މިއަދު އޮތް ޕީއެންސީ އެތެރޭގެ އިންތިޚާބު ކާމިޔާބުކޮށް ޕީއެންސީ ކޮމަންޑޫ ދާއިރާގެ ނައިބު ރައީސްކަން ފޯކައިދޫ އަޙްމަދު ރިޟުވާން (ލަރޭ) ކާމިޔާބުކޮށްފިއެވެ.

ލަރޭ އިންތިޚާބު ކާމިޔާބުކުރީ ޑެޕިއުޓީ މިނިސްޓަރ އިބްރާހީމް ރަޝީދުގެ މައްޗަށް ކުރިހޯދާ 59 އިންސައްތަ އަޣުލަބިއްޔަތު ވޯޓު ލިބިގެންނެވެ. ކޮމަންޑޫ ދާއިރާގެ ނައިބު ރައީސްކަމަށް ވާދަކުރީ ތިން ފަރާތަކުންނެވެ. އެއީ އަޙްމަދު ރިޟުވާނުގެ އިތުރުން އިބްރާހީމް ރަޝީދުއާ ހަލީމް ނަމަކަށް ކިޔާ ބޭފުޅެކެވެ.

ވޯޓު ލިބިފައިވާ ގޮތަށް ބަލާއިރު، މަރޮށިން ހަލީމަށް 2 ވޯޓު، އިބްރާހީމް ރަޝީދަށް 20 ވޯޓު، އަޙްމަދު ރިޟުވާނަށް 24 ވޯޓު ލިބިފައިވެއެވެ. ފޯކައިދޫއިން ހަލީމަށް 1 ވޯޓު، ރަޝީދަށް 81 ވޯޓު، ރިޟުވާނަށް 103 ވޯޓު ލިބިފައިވެއެވެ. ކޮމަންޑޫއިން ހަލީމަށް 7 ވޯޓު، ރަޝީދަށް 36 ވޯޓު، ރިޟުވާނަށް 96 ވޯޓު ލިބިފައިވެއެވެ. މާލޭގައި ބެހެއްޓި ފޮށިން ހަލީމަށް 18 ވޯޓު، ރަޝީދަށް 31 ވޯޓު، ރިޟުވާނަށް 61 ލިބިފައިވެއެވެ. އެހެންކަމުން ކެންޑިޑޭޓުންނަށް ލިބުނު ޖުމްލަ ވޯޓަށް ބަލާއިރު، ހަލީމަށް 28 ވޯޓު، ރަޝީދަށް 168 ވޯޓު، ރިޟުވާނަށް 284 ވޯޓު ލިބިފައިވެއެވެ.

ވޯޓު ލިބުނުގޮތުގެ އިންސައްތައަށް ބަލާއިރު، ރިޟުވާނަށް %59 ، ރަޝީދަށް %35 ، ހަލީމަށް %6 ލިބިފައިވެއެވެ. ޕީއެންސީ ކޮމަންޑޫ ދާއިރާގެ ލީޑަރޝިޕުން ތާއީދުކުރީ ރިޟުވާނަށް ކަމަށް ވެއެވެ.