މާލެ އަތޮޅު މާފުށީ ކައުންސިލުން ބާއްވަމުން އަންނަ “މާފުށީ ކައުންސިލް ފުޓްސަލް ކަޕް” ފެށިގެން ކުރިއަށް ދަނީ ވަރަށް ވެސް ފޯރި ގަދަކޮށް ކަމަށް މަޢުލޫމާތު ލިބެއެވެ. އަންހެން ޑިވިޛަން އާއި ފިރިހެން ޑިވިޛަން ވަކިން ކުރިއަށް ގެންދާ މާފުށި ކައުންސިލް ފުޓްސަލް ކަޕް 2023 ގެ ކުޅުން 2 ޑިސެމްބަރުގައި ފެށިގެން ކުރިއަށް އެބަދެއެވެ. މި މުބާރާތުގެ އަންހެނުންގެ ބައިގާ ޖުމްލަ 6 ޓީމް އަދި ފިރިހެނުންގެ ބައިގާ 8 ޓީމްއަކުން ބައިވެރިވެފައި ވެއެވެ.
ޗެމްޕިއަން ޓީމަށް 40،000 ރުފިޔާ އަދި ރަނަރަޕް ޓީމަށް 20،000 ރުފިޔާގެ ފައިސާގެ އިނާމް ލިބޭ މި މުބާރާތުގެ ފައިނަލް މެޗްތައް ކުޅުމަށް ހަމަޖެހިފައި ވަނީ 11 ޑިސެމްބަރ 2023 ގައެވެ. މުބާރާތުގެ ގްރޫޕް ސްޓޭޖްގެ މެޗްތައް ނިމި، މާދަމާ ސެމީ ފައިނަލްގެ މެޗްތައް ފެށޭނެކަމަށް މަޢުލޫމާތު ލިބިފައިި ވެއެވެ.
މާފުށި ކައުންސިލް ފުޓްސަލް މުބާރާތް މިފަހަރު އިންތިޒާމްކުރަނީ ބިއަންކޯ ސްޕޯޓްސް ކްލަބްގެ ފަރާތުންނެވެ. މި މުބާރާތުގެ ކުޅިވަރު ކިޓްތައް ސްޕޮންސަރ ކޮށްފައި ވަނީ އޮބިއޯންގެ ފަރާތުންނެވެ. މުބާރާތުގެ ފުޑް އެންޑް ބެވަރޭޖް ޕާޓްނަރަކީ ސަފާޔަރ ކެފޭއެވެ. އެކޮމޮޑޭޝަން ޕާޓްނަރަކީ އަލޯޑާއެވެ. ޓްރެވަލް ޕާޓްނަރަކީ އެސްކޭޕްއެވެ. ސައުންޑް ޕާޓްނަރަކީ މާފުށި ބޮޑުބެރެވެ. އަދި މި މުބާރާތުގެ ގުޑްވިލް ޕާޓްނަރަކީ އެރީނާ ހޮޓެލްސްއެވެ.
އަންހެން ޑިވިޛަންގެ ސެމީ ފައިނަލްގެ ފުރަތަމަ މެޗްގައި ބައްދަލުކުރާނީ ބިއަންކޯ ސްޕޯޓްސް ކްލަބާ ބިރާގަން ކްއީންސްއެވެ. އަދި ދެވަނަ މެޗްގައި ބައްދަލުކުރާނީ ސްޓްރައިކާރސް އެފްސީ އާއި ހަމްޝީއެވެ. ފިރިހެނުންގެ ޑިވިޛަންގެެ ސެމީ ފައިނަލްގެ ފުރަތަމަ މެޗްގައި ބައްދަލުކުރާނީ ބިއަންކޯ އާއި ބިރާގަންއެވެ. އަދި ދެވަނަ މެޗްގައި ބައްދަލުކުރާނީ ސްޓްރައިކާރސް އާއި ބިރާގަން ސްޕޯޓްސް ކްލަބެވެ.
މި މުބާރާތަކީ ވަރަށް ވެސް ފޯރި ގަދަ އަދި ގިނަ ބައެއްގެ ސަމާލުކަން ލިބެމުން އަންނަ މުބާރާތެކެވެ. އަދި ހުނަރުވެރި ކުޅުންތެރިންތަކެއް ފެނިގެންދާ ވަރަށް ޚާއްޞަ މުބާރާތެކެވެ. އެހެންކަމުން މުބާރާތުގެ މެޗްތައް ބަލައިލުމަށް މާލެ އާއި އަވަށްޓެރި ރަށް ރަށުން ވެސް މީހުން ޒިޔާރަތްކުރާކަމަށް މަޢުލޫމާތު ލިބިފައި ވެއެވެ. އެހެންކަމުން މި މުބާރާތް ވެފައި ވަނީ މާފުށީގައި ބޭއްވޭ މިފަދަ އެންމެ ބޮޑު އެއް ކުޅިވަރު ޙަރަކާތަށެވެ.
