އދ. އަކީ ކޮން މަޤުޞަދެއްގައި އުފެދުނު ޖަމާޢަތެއްކަން އެއްވެސް މީހަކަށް އޮޅިފައި ނުވާނެއެވެ. އެޖަމާޢަތް އުފެއްދި ބަޔަކު ބުނަނީ އެއީ ބައިނަލްއަޤްވާމީ ސުލްޙަ އާއި ސަލާމަތްތެރިކަން ކަށަވަރުކޮށް، ދެމެހެއްޓުމަށްޓަކައި އުފެއްދި ޖަމްޢިއްޔާއެއް ކަމަށެވެ. ނަމަވެސް ފެންނަ މަންޒަރަކީ އެ ޖަމްޢިއްޔާގެ މިދެންނެވި އަސާސީ މަޤްޞަދުތައް ޙާޞިލުނުކުރެވި، ތަފާތު މައްސަލަތައް ހައްލުކުރުމަށް ނުކުޅެދުމުގެ ސަބަބުން އެޖަމާޢަތްވަނީ ބަލިކަށިވެފައިވާ މަންޒަރެވެ. އަދި މިކަމާ އެޖަމާޢަތަށް ފާޑުކިޔުން އަމާޒުވެ ޖަމްޢިއްޔާގެ މުހިންމުކަމާއި ހަރުދަނާކަމާމެދު ވަނީ ސުވާލު އުފެދިފައިވާ ތަނެވެ. ވަކިން ޚާއްޞަ ގޮތެއްގައި ޒަޔަނިސްޓުން ފަލަޞްޠީނުގެ ޣައްޒާގައި ހިންގަމުންދާ ޤަތުލުޢާންމާއި ، ސޫދާނާއި ޔުކްރޭންގައި ހިނގަމުންދާ ހަނގުރާމައިގައި ފެންނަމުންދާ ލާއިންސާނީ ޢަމަލުތަކާއި ދުނިޔޭގެ އެހެނިހެން ކަންކޮޅުތަކުގައި ތަފާތު ސިފަސިފައިގައި ހިންގާ އަނިޔާވެރި ޢަމަލުތައް ހުއްޓުވުމަށް އެޖަމާޢަތަށް ހަރުދަނާ އެއްވެސް މަސައްކަތްތަކެއް ނުކުރެވޭ މަންޒަރެވެ.
ފަލަސްޠީނުގެ ކަންކަމާގުޅޭ އދ. ގެ ސްޕްޝަލް ރެޕޮޓަރ ފްރަންޗެސްކާ އަލްބަނީޒް ވަނީ މިފާއިތުވި އޮކްޓޯބަރު މަހުގެ ފަހުކޮޅު އދ. ގެ ސަލާމަތީ މަޖިލީހުގައި ދެއްކެވި ވާހަކަފުޅެއްގައި، ފަލަސްޠީނު ރައްޔިތުންގެ އިންސާނީ އަސާސީ އެތަށް ޙައްޤުތަކެއް ރައްކާތެރިކުރުމުގައި ބައިނަލްއަޤްވާމީ މުޖުތަމަޢު ނާކާމިޔާބުވެފައިވާކަމަށް ތުހުމަތު ކުރައްވާފައެވެ. އެކަމަނާ މިމޭރުމުން ވާހަކަފުޅު ދައްކަވަމުން، އިސްރާއީލުން ޣައްޒާގައި ހިންގަމުންދާ ޢަމަލުތަކަކީ ރޭވިގެން ނަސްލެއް ނައްތާލުމަށްޓަކައި ހިންގަމުންދާ ޢަމަލުތަކެއްކަމަށް ސިފަކުރައްވާފައެވެ. އަދި ޢައްޒާގެ ރައްޔިތުންގެ ޙައްޤުގައި އދ. އިން ހަރުދަނާ ފިޔަވަޅުތައް ނޭޅުމުގެ ސަބަބުން ބައިނަލް އަޤްވާމީ ދުނިޔޭގައި އދ. ލިބިފައިވާ ދައުރާއި އަހަންމިއްޔަތުކަން މުޅިން ގެއްލިގެން ހިނގައިދާނެކަމަށް އިންޒާރުދެއްވާފައެވެ.
އދ. އާމެދު ނާއުންމީދުވެގެން އަލްބަނީޒް ދެއްކެވި މި ވާހަކަތަކަކީ، ހަމައެކަނި އެކަމަނާގެ ފަރުދީ ވިސްނުންފުޅެއް ނޫނެވެ. މިއީ އދ. އާ މެދު ހިތްހަމަނުޖެހިގެން އެޖަމާޢަތުގެ އޮފިޝަލެއް މިފަދަ ނާއުންމީދީ ވާހަކަތަކެއް ދެއްކެވި ފުރަތަމަ ފަހަރެއްވެސް ނޫނެވެ. ޚުދު އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވެސް ވަނީ އދ. ގެ ސަލާމަތީ މަޖިލީހަށް ފާޑުވިދާޅުވެ، އެ ކައުންސިލަކީ “ޒަމާނާ ނުގުޅޭ”، “އިންސާފުވެރިނޫން” އަދި “ނުކުޅެދޭ” ތަނެއްކަމަށް ސިފަކުރައްވާފައެވެ. ގުޓަރޭސް ވިދާޅުވިގޮތުގައި ދޭދޭ ގައުމުތައް މަސަލަސްކޮށް، ދުނިޔޭގައި ހަމަޖެހުން ޤާއިމުކުރުމުގައި ސަލާމަތީ މަޖިލީސް ނާކާމިޔާބުވި މައިގަނޑު ސަބަބަކީ ދުނިޔޭގެ ބާރުގަދަ އަދި އަމިއްލަ މަޞްލަޙަތަށް އިސްކަންދޭ ޤައުމުތަކެއްގެ ނުފޫޒު އެކަށީގެންނުވާ މިންވަރަށް އދ. ގެ މައްޗަށް ފޯރާފައި އޮތުމުން ކަމަށްވެސް ވިދާޅުވެފައެވެ.
ހުޅަނގުގެ ބައެއް ގައުމުތަކުންނާއި އިންސާނީ ހައްޤުތަކަށް މަސައްކަތްކުރާ ނުފޫޒުގަދަ ޖަމްޢިއްޔާތަކުންވެސް ދެކޭގޮތުގައި އދ. މިހާރު އޮތީ އޭގެ އަސްލު ބޭނުންކެނޑިފައެވެ. އަދި ކުރިމަގުގައި އެޖަމާޢަތް ދެމިއޮތުމަށްޓަކައި ހަރުދަނާ ބޮޑެތި އިޞްލާޙުތަކަކަށް ބޭނުންވެފައެވެ. މިފަދަ ވިސްނުންތައް ހަގީގަތުގައި ގުޅިފައިވަނީ އދ. ހިންގުމުގައި ވާޤިޢީގޮތުން ފެންނާން އޮތް ހަގީގަތްތުގެ މައްޗަށެވެ. ހަގީގަތަކީ ކޮބައިތޯއެވެ؟ އދ. އުފެއްދި ހަގީގީ މަޤްޞަދަކީ ‘ބައިނަލްއަޤްވާމީ ސުލްޙަ އާއި ސަލާމަތްތެރިކަން ކަށަވަރުކޮށް ދެމެހެއްޓުމާއި، އިންސާނީ ދުޅަހެޔޮކަން ކުރިއެރުވުމާއި، އަދި މި ކަންކަމަށްޓަކައި ބައިނަލްއަޤްވާމީ އެއްބާރުލުން ދިނުން’ އެވެ. ހަގީގަތުގައި، މި މަޤުޞަދުތަކުގެ ތެރެއިން އ.ދ އަށް ޙާޞިލުވީ ވަރަށް ކުޑަ މިންވަރެކެވެ. އދ. އޮތީ ވަކިބަޔެއްގެ މުށުތެރޭގައެވެ. ހިންގުމުގައި އެޖަމާޢަތުގެ މެންބަރުންގެ މެދުގައި އޮތީ ވަޒަން ހަމަނުވާ ބީދައިން ބެހިފައިވާ ބާރުތަކެކެވެ. ފެންނަނީ ތަހުޒީބު ކަމާއެކީ މަޑުމަޑުން ތިބެ، ބޮޑުއެތި ކުޑައެތި ކެޔުން ހުއްދާކުރާ ޖަންގަލީގެ ނިޒާމު ތަންފީޛުކުރާ މަންޒަރެވެ.
ސެކްރެޓަރީ ޖެނެރަލް އެންޓޯނިއޯ ގްޓަރޭސް އާއި ސްޕެޝަލް ރެޕޮޓަރ އަލްބަނީޒް ދެއްކެވީ ހަގީގީ ވާހަކަތަކެކެވެ. އދ. ގެ ބާރާއި ހަންފެތުރުން ދުނިޔޭގައި މަޑުޖެހިދާނެކަމުގެ ބިރު އެބައޮތެވެ. ސަބަބަކީ ދުނިޔޭގެ ދެކުނު ބިތުގެ ގިނަ ގައުމުތަކެއް އެއްބައިވެ، ސިޔާސީ އަދި އިޤްތިޞާދީ ވަކި އަމާޒުތަކަކަށް ވާޞިލުވުމަށްޓަކައި މަސައްކަތްކުރަން ފެއްޓުމެވެ. ނަތީޖާއަކަށް ވާނީ، އދ. ގެ ބަދަލުގައި އެހެން ބާރެއް ވުޖޫދަށް އައުމެވެ. ނުވަތަ އދ. އަށް މާނަވީ ބަދަލުތަކެއް ގެނައުމަށް އެކިޔާ “ބޮޑުން” ގެ ގައުމުތަކަށް މަޖުބޫރުވުމެވެ. އެއްވެސް ޝައްކެއްނެތި، މިދެކަމުން ކޮންމެވެސް އެއް ކަމެއް ހިނގާނެއެވެ. ދަންނަވަން މިއުޅޭ ވާހަކައަކީ ދުނިޔޭގެ ސިޔާސީ އަދި އިޤްތިޞާދީ ބާރުވެރިކަން ކަނޑައެޅިފައިވާ ނިޒާމު ބަދަލުވާނެ ވާހަކައެވެ. އެފަދަ ކަންކަން ލޯކުރިމަތިން ފެންނާން ފެށުމުން އެކަމާ ބިރު ހީވާ ބަޔަކު އެވާހަކަތައް ދައްކާނެއެވެ. އެއީ މައްސަލައެއްވެސް ނޫނެވެ.
ނަމަވެސް، ހައިރާންވާންޖެހޭ ކަމަކީ، އިސްލާމީ ގައުމުތަކުން ޖޯކަރުންތަކެއްހެން ފަލަޞްޠީނާއި އިސްލާމީ ގައުމުތަކަށް ކުރިމަތިވެފައިވާ މައްސަލަތައް ހައްލު ހޯދައިދޭނެ ކަމަށް ދެކިގެން ބަކަރި އައިނެއްހެން އދ. ގެ ކިބަޅި ފަރާތުގައި ސަފުހަދައިގެން ތިބޭ ތިބުމެވެ. ކައިރި މުސްތަޤްބަލެއްގައި ނުވަތަ ދުރުމުސްތަޤްބަލެއްގައިވިޔަސް ދުނިޔޭގެ ނިޒާމަށް ކޮންމެ ބަދަލެއް އަޔަސް، އިސްލާމީ ގައުމުތަކުން މިއުޅެނީ، އަދިވެސް ކޮންމެވެސް ބައެއްގެ ފަހަތަށް އަރަންވެގެންނެވެ. އިސްލާމީ އުޞޫލުތަކާ މުސްލިމުންގެ މަޞްލަޙަތުގައި މަސައްކަތްކުރާ ތަނެއް މުސްލިމް ގައުމުތަކުން ނުފެނެއެވެ.
