ފީފާގެ ރައީސް އިންފަންޓީނޯ މާދަމާ ރާއްޖެ އަށް ކުރައްވާ ރަސްމީ ދަތުރުގައި، ރައީސް ޑރ. މުހައްމަދު މުއިއްޒުއާ އެކު މާދަމާ ހަވީރު ހާއްސަ ފުޓްބޯޅަ މެޗެއް ކުޅުއްވާގޮތަށް ހަމަޖެހިއްޖެ އެވެ.
ދިގު 19 އަހަރަށް ފަހު ފީފާގެ އެންމެ އިސް ވެރިޔަކު ރާއްޖެ އަށް ކުރައްވާ ފުރަތަމަ ދަތުރުގައި މާދަމާ ހެނދުނު ވަޑައިގެން ރައީސް ޑރ. މުޢިއްޒުއާ ބައްދަލުކުރައްވާނެ އެވެ. އެފްއޭއެމުން ބުނީ މި ބައްދަލުވުމުގައި ދެ ބޭފުޅުން ރާއްޖޭގެ ފުޓްބޯޅައިގެ ކުރިއެރުވުމާ ބެހޭގޮތުން މަޝްވަރާކުރައްވާނެ އެވެ.
މާދަމާގެ ހާއްސަ ފުޓްބޯޅަ މެޗު އޮންނާނީ އިންފަންޓީނޯގެ ޝަރަފުގައި މާދަމާ ހަވީރު 16:00 – 18:00 އަށް ގަލޮޅު ދަނޑުގައި ބޭއްވުމަށް ހަމަޖެހިފައިވާ އެގްޒިބިޝަންގެ ހަވާސާގައެވެ. މި އިވެންޓުގައި ޓީމުތަކާއި ޔޫތު އެކަޑަމީތަކުގެ ޓީމުތައް ވެސް ބައިވެރި ވާނެއެވެ.
ލަފާކުރެވޭ ގޮތުގައި މާދަމާ ހަވީރުގެ މެޗަށް ގަލޮޅު ދަނޑު އެއްކޮށް ފުރޭނެ އެވެެ. ދެ ރައީސުންގެ ކުރިމަތިލުން ބަލާލުމަށްޓަކައި ގިނަ އަދަދެއްގެ ސަޕޯޓަރުން ދަނޑަން ވަންނާނެ އެވެ.
ކިޔުންތެރިންގެ ހިޔާލު