ށ. މިލަންދޫގައި މީހުން ދިރިއުޅޭ ގެއަކަށް ވަދެ ނިކުމެވާން އޮންނަ މަގުގައި ގާފުނިތަކާ ވެލިފުނިތަކާއި ވިނަތައް ހެދިފައިވާތީ، އެގޭގައި ދިރިއުޅޭ މީހުންގެ ފަރާތުން އެކަމަށް ޙައްލު ހޯދުމަށް މަސައްކަތްކުރާތާ ޒަމާންތަކެއް ވެއްޖެކަން މި ނޫހަށް މަޢުލޫމާތު ލިބިއްޖެ އެވެ.
މި ނޫހާ މަޢުލޫމާތު ހިއްސާކުރެއްވި ފަރާތުން ބުނެފައިވާ ގޮތުގައި މިއީ ވެސް ހަމަ ކައުންސިލުން ދޫކުރި ބިމެއްގައި އަޅާފައި ހުރި ގެއެކެވެ. ފުރިހަމަ ކުރަންޖެހޭ ހުރިހާ ލިޔެކިޔުންތަކާއި ގޯތީގެ ރަޖިސްޓަރީ ވެސް ފުރިހަމަ ކޮށްފައިވާ ގެއެކެވެ. އަދި މިއީ މަޝްހޫރު “ށ.ދުބާއީ” ގައި މީހުން ދިރިއުޅޭ ގެއަކަށް ވަދެ ނުކުތުމަށް ބޭނުންކުރަންޖެހޭ މަގުގެ ހާލަތު އޮތް ގޮތް ކަމަށެވެ. އަދި މަގު މިހެން އޮތުމުގެ ސަބަބުން އެ ގެއަށް ވަންނަން ޖެހެނީ ޖެހިގެން ހުންނަ ގޭގެ ގޯތިތެރެއިން ލާފައި ކަމަށެވެ.
އިތުރަށް ބުނެފައިވަނީ ގޯތި ކޮންމެތާކު ، ކޮންމެ ހިސާބެއްގައި ހުއްޓަސް، މިއީ ވެސް ކައުންސިލުން ދޫކުރި ބިމެއްގައި ގަވައިދާ އެއްގޮތަށް ބިނާކޮށްފައިވާ ގެއެއް ކަމަށާއި، ގެއަށް މީހުން ބަދަލުވެ ދިރިއުޅެމުން ދާތާ 2 އަހަރު ފުރިއްޖެ ކަމަށެވެ. އަދި ގެއަށް ބަދަލުވުމުގެ ކުރިން ވެސް، އަދި ގެއަށް ބަދަލުވުމަށް ފަހު ވެސް، އެތަކެއް ފަހަރަކު މަގު ހަދައި ދިނުމަށް ކައުންސިލްގައި އެދުމުން ވެސް މިކަމަށް އަދިވެސް ހައްލެއް ނުލިބޭ ކަމަށެވެ.
އޭނާގެ ސުވާލަކީ ރައްޔިތުންނަށް ފަސޭހަވާނެހެން މަގު ހަދާފައި ބެހެއްޓުމަކީ ރައްޔިތުންގެ ޒިންމާއެއްތޯ ނޫނީ ރަށު ކައުންސިލްގެ ޒިންމާއެއްތޯ އެވެ.
ކިޔުންތެރިންގެ ހިޔާލު