ޤާނޫނީ ޙުކޫމާތު ދެމެހެއްޓުމަށްޓަކައި ސުޕްރީމް ކޯޓުގެ ފަނޑިޔާރުންގެ ބެންޗު ފަސް ފަނޑިޔާރުންނަށް މަދުކުރުމަށް ކޯޓުތަކާ ބެހޭ ގާނޫނަށް އިސްލާހު ގެންނަން ރައްޔިތުންގެ މަޖިލީހުން ފާސްކުރި ބިލް ތަސްދީގުނުކުރައްވައި ރައީސް ޑރ. މުހައްމަދު މުއިއްޒު އަނބުރާ ފޮނުވާލައްވައިފިއެވެ.

ޕީއެންސީގެ ހޮޅުދޫ ދާއިރާގެ މެންބަރު އަބުދުއްސައްތާރު މުހައްމަދު އަމިއްލަ ނަންފުޅުގައި ހުށަހެޅުއްވި ބިލް ފާސްކުރީ ފެބްރުއަރީ 26 ވަނަ ދުވަހުގެ ޖަލްސާގައެވެ. ނަމަވެސް ބިލް ފާސްކުރިތާ ދޮޅު ހަފުތާ ފަހުން، ރައީސުލްޖުމްހޫރިއްޔާގެ އޮފީހުން މިއަދު ވިދާޅުވެފައިވަނީ އެ ބިލު އަނބުރާ މަޖިލީހަށް ފޮނުވާލައްވާފައިވާ ކަމަށެވެ.

މަޖިލީހުގައި ވަރަށް އަވަސްއަރުވާލާފައި ފާސްކުރި ބިލަށް ވޯޓަށް އެހީ ކޮންމެ މެންބަރެއްގެ އަރިހުގައި ވަކިން އަހައިގެންނެވެ. ސަރުކާރު ހިންގާ ޕީއެންސީގެ މެޖޯރިޓީ ވޯޓުން ބިލު ފާސްކުރިކަމުގައި ވިޔަސް، އިދިކޮޅު އެމްޑީޕީގެ ނުވަ މެންބަރަކު ވޯޓު ދެއްވީ ބިލް ފާސްކުރަން ނުފެންނަ ކަމަށެވެ.

މިހާރު ފާސްކޮށްފައިވާ ބިލުގައިވާ ގޮތުން ސުޕްރީމް ކޯޓުގެ ފަނޑިޔާރުންގެ އަދަދ ފަހަކަށް މަދުކޮށް، ދެ ފަނޑިޔާރަކު 12 ދުވަސް ތެރޭގައި މަޤާމުން ވަކިކުރަން ޖެހޭނެއެވެ. މަޖިލީހުން ފާސްކޮށްފައިވާ އިސްލާޙުގައި ވަނީ ފަނޑިޔާރުންތަކެއް ޤާބިލުނޫން ކަމަށް ކަނޑައަޅަންޖެހޭ ފަދަ ހާލަތެއް އުފަންކުރުވައި، ފަނޑިޔާރުންތަކެއް މަގާމުން ވަކިކުރުމަކީ އިންސާފުވެރި ގޮތެއް ނޫން ކަމަށް ކައުންސެލް ޖެނެރަލް ފާތިމަތު ފިލްޒާ ވެސް ލަފާދެއްވާފައި ވަނިކޮށެވެ.