2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު އިންޑޮނޭޝިޔާގެ ސްމާޓްރާއަށް އައި ބާރުގަދަ ބިންހެލުމާ ގުޅިގެން އުފެެދުނު ސުނާމީ ދިވެހިރާއްޖާ ހިސާބަށް ފޯރީ އެދުވަހުގެ ހެނދުނު 9:20 ގައެވެ. އެއީ ދިވެހީން މިހާތަނަށް ދުއް އެންމެ ނާމާން ބިރުވެރި ގުދުރަތީ ކާރިޘާއެވެ.

އެދުވަހު އެރި ސުނާމީގެ އުސްމިނަކީ 4 – 14 ފޫޓް ކަމަށް ވުމުން ރާއްޖޭގެ ކުދި ޖަޒީރާ ރަށްތަކަށް އެއްވެސް ހުރަހެއް ނެތި އަރައިގެން ދޮވެވިގެންދިޔައެވެ. އެ ހިތާމަވެރި ހާދިސާގައި 83 މީހުން ދުނިޔެ ދޫކޮށްދިޔައިރު، ވީނުވީއެއް ނޭނގި 25 މީހުންވީ ގެއްލިފައެވެ. 1300 އަށް ވުރެ ގިނަ މީހުންނަށް އެކިވަރުގެ އަނިޔާތައް ލިބި، 26،000 މީހުންގެ ގެދޮރު ގެއްލިގެންދިޔައެވެ. ދިވެހިރާއްޖޭގެ ޖުމްލަ އާބާދީގެ ދިހަ އިންސައްތައަށް ވުރެ ބޮޑު ބަޔަކަށް ސީދާގޮތެއްގައި ވަނީ އަސަރުކޮށްފައެވެ. އަދި މީގެ އިތުރުން މުޅި އާބާދީއަށް ބައެއް އަސާސީ ޚިދުމަތްތައް މެދުކެނޑިގެންދިޔައެވެ.

26 ޑިސެމްބަރު 2004 ގައި ދިވެހީންގެ ފަރާތުން ފެނިގެންދިޔައީ އިންސާނިއްޔަތުކަމާ އެކުވެރި އެއްބައިވަންތަ ކަމުގެ ވަރަށް ވެސް ފުރިހަމަ ނަމޫނާއެވެ. އެ ބަޔަކަށް ލިބުނު އެއްޗެއް އަނެއް ބަޔަކަށް ވެސް ދީގެން، އެއްބައެއްގެ ކިބައިން އަނެއް ބަޔަކަށް ހިތްވަރު ލިބޭފަދަ އެކުވެރި އަޚުވަންތަ ބައެއްގެ ގޮތުގައި އެދުވަސް ތަޙައްމަލުކުރީ ކެތްތެރިކަމާއެކު ގައެވެ. އެދުވަހު ފެނުނު އެއްބައިވަންތަކަން ފާހަގަކޮށް، ދިރުވާ އާލާކުރުމުގެ މަޤުޞަދުގައި، އެއީ ޤައުމީ އެއްބައިވަންތަކަމުގެ ދުވަސްގެ ގޮތުގައި ސަރުކާރުން ކަނޑައެޅުއްވިއެވެ.

އެދުވަހުގެ ކާރިޘާގައި ދުނިޔެ ދޫކޮށް ވަކިވެގެންދިޔަ އެންމެހާ ދިވެހި ރައްޔިތުންގެ ފުރާނަފުޅުތަކަށް މާތްﷲ ސުވަރުގޭގެ މަތިވެރިވެގެންވާ ނިޢުމަތް މިންވަރުކުރައްވާށި. އާމީން!