ދިވެހިރާއްޖޭގައި އޭ-ލެވެލް އަށް ކިޔަވައިދޭ އެންމެ ބޮޑު ސްކޫލު ކަމަށްވާ ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީއެޗްއެސްއީ) އަށް ވުރެ، ރަށް ރަށުގެ ސްކޫލްތަކުގެ ނަތީޖާތައް ބޮޑުތަކުން ރަނގަޅު ކޮށްފިއޭ ބުނެވިދާނެއެވެ. އަދި އޭ-ލެވެލް އަށް ކިޔެވުމަށްޓަކައި މާލެއަށް އައުމެއް ނެތޭ ވެސް ބުނެވިދާނެއެވެ. ކުރާންޖެހޭ ހޭދައާއި ލިބޭ ނަތީޖާ ބައްދަލެއް ނޫނޭ ވެސް ބުނެވިދާނެއެވެ.

2024 ވަނަ އަހަރުގެ އޮކްޓޯބަރ/ނޮވެމްބަރުގެ އޭ-ލެވެލް ނަތީޖާ ލިބިފައިވާ އިރު، އަތޮޅުތެރޭގެ ސްކޫލްތަކުން ނަތީޖާތައް ހާމަކޮށް، އެމީހުންގެ ކާމިޔާތައް ފާހަގަކޮށް އުފާ ފާޅުކުރަމުންދާއިރު، އެންމެ ބޮޑު ސްކޫލަށް ވީގޮތެއް އަދިވެސް ސާފެއް ނުވެއެވެ. އެންމެ ކުޑަމިނުން ދަރިވަރުންނާ ބެލެނިވެރިންނަށް ތަކުލީފުކުޑަ ލުއިފަސޭހަ ގޮތަކަށް ނަތީޖާ ދޫކުރެވޭނެ ހަރުދަނާ ގޮތެއް އިންތިޒާމުކޮށްލުމަށް ވެސް ވަނީ ނުކުޅެދިފައެވެ.

މިދިޔަ ބުރާސްފަތި ދުވަހަކީ އޭ-ލެވެލްގެ ނަތީޖާ ދޫކުރަން ފެށި ދުވަހެވެ. ބައެއް ބެލެނިވެރިން ސްކޫލަށް ގޮސް އެތަން ސިފަކޮށްފައިވަނީ މަސްމާރުކޭޓެއްގެ ގޮތުގައެވެ. ހަތަރު ޑެސްކު ބަހައްޓައި، ހަތަރު ރޭންޖަކަށް އިންޑެކްސްތައް ބަހާލުމަށްފަހު ފާރުގައި ކަރުދާސްކޮޅެއް ހިއްޕާފައި ހުރިއިރު، އެ ވެސް ނެގިތާކުން ނަގާފައިވަނީ ކުއްޖާގެ ނަމާވެސް އެކުގައެވެ. މިސާލަކަށް “މުހައްމަދުން އަޙްމަދަށް”، “މަރިޔަމްފުޅުން ފާތުމާފުޅަށް” މިހެންނެވެ. ދަރިވަރުންގެ ނަން އެހެން ބޯޑެއްގައި އަޅުވާލީ އެކުދިން ލަދުގެންފާނެ ކަމަށް ވެސް ބެލުމެއް ނެތިއެވެ.

ސްކޫލުތެރެއަށް ވަތް އެއްވެސް ބެލެނިވެރިޔަކަށް ވާންވީގޮތެއް، ކުރާންވި ވަޑާމެއް ނޭނގި ދެކޮޅަށް ދެކޮޅަށް ދުވާއިރު، އެންމެ ކުޑަމިނުން ކީއްކުރާ މީހެއްތޯ އަހާލާނެ އިންސިއެއް ވެސް އެތާ ނެތްފަދައެވެ. އަދި ދޮރުފާރަވެރިންނަށް އެއީ ނަތީޖާ ދޫކުރާ ދުވަސްކަން ވެސް ބުނެލަދެވިފައެއް ނެވެއެވެ. ކިޔޫ ތަރުތީބުން ނަތީޖާ ދޫކުރުމަށް ރާވާފާއޮތް އިރު، ކިޔޫ ބަލަހައްޓާނެ ގޮތެއް ޖެހުނުތާ ލަކުނުވެސް ނެތެވެ. އެހެންކަމުން ލަދުޙަޔާތްކުޑަވާ ވަރަކަށް އަވަހަށް ނަތީޖާ ލިބުނެވެ. ދުނިޔޭގެ ލަދެއް ހުރި ކޮންމެ މީހަކު ބާކީވެ، އެއްފަރާތް ވެގެންދިޔައެވެ.

އޮފީސްތަކުގައި ވަރަށް އަވަދިނެތިކޮށް އުޅެފައި ނަތީޖާ ނެގުމަށްޓަކައި ދިޔަ ބައެއް ބެލެނިވެރިންގެ މޫނުމަތިން ހިތްހަމަނުޖެހުންތައް ފެންނާން ހުރީ އަމަށަކު ވަރަކަށް ނޫނެވެ. ބައެއް މީހުންެގެ ގާތަށް އައި ރުޅީގައި ނަތީޖާއަކާ ނަތީޖާއެކޭ ކިޔާ ދޫކޮށްލާފައި އެނބުރިދިޔައެވެ. އެމަންޒަރުތައް ބަލަން ޚުދު އަޅުގަނޑު ސްކޫލުގެ އެތެރޭގައި ހުރީމެވެ. އަދި ހިތަށް އެރިއެވެ. މިއަދަކީ ދެ އަހަރު ދުވަހުގެ ކިޔެވުމުގެ ނަތީޖާ ދަރިވަރުންނަށް ލިބޭ ދުވަހެވެ. މިއަދަށް ވުރެ މުހިންމުވާނީ ވަކި ކޮން ދުވަހެއް ބާއެވެ. އެފަދަ ދުވަހެއްގައި ވެސް ވެރިއެއް ގެރިއެއްގެ ހިލަމެއް ނެތީ ކީއްވެބާއެވެ.