އިޒްރޭލާ އެމެރިކާ ގުޅިގެން ފަށާފައިވާ ހަނގުރާމައާ ގުޅިގެން ރާއްޖޭގެ ތާއީދު އީރާނަށް ނުދެއްވާނެ ކަމަށާއި، ތާއީދު ކުރަނީ އެހެން އަރަބި ގައުމުތަކަށް ކަމަށާއި، އެ ގައުމުތަކުގެ ވެރިންނަށް އެކަން އަންގަވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ފަލަސްޠީނުގެ ޙައްޤުގައި އިޒްރޭލްގެ ޕާސްޕޯޓު މަނާކުރެއްވި މާތް މަނިކުފާނު ނުސީދާ ގޮތެއްގައި މިފަހަރު ތާއީދުކުރައްވަނީ ޣައްޒާގެ 70،000 މުސްލިމުން ޝަހީދުކޮށްލި އަނިޔާވެރި ސަޙުޔޫނީ ދައުލަތަށެވެ. އީރާނާ ދެކޮޅަށް ހަނގުރާމަ ފަށައި އެޤައުުމުގެ އެންމެ މަތީ ވެރިޔާ ވެސް ވަނީ ޝަހީދުކޮށްލާފައެވެ. އެހެން ނަމަވެސް ދިވެހިރާއްޖޭގެ ފަރާތުން އެންމެ ކުޑަމިނުން ތައުޒިޔާގެ ބަހެއް ވެސް ވިދާޅުވެފައެއް ނުވެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ އަރަބި އިސްލާމީ ގައުމުތަކުގެ ވެރިންނަށް ގުޅުއްވައި، އެ ގައުމުތަކަށް ރާއްޖޭގެ ސަޕޯޓް އޮތްކަން ހާމަކުރުމުގެ މަސައްކަތް ކުރައްވަމުން ގެންދަވާ ކަމަށާއި، އެގޮތުން ރޭގެ ވަގުތެއްގައި ޔޫއޭއީގެ ރައީސްއާ ވާހަކަ ދައްކަވާފައިވާ ކަމަށާއި މިއަދު ސައުދި އަރަބިއްޔާ، ބަހުރެއިން، އޮމާން އަދި ގަތަރުގެ ވެރިންނާ ފޯނު ކޯލު ހަމަޖެހިފައިވާ ކަމަށް ވަނީ ވިދާޅުވެފައެވެ.
ފަލަސްޠީނުގެ ޣައްޒާ އެއްކޮށް ސުންނާފަތިކޮށް އެތައް ހާސް ބައެއް ޤަތުލުކުރި ނުބައި ނަތަންޔާހޫގެ ފަހަތުގައި ތިބި އަޑިނުބައި އަރަބި ވެރިންނާއެކު ރާއްޖެ ވެސް އޮތްކަން ރަސްމީކޮށް އިޢުލާނު ކުރުމަކީ ނުރައްކާތެރި ދަނޑިވަޅެއްގައި ކުރެއްވި ނުރައްކާތެރި ކަމަކަށް ވެދާނެއެވެ.
ކިޔުންތެރިންގެ ހިޔާލު