މިލައުތުރު ހޭންޑުބޯޅަ މުބާރާތް ފެށުމުގެ ރަސްމިއްޔާތަށް ކުރީގެ ނައިބު ރައީސް ފައިސަލް ނަސީމް މާދަމާ ފޯކައިދޫއަށް ވަޑައިގަންނަވާ ގޮތަށް ވަނީ ހަމަޖެހިފައެވެ. އެމަނިކުފާނު ވަޑައިގަންނަވާ ގޮތަށް ހަމަޖެހިފައި ވަނީ މާދަމާ ހެނދުނު 11:00 ގައި ކަމަށް މަޢުލޫމާތު ލިބެއެވެ.
ށ. އަތޮޅުގައި ބޭއްވޭ އެންމެ ބޮޑު ހޭންޑުބޯޅަ މުބާރާތް މިއަހަރު ހޯސްޓުކުރަނީ ކޮމަންޑޫ އާއި ފޯކައިދޫގައެވެ. އެގޮތުން ދެކުނު ބިތުގެ ރަށްތަކުގެ މެޗުތައް ކުޅުމަށް ހަމަޖެހިފައި ވަނީ ކޮމަންޑޫގައެވެ. ހަވާ އެރުވުމާއެކު ކުލަގަދަ އެތައް ކުޅިވަރު އައިޓަމްތަކާއެކު ރަސްމީކޮށް މުބާރާތް ހުޅުވުމުގެ ރަސްމިއްޔާތު އެރަށުގައި ވަނީ ބާއްވާފައެވެ.
އަދި ހުޅަނގު ބިތުގެ ރަށްތަކުގެ މެޗުތައް ކުޅުމަށް ހަމަޖެހިފައި ވަނީ ފޯކައިދޫގައެވެ. އަދި މުބާރާތުގެ ފައިނަލް މެޗާ އިނާމު ދިނުމުގެ ޙަފުލާ ވެސް އޮންނާނީ ފޯކައިދޫގައި ކަމަށް މަޢުލޫމާތު ލިބެއެވެ. އަދި މި މުބާރާތުގައި ޖުމްލަ 12 ޓީމެއް ވާދަކުރެއެވެ.
