މާލޭގެ މޭޔަރު ކަމަށް އެމްޑީޕީން ވާދަކުރާނެ ފަރާތެއް ކަނޑައެޅުމަށް ބާއްވާ ޕްރައިމަރީއަށް ފޯރި ގަދަ ކެމްޕެއިނެއް ފެށިފައިވާ އިރު، އާރުޑީސީގެ ކުރީގެ މެނޭޖިންގ ޑިރެކްޓަރ މޫސާ އަލިމަނިކު (މޫކޭ) ތާއީދު ކުރަނީ އަލީ އާޒިމަށެވެ. ނަމަވެސް އޭނާގެ އަނބިކަނބަލުން ޒަހިއްޔާ ތާއީދުކުރަނީ އާދަމް އާޒިމަށެވެ.
ދިވެހިރާއްޖޭގައި ފައްކާވަމުންދާ ޑިމޮކްރެސީގައި މިއީ ފާހަގަކޮށްލެވޭނެ ކަމެކެވެ. އެ ދެމަފިރިކަނބަލުންނަކީ ވެސް އިދިކޮޅު އެމްޑީޕީގެ ޤައުމީ މަޖިލިސްގެ މެންބަރުންނެވެ. މޫކޭގެ އަނބިކަނބަލުން ޒަހިއްޔާ (ޒާޔާ) ފާހަގަކުރެވެނީ އެމްޑީޕީގެ އަންހެނުންގެ ރޫހުގެ ތެރޭގައި ފިޔަޖަހާ ތަރިއެއްގެ ގޮތުގައެވެ. އަދި ޚުދު މޫކޭ އަކީ ވެސް އެއް ޒަމާނެއްގައި ވަރަށް ނަން ވިދާލި ފަރާތެކެވެ.
މިހާރު ފެންނަ މަންޒަރަކީ ޒާޔާ ބާރަށް އާދަމް އާޒިމަށް ކެމްޕެއިން ކުރާ މަންޒަރެެވެ. އަދި ހަމަ އެފަދައިން މޫކޭ ވެސް ގެންދަނީ އަލީ އާޒިމަށް ކެމްޕެއިން ކުރަމުންނެވެ. ސިޔާސީ ވާހަކަތައް ދިރާސާކުރާ ބައެއް ފަރާތްތަކުގެ ލޮލުގައި މި މަންޒަރު ވަނީ އަޅައިގެންފައެވެ.
ބައެއް ފަރާތްތަކުން ބުނާގޮތުގައި މިކަމުން އެނގިގެންދަނީ ފިރިމީހާ، އަނބިމީހާއަށް ވެސް ސިޔާސީ ކަންކަމުގައި އެއްވެސް ނުފޫޒެއް ނުފޯރުވާ މިނިވަންކަމާއެކު މަސައްކަތް ކުރުމަށް ފުރުސަތު އޮތްކަމެވެ. މިއީ ރާއްޖޭގައި ޑިމޮކްރެސީ އާލާވެ ފައްކާވަމުންދާ ކަމުގެ އަލިގަދަ ހެއްކެކެވެ. އެހެން ނަމަވެސް، ދިވެހިރާއްޖެ އަދިވެސް ދާންއޮތް ރާސްތާ ވަރަށް ވެސް ދިގެވެ.
ކިޔުންތެރިންގެ ހިޔާލު