ދިވެހިރާއްޖޭގައި އެންމެ ކުލަގަދަކޮށް ފާހަގަކުރާ މުނާސަބަތަކީ ބޮޑުއީދުކަން ހަމަ އެންމެން ވެސް ޤަބޫލުކުރާނެ އެވެ. އަދި އީދު ފޯރި އަކީ ޒަމާނުންސުރެ އޮންނަ ކަމެއް ވެސް މެއެވެ. މި އަހަރުގެ ބޮޑުއީދަށް ވެސް ރާއްޖޭގެ އެކި ކަންކޮޅުތަކުގައި ތައްޔާރީތައް ވަރަށް ފޯރީގައި ކުރިއަށް އެބަ ދެއެވެ. އެގޮތުން ށ. އަތޮޅަކީ ވަރަށް ފާހަގަކޮށްލެވޭ އަތޮޅެކެވެ.
ށ. އަތޮޅުގައި އީދު ފޯރި އަކީ ފަނޑުވާނެ އެއްޗެއް ނޫނެވެ. އަހަރަކަށް ވުރެ އަހަރެއްގެ އީދު ކުޅިވަރުތައް ފުރިހަމަވެފައި ފޯރި ގަދައެވެ. ޒަމާނީ ކުލަތަކާއެކު ޘަޤާފީ ކުޅިވަރުތައް ގިނަ ކޮށްލައެވެ. އީދު ސަޔާ އީދު ހެދިކާ އާއި އީދު މުރުމުރާއި، މާގުޅަޔާއި، އަތްތެޅި އާއި ފަނާގާ ހެދުމަކީ ކޮންމެ ގެއެއްގައި ވެސް ވަރަށް ފޯރީގައި ކުރާ ކަމެކެވެ. އެއީ ރަށަށް ޒިޔާރަތްކުރާ ފަރާތްތަކަށް މެހެމާންދާރީ އަދާކުރުމަށާއި، ރަށުން ބޭރުގައި ތިބޭ ރަޙްމަތްތެރިންނަށް އީދު ހަދިޔާ ފޮނުވުމައްޓަކައެވެ.
މި އަހަރުގެ ބޮޑުއީދުގައި ށ. އަތޮޅަށް ދާން ބޭނުންވާ ފަރާތްތަކުން މިހާތަނަށް ޖާގައެއް ނުލިބޭ ފަރާތްތަކަށް ދެން އެ ފުރުޞަތު ލިބުމަނީ ވުމަށް ވުރެ ނުވުން ގާތް ނަމަވެސް ފުރުޞަތު އޮތްކަމެކެވެ. ޔަޤީންވާ އެއްކަމަކީ އެ ފުރުޞަތު ކޮންމެ ޙާލަކުން ވެސް ހޯދިއްޖެ މީހެއްގެ އަޒުމަކަށް ވާނީ އަންނަ އަހަރުގެ ބޮޑުއީދަށް ށ. އަތޮޅު ރަށަކުން ޖާގަ ކަށަވަރު ކުރުމެވެ. ށ. އަތޮޅަށް ހިތްކިޔާ ސަބަބުތައް ގިނައެވެ. ނަމަވެސް، އެމީހުންގެ ޚާއްސަ މެހެމާންދާރީ އަކީ އެންމެ ބޮޑު އެއް ސަބަބޭ ދެންނެވުމަކީ ކުށަކަށް ނުވާނެއެވެ.
މިއަހަރުގެ ބޮޑުއީދު އެންމެ ބޮޑުކޮށް އޮންނާނެ ކަމަށް ޚަބަރުތައް ލިބެނީ ފޯކައިދޫ، މިލަންދޫ، ފުނަދޫ އަދި މާއުނގޫދޫއެވެ. ނަމަވެސް އެހެން ހުރިހާ ރަށެއްގައި ވެސް ފޯރި މަޑެއް ނުވާނެއެވެ. އާދަޔާ ޚިލާފަށް ބޮޑުކޮށް އީދަށް ތައްޔާރުވާ ރަށް ރަށުގެ ގެސްޓްހައުސްތަކާއި މީހުން ދިރިއުޅޭ ގެތައް ވަނީ ފުލްވެފައެވެ. ޚަބަރުތައް ލިބޭ ގޮތުގައި އީދުގައި ބައެއް ރަށްރަށުގައި ޓެންޓް ޖަހައިގެން މީހުން ކޭމްޕް ކުރުމަކީ ވެސް މިފަހަރުގެ އީދުގައި ފެނިގެން ހިނގައިދާނެ ކަމެކެވެ.
ބޮޑުއީދު ފޯރިއަކީ ދިވެހީންނަށް ވަރަށް ޚާއްސަ ކަމެކެވެ. އެހެން ނަމަވެސް އީދު ފާހަގަކުރުމުގައި އިސްލާމީ މިންގަނޑުތައްް ފަހަނައަޅާ ނުދިއުމަށް ދީނީ ޢިލްމުވެރިންނާ ސަރުކާރުގެ ކަމާބެހޭ ފަރާތްތަކުގެ އިތުރުން ރައީސުލްޖުމްހޫރިއްޔާ ވެސް ވަނީ އިލްތިމާސް ކުރައްވާފައެވެ. އަދި ދަތުރުތައް ކުރެއްވުމުގައި މޫސުމަށް ސަމާލުވުމަށް މޫސުމާބެހޭ އިދާރާއިން ވަނީ އިލްތިމާސް ކުރައްވާފައެވެ.
