މިދިޔަ ފެބްރުއަރީ މަހު އެކަނިވެސް ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ ޖުމްލަ 64 މައްސަލައެއް ރިޕޯޓުކޮށްފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފި އެވެ.
ޢާއިލީ ތަރައްޤީއާ ބެހޭ ވުޒާރާއިން ބުނީ ހުށައެޅުނު މައްސަލަތަކުގެ ތެރެއިން އެންމެ ގިނައީ އިހުމާލުވުމުގެ މައްސަލަތައް ކަމަށެވެ. އެގޮތުން އިހުމާލުވުމުގެ 30 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި ހިމެނެނީ 19 ފިރިހެން ކުދިންނާއި 11 އަންހެން ކުދިންނެވެ. ދެވަނައަށް އެންމެ ގިނައިން ރިޕޯޓުކޮށްފައިވަނީ ޖިންސީ ހާނިއްކައިގެ މައްސަލަތަކެވެ. މި ބާވަތުގެ 13 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި 11 އަންހެން ކުދިންނާއި 2 ފިރިހެން ކުދިން ހިމެނެއެވެ.
ގެވެށި އަނިޔާގެ އަމަލެއް ކުރާތަން ކުއްޖަކަށް ފެނުމުގެ 8 މައްސަލައާއި، ނަފްސާނީ ހާނިއްކައިގެ 7 މައްސަލައާއި، ޖިސްމާނީ ހާނިއްކައިގެ 4 މައްސަލަ ވެސް ހުށައެޅުނު ކަމަށް ވުޒާރާއިން ބުންޏެވެ. އަދި ބްލެކްމެއިލް ކުރުމާއި ބަދުއަޚްލާގީ ވީޑިއޯއާ ގުޅުންހުރި މައްސަލަތައް ވެސް މި މަހުގެ ތަފާސްހިސާބުގައި ހިމެނެއެވެ.
ކުޑަކުދިންގެ އަޚްލާގީ މައްސަލަތަކާ ގުޅޭ 21 މައްސަލައެއް ޖެނުވަރީ މަހު ވަނީ ރިޕޯޓުކޮށްފައިވާއިރު މީގެ ތެރެއިން އެންމެ ގިނައީ ސްކޫލަށް ދާން ބޭނުން ނުވުމުގެ މައްސަލަތަކެވެ. އާއިލީ މައްސަލަތަކަށް ބަލާއިރު، ޖުމްލަ 46 މައްސަލައެއް ރިޕޯޓުކޮށްފައިވާއިރު، މީގެ ތެރޭގައި ކުދިން ބެލުމުގައި ޖެހޭ މައްސަލަތަކާއި، ހަޟާނާގެ މައްސަލަތަކުގެ އިތުރުން ދަރިންގެ ޚަރަދު ދިނުމުގެ މައްސަލަތައް ހިމެނެ އެވެ.
ޖެނުވަރީ މަހު ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 45 މައްސަލައެއް ވަނީ ހުށަހެޅިފައެވެ. މީގެ ތެރެއިން އެންމެ ގިނައީ ޖިސްމާނީ އަނިޔާކުރުމުގެ މައްސަލަތަކެވެ. މި ބާވަތުގެ މައްސަލަތައް އެންމެ ގިނައިން ރިޕޯޓުކޮށްފައިވަނީ އަންހެނުންނަށް ކުރާ އަނިޔާތަކާ ގުޅިގެންނެވެ.
މިދިޔަ މަހުގެ ނިޔަލަށް ދައުލަތުގެ ބެލުމުގެ ދަށުގައި ޖުމްލަ 151 ކުދިން ތިބި އިރު، މި މަހުގެ ތެރޭގައި އެއް ކުއްޖަކު ވަނީ އަލުން އާއިލާއާ ހަވާލުކުރެވިފައެވެ. އަދި 3 ކުއްޖަކަށް ވަނީ ވަޒީފާގެ ފުރުޞަތު ހޯދައިދެވިފައެވެ.
ކިޔުންތެރިންގެ ހިޔާލު