ށ. ފޯކައިދޫ އަކީ އީދު ފޯރި އަބަދުވެސް ގަދަ ރަށެއްކަމުގައިވީ ނަމަވެސް، މި އަހަރުގެ ބޮޑު އީދު ކުރީ އަހަރުތަކަށް ވުރެ ވެސް ބޮޑު ވާނެ ކަމަށާއި، “ބޮޑު އީދު ބޮޑުކޮށް” ނަމުގައި ކުރިއަށް ގެންދިޔަ ކެމްޕެއިނާ ގުޅިގެން ރަށުން ބޭރުގައި ދިރިއުޅޭ ރަށު މީހުން ހިމެނޭހެން 2000 އަށް ވުރެ ގިނަ މީހުން އީދުގައި ރަށަށް ޒިޔާރަތް ކުރާނެ ކަމަށް އެ ރަށު ކައުންސިލުން ލަފާކޮށްފިއެވެ.
ބޮޑު އީދަށް ފޯކައިދޫއަށް ޒިޔާރަތް ކުރަންވީ ސަބަބުތައް ބަޔާންކޮށްދެއްވަމުން ފޯކައިދޫ ކައުންސިލްގެ ރައީސް އަޙްމަދު އާސިފް ވިދާޅުވީ، ޘަޤާފީ ކުޅިވަރުތަކާއި ޒަމާނީ ކުޅިވަރުތަކާއެކު، ކޮންމެ ދުވަހެއްގެ ވެސް ތިން ދަންފަޅީގައި ކުޅިވަރުތައް ކުރިއަށްދާ ގޮތަށް ތާވަލުކުރެވިފައި ވާކަމަށާއި، މުޅި ރަށް އޮތީ ވަރަށް ބޮޑަށް ތައްޔާރުވެފައި ކަމަށެވެ.
ރައީސް އާސިފް އިތުރަށް ވިދާޅުވީ، އީދުގެ ފުރަތަމަ ދުވަހުން ފެށިގެން ކޮންމެ ދުވަހަކު ވެސް ހެނދުނާއި، ހަވީރާ އަދި ރޭގަނޑަށް ޚާއްސަ ކުޅިވަރު ހަރަކާތްތައް ރޭވިފައިވާ ކަމަށާއި، ކުޅިވަރުތަކުގައި ބައިވެރިވުމުގެ ފުރުޞަތު ރަށު މީހުންނާއި ރަށުން ބޭރުން ޒިޔާރަތްކުރާ ފަރާތްތަކަށް ވެސް ހަމަހަމަ ގޮތެއްގައި އޮންނާނެ ކަމަށާއި، މިފަހަރުގެ ބޮޑު އީދު ބޮޑުވާނެ ކަމަށެވެ.
ބޮޑު އީދަކީ އިޤްތިޞާދީ ފައިދާތަކެއް ވެސް ރަށަށް ލިބިގެންދާ މޫސުމެކެވެ. އެގޮތުން ޗުއްޓީ ހޭދަކޮށްލުމަށާއި، އީދު ކުޅިވަރުތަކުގައި ބައިވެރިވެލުމަށްޓަކައި ރަށަށް ޒިޔާރަތްކުރާ ފަރާތްތަކުން ކުރާ ހޭދައަކީ ރަށުގެ އިޤްތިޞާދަށް ވަންނަ އާމްދަނީއެކެވެ. އަންދާޒާކުރެވޭ ގޮތުގައި މި އަހަރުގެ އިޤްތިޞާދީ މަންފާ ވެސް އިތުރުވެ، 5 މިލިޔަން ރުފިޔާ ފަހަނައަޅާ ދާނެއެވެ.
އެންމެ ޚާއްސަ ކުޅިވަރުތަކުގެ ތެރޭގައި ދެލިމާލި ނެށުމާއި ކޯޑި ކުޅުން ހިމެނެއެވެ. އަދި މިފަދަ ކުޅިވަރުތަކަކީ ފޯކައިދޫއަށް ޚާއްސަ ޙަރަކާތްތަކެއް ކަމަށާއި، މިފަހަރު އެފަދަ ޘަޤާފީ ކުޅިވަރުތައް ފެނިގެންދާނީ އިހުޒަމާނުގައި ވެސް އެފަދަ ކުޅިވަރުތައް ކުޅެ އުޅުނު އަސްލު ގޮތަށް ކަމަށް ކައުންސިލުން މަޢުލޫމާތު ދެއެވެ.
އަދި ރަށުގައި އޮންނަ ސިޔާސީ ވާދަވެރިކަން އެއްފަރާތްކޮށް، އެންމެހާ ރައްޔިތު އަންހެނުން އަދި ފިރިހެނުން ވެސް އެކުގައި އެއްރޫޙެއްގައި ތައްޔާރުވަނީ، އެންމެންނަށް އުފާވެރި އީދަކަށް މިފަހަރުގެ ބޮޑު އީދު ހެދުމަށްޓަކައެވެ. އެހެންކަމުން މިފަހަރުގެ ބޮޑު އީދަށް ދާންވީ ފޯކައިދޫއަކަށް ނޫންތޯއެވެ.
ކިޔުންތެރިންގެ ހިޔާލު