އުމުރުން އެންމެ 10 މަހުގެ ކުޑަ ކުއްޖަކަށް އަވަސް ފަރުވާ ދިނުމުގައި އައްޑޫ އެކުއެޓޯރިއަލް ހޮސްޕިޓަލް (AEH) އިން އިހުމާލުވި ކަމަށް ބުނާ މައްސަލައެއް ފެންމަތިވެއްޖެއެވެ.
މައުލޫމާތު ލިބިފައިވާ ގޮތުގައި މި ހާދިސާ ހިނގާފައި ވަނީ މިއަދު ހަވީރުގެ ވަގުތެއްގައެވެ. އެގޮތުން އޭއީއެޗްއަށް މިއަދު ހަވީރު ކުޑަ ކުއްޖާ ގޮވައިގެން އެ ކުއްޖާގެ އާއިލާއިން ދިއުމުން ޑޮކްޓަރަށް ދެއްކުމުގެ ކުރިން ޓްރައޭޖް ކުރިއެވެ. ކުއްޖާގެ އާއިލާއިން ބުނާ ގޮތުގައި ކުއްޖާ ހޮސްޕިޓަލަށް ގެންދިޔައީ ނިދައި ހޭލިއިރު އެ ކުއްޖާގެ ގައިގައި ރަތް ކުލައިގެ ބޮޑު ފިއްގަނޑު ތަކެއް ނަގައިގެންނެވެ.
މި ކުއްޖާ އަކީ މީގެ 3 ދުވަސް ކުރިންވެސް ވަރަށް ގަދައަށް ހުން އައިސްގެން ހޮސްޕިޓަލުން ފަރުވާހޯދާފައިވާ ކުއްޖެއް ކަމަށް އާއިލާއިން މައުލޫމާތު ދެއެވެ. މިއަދު ހޮސްޕިޓަލުގެ ނަރުހުން ކުއްޖާ ބަލާފައި އަވަސް ފަރުވާ ދިނުމުގެ ބަދަލުގައި ދިގު ކިއު އަކަށް ލި ކަމަށާއި އެތައް އިރެއް ވަންދެން ކިއުގައި މަޑުކުރި ކަމަށް ބުންޏެވެ. ނަމަވެސް ހޮސްޕިޓަލުގައި އެވަގު ގިނަ ބަލި މީހުން ޑޮކްޓަރަށް ދައްކަން ތިބުމުން ކުއްޖާ ގޮވައިގެން އިމަޖެންސީ ބަޔަށް އާއިލާއިން ދިޔަ ކަމަށް ބުންޏެވެ. އާއިލާއިން ބުނީ ކުއްޖާ އަވަހަށް ޑޮކްޓަރަށް އެދުނީ ކުއްޖާ އުމުރުގެ ގޮތުން ކަމަށާއި އަދި އެ ކުއްޖާ މިހާރުވެސް ހުން އައިސްގެން ބޭސްކަމުން ދާތީކަމަށެވެ.
އިމަޖެންސީ ބަޔަށް ދިއުމުން އެތަނުގައި ހުސް އެނދެއް ނެތް ކަމަށާއި ކިއުގައި މަޑުކުރުމަށް ނަރުހުން ބުނި ކަމަށް އާއިލާއިން ބުންޏެވެ. އަދި ކުއްޖާ ކުޑަކޮށް ބަލާލައި ކުއްޖާއަށް ދިމާވެފައިވާ ހާލަތު އާއިލާއަށް ކޮންމެވެސް ވަރަކަށް ކިޔައި ދިނުމަށް ނަރުހުން ކައިރިން އެދުނު ކަމަށް އާއިލާއިން ބުންޏެވެ. ނަމަވެސް ކުއްޖާއަށް އަވަސް ފަރުވާ ނުދެވޭނެ ކަމަށް އެވަގުތު އާއިލާއާ ވާހަކަ ދެއްކި ނަރުސް ބުންޏެވެ. އަދި ނަރުސް މީހާ ކާކުކަން ނޭނގޭތީ އޭނާގެ ނަން އެހުމުން ނަން ނުބުނެ ދެކޮޅު ހެދި ކަމަށް އާއިލާއިން ބުންޏެވެ.
އާއިލާއިން ބުނާ ގޮތުގައި މިއީ އެ ހޮސްޕިޓަލުން މިކަހަލަ ކަމެއް އެ އާއިލާއާ ކުރިމަތިލާން ޖެހުނު ފުރަތަމަ ފަހަރު ކަމަށެވެ. އަދި އާއިލާއިން ބުނީ ހޮސްޕިޓަލުގެ ނަރުހުން މިއަދު ކަންތައް ކުރި ގޮތުން ހޮސްޕިޓަލުން ދޭ ހިދުމަތްތަކާ ދޭތެރޭ ދެކޭ ގޮތް ބަދަލުވެފައިވާ ކަމަށެވެ.
ކިޔުންތެރިންގެ ހިޔާލު