ފޯކައިދޫގައި ކުރިއަށްދާ މީ އޭ މައިލޯ ފުޓްސަލް ޓޯނަމަންޓް 2024 ގެ ގްރޫޕް އޭ ގައި މިއަދު ބައްދަލުކުރީ ވައިޓް ރައިޑާސް އަދި ފަހި އެފްސީއެވެ. މިއަދު ހަވީރު ފޯކައިދޫ ރަސްމީ ފުޓް ބޯޅަ ދަނޑުގައި ކުރިއަށް ދިޔަ މިމެޗު ވައިޓް ރައިޑާސް ޓީމުން ކާމިޔާބުކޮށްފައިވަނީ 3-7 ލަނޑުންނެވެ.
މިއަދު މެޗަށް ފަހި އެފްސީ ނުކުއިން އިރު ސެމީ ފައިނަލުގެ ޖާގަ ފަހި އެފްސީއަށް ލިބެން އަންނަނީ ވައިޓް ރައިޑާސް ކޮޅަށް ވަރަށް ގިނަ ގޯލުތަކެއް ޖަހައިގެންނެވެ. މެޗުގެ ކުރިން ސުވާލު ކޮށްލުމުން ފަހި އެފްސީގެ ކީޕަރ އަހްމަދު އަލޫފް ބުނިގޮތުގައި މިއަދުގެ މެޗުން 3 ޕޮއެންޓު ހޯދަން މަސައްކަތް ކުރާނެކަމަށާއި ތަފާތު ބޮޑު ނަތީޖާއެއް ވައިޓް ރައިޑާސް ކަހަލަ ވަރުގަދަ ޓީމެއް ކައިރިން ހޯދުމަކީ ފަސޭހަކަމެއް ނޫންކަމަށާއި ނަމަވެސް ފަހު ވަގުތާ ހަމަޔަށް ވެސް ފަހި އެފްސީ މަސައްކަތް ކުރާނެއެވެ.
މި މެޗުގެ މޮޅު ކުޅުންތެރިއަކީ ވައިޓް ރައިޑާސްގެ ޖާޒީ ނަންބަރ 7 މުހައްމަދު ރިޝްވާންއެވެ. ގްރޫޕް ސްޓޭޖުގައި ވައިޓް ރައިޑާސް ކުޅުނު ތިން މެޗުގެ މޮޅު ކުޅުންތެރިއަކީ ވެސް ރިޝްވާންއެވެ. މެޗުގެ ކުރިން ސުވާލު ކޮށްލުމުން ވައިޓް ރައިޑާސް ގެ ޖާޒީ ނަންބަރ 21 ސެންޓޭ ބުނިގޮތުގައި، ބޭނުންވަނީ ގްރޫޕުގެ އެއްވަނަ ޓީމުގެ ގޮތުގައި ސެމީއަށްދާށެ. އަދި އެއްވެސް މެޗަކުން ބަލިނުވެ މުބާރާތް ކާމިޔާބުކުރުމަކީ އެންމެ ބޭނުންވާ ގޮތް ކަމަށް ސެންޓޭ ބުންޏެވެ. މިއަދުގެ މެޗު ކާމިޔާބު ކުރުމާއެކު ވައިޓް ރައިޑާސް ސެމީ ފައިނަލުގައި ބައްދަލުކުރަން ޖެހޭނީ ގްރޫޕް ބީ ގެ ދެވަނަ ޓީމާއެވެ. ގްރޫޕް ބީގެ ދެވަނަ ޓީމަކީ ކޭޑީ ޕާކެވެ.
މި މުބާރާތުގެ ސެމީ ފައިނަލް 28 ސެޕްޓެމްބަރ 2024 ވާ ހޮނިހިރު ދުވަހުގެ ހަވީރު 16:00 ކުރިއަށް ގެންދާ ގޮތަށް ވަނީ ހަމަޖެހިފައެވެ. އެގޮތުން ސެމީ ފައިނަލްގެ ފުރަތަމަ މެޗުގައި ބައްދަލުކުރާނީ ވައިޓް ރައިޑާސް އަދި ކޭޑީ ޕާކެވެ. ދެވަނަ މެޗުގައި ބައްދަލުކުރާނީ އަލަސްކާ ސްޕޯޓްސް އަދި ޑީ.އެމް.ޓީއެވެ. މި މެޗު ވެސް މީ އޭ މައިލޯ ފޭސްބުކް ޕޭޖުން ލައިވްކުރާނެއެވެ.
