ރައީސް ޑރ. މުޙައްމަދު މުޢިއްޒުގެ ސަރުކާރަށް މިއަދު އަހަރެއް ފުރޭއިރު، އަމިއްލަފުޅު ޕާޓީގެ މެންބަރުން ވެސް ތިބީ ބޯހިޔާވަހިކަމެއް ނުލިބި މަގުމަތިވެފައެވެ. އަދި ހައުސިންގ މިނިސްޓްރީ ދޮށުގައި މުޒާހަރާގައެވެ.
މިހާތަނަށް ސަރުކާރުން ވީ ވަޢުދުތަކުގެ ތެރެއިން އެއްވެސް ވަޢުދެއް ފުއްދިފައެއް ނުވެއެވެ. މުޅިންވެސް ފެނުނީ ކުރިން ހުޅުވާފައި ހުރި ތަންތަން އަލުން ހުޅުވާ މަންޒަރުތަކެވެ. އެގޮތުން ދަރުމަވަންތަ ހޮސްޕިޓަލާއި، ހުޅުމާލޭ ހޮސްޕިޓަލު ވަނީ އަލުން ރަސްމީކޮށް ހުޅުވާފައެވެ.
މާލޭގެ މޫނުމަތި ރީތިކުރުމުގެ ގޮތުން ހަދާފައިވާ ރަސްމީ ފާލަން ރޫޅާލާފައި އޮންނަތާ ވެސް މިއަދަށް އަހަރެއް ފުރުނީއެވެ. އަދި އެތަނުން ކުލައެއް މަންޒަރެއް ވަކިވާވަރުގެ މަސައްކަތެއް ހިނގާފައެއް ނެތެވެ. އެއްވެސް ރަށެއްގައި އެއްވެސް މަޝްރޫޢެއް އަމުދުން ކުރެވިފައެއް ނެތެވެ.
ގިނަ ބަޔަކު ދެކޭގޮތުގައި މިއަށް ވުރެ އަވަހަށް ރައްޔިތުން މާޔޫސްކޮށްލި ސަރުކާރެއް ދިވެހި ތާރީޚުގައި ވެސް ދެކެފައެއް ނުވެއެވެ. އެހެންކަމުން މިސަރުކާރުގެ އެއް އަހަރުގެ މަސައްކަތުގެ ފެންވަރަށް ދެވޭނީ ޑީ ރިޕޯޓެކެވެ.
އެއްވެސް ހަރުދަނާ ސިޔާސަތެއް ތަންފީޒުކުރެވިފައި ނެތްތާ ރައްޔިތުންނަށް ޖެއްސީ ދަތި އުނދަގޫތަކެވެ. އިތުރުވީ ޓެކުސްތަކާއި ޖޫރިިމަނާތަކެވެ. ކުރިން ލިބެމުންދިޔަ ސަބުސިޑީތަކާއި އާސަންދަ އާއި، އުމުރުން ދުވަސްވީ މީހުންނަށް ދޭ ފައިސާގެ އިނާޔަތް ވެސް ވަނީ ހަނިކޮށްފައެވެ.
