އިދިކޮޅު އެމްޑީޕީގެ “ލާމަރުކަޒީ ގުޅުން” ކޮންފަރެންސް ހދ. ކުޅުދުއްފުށީގައި މިއަދު ހެނދުނު ފެށިއްޖެއެވެ. މިކޮންފަރެންސްގައި ކުރީގެ ރައީސް އިބްރާހީމް މުޙައްމަދު ޞާލިޙް އާއި، ޕާޓީގެ ރައީސް ޢަބްދު ﷲ ޝާހިދު އާއި، ޗެއާޕާސަން ފައްޔާޒް އިސްމާޢީލްގެ އިތުރުން ޤައުމީ މަޖިލިސްގެ މެންބަރުންނާއި، އެމްޑީޕީއަށް ނިސްބަތްވާ ގިނަ އަދަދެއްގެ ކައުންސިލަރުން ބައިވެރިވެފައި ވެއެވެ.
ރައީސް އިބޫގެ ވާހަކަފުޅުގައި މި ސަރުކާރަށް ވަރަށް ބޮޑަށް ފާޑުކިޔުއްވަމުން ވިދާޅުވީ އަނެއްކާ ވެސް “އެޓޯލްސް މިނިސްޓްރީއެއް” އުފައްދައިގެން ކައުންސިލްތަކުގެ ހުރިހާ ބާރުތައް ސަރުކާރަށް ޖަމާކުރަމުން ގެންދާ ކަމަށެވެ. ރައީސް އިބޫ އެ އިޝާރާތް ކުރެއްވީ މިސަރުކާރުގައި އުފައްދާފައިވާ ސިޓީސް އެންޑް ލޯކަލް ގަވަމަންޓް މިނިސްޓްރީއަށެވެ.
ބާރުތައް ސަރުކާރަށް ނަގައިގެން މުއައްސަސާތަކުގައި ހަންމުށި އެޅުމަކީ އެމްޑީޕީން އެއްއިރަކު ވެސް ގަބޫލުކުރި ކަމަކަށް ނުވިޔަކަސް ޕީޕީއެމް/ޕީއެންސީން ވެރިކަމަށް އަންނަ ކޮންމެ ފަހަރަކު މި ނިޒާމު ފުނޑާލައި ރައްޔިތުންގެ ބާރު ކަނޑުވާލަން މަސައްކަތްކުރާ ކަމަށެވެ.
ރައީސް އިބޫ އިތުރަށް ވިދާޅުވީ “ވެރިކަމުގައި ތިބީ ރައްޔިތުން ދައްކާ ވާހަކަ ގަބޫލުކުރާ ބައެއް ނޫން،” ކަމަށާއި، ޚުދުމުޚުތާރުކަން އިންތިހާއަށް އިތުރުވެއްޖެ ކަމަށެވެ. އަދި ރައްޔިތުންގެ ބާރުތައް އަތުލައި، ތަރައްޤީގެ އެއްވެސް ކަމެއް ނުކޮށް ތިބުމާއި، އިންތިހާއަށް އިސްރާފު ބޮޑުކޮށް ސަރުކާރު ހިންގަމުން ދާނަމަ ރައްޔިތުން ވެރިކަމާ ދެކޮޅަށް ނިކުންނާނެ ކަމަށާއި، މިސްރާބު ފެންނަނީ އެދިމާލަށް ދާތަންކަމަށެވެ. އަދި މިއީ އެންމެ އަވަހަށް ރައްޔިތުންގެ އިތުބާރު ގެއްލުނު ސަރުކާރަށްވެ ނިމިއްޖެ ކަމަށެވެ.
