކަމެއް ސާފުވާގޮތެއް ވަނީ ނުވެފައެވެ.
