2023 ވަނަ އަހަރުގެ ރިޔާސީ ރޭހުގައި އޭރުގެ ރައީސް އިބްރާހީމް މުޙައްމަދު ސޯލިހަށް ދިމާވި އެންމެ ބޮޑު ގޮންޖެހުމަކަށް ވީ އިދިކޮޅު ޕީއެންސީން ދަރަންޏާއި ކޮރަޕްޝަނާ ދެކޮޅަށް ހިންގި ކެމްޕެއިން ކަމުގައި ދެންނެވުމަކީ ކުށަކަށް ނުވާނެއެވެ. އަދި އެމީހުންނަށް ވެރިކަން ލިބިއްޖެނަމަ އެކަން ކަން އެގޮތަށް ތަކުރާރުނުވާނެ ކަމަށް ބުނެ ރައްޔިތުންނަށް ދިން ޔަޤީން ކަމެވެ.
ނަމަވެސް، ދެއްކި ވާހަކަތަކާއި މިހާރު ކަންހިނގާ ގޮތާ އުޑާ ބިމާހާ ތަފާތެވެ. އަމަލާ ބަހާ ހަމަ އެއްގޮތަކަށް ވެސް ދިމަލެއް ނުވެއެވެ. ޕީއެންސީން ކީހާ ޅެމެއް ފަރިއްސަށްވެ ނިމިއްޖެ އެވެ. ދައުލަތުގެ ދަރަންޏާއި ކޮރަޕްޝަންގެ އަމަލުތައް އަތްނުފޯރާ ވަރަށް މައްޗަށް އަރައިފި އެވެ.
ފާއިތުވި ސަރުކާރުގެ ފުރަތަމަ ތިން އަހަރުގެ ބަޖެޓާ މިހާރުގެ ސަރުކާރުގެ ފުރަތަމަ ތިން އަހަރުގެ ބަޖެޓު ތަފުސީލަށް ބަލައިލަމާތޯ އެވެ. ރައީސް ސާލިހްގެ ސަރުކާރުން 2019 ވަނަ އަހަރު ފާސްކުރީ 30.2 ބިލިޔަން ރުފިޔާގެ ބަޖެޓެކެވެ. 2020 ވަނަ އަހަރު ފާސްކުރީ 37.5 ބިލިޔަން ރުފިޔާގެ ބަޖެޓެކެވެ. އަދި 2021 ވަނަ އަހަރު ފާސްކުރީ 34.7 ބިލިޔަން ރުފިޔާގެ ބެޖެޓެކެވެ. ތިން އަހަރުގެ ޖުމުލަ އަކީ އެހެންކަމުން 102.4 ބިލިޔަން ރުފިޔާއެވެ.
މިހާރުގެ ސަރުކާރުން 2024 ވަނަ އަހަރު ފާސްކުރީ 55 ބިލިޔަން ރުފިޔާގެ ބަޖެެޓެކެވެ. 2025 ވަނަ އަހަރަށް ފާސްކުރީ 56.6 ބިލިޔަން ރުފިޔާގެ ބޮޑު ބަޖެޓެކެވެ. އަދި އަންނަ އަހަރަށް ފާސްކުރީ 64 ބިލިޔަން ރުފިޔާގެ ރެކޯޑް ބަޖެޓެކެވެ. އެއީ އެކު ޖުމުލަ 175.6 ބިލިޔަން ރުފިޔާއެވެ. ލިބޭ އާމްދަނީން ފުއްދާލުމުގެ ވިސްނުމެއް މި ސަރުކާރުގައި ވެސް ނެތެވެ.
މި ބަޖެޓު ތަފާސްހިސާބުން އެނގި ސާފުވާ ގޮތުގައި ދަރަނި ކުޑަ ކުރުމުގެ ވިސްނުމެއް މިސަރުކާރުގައި ވެސް އަމުދުން ނެތެވެ. އަދި ރެކޯޑު އަދަދުތަކުން ބަޖެޓު ފާސްކޮށްގެން ކުޅަ ކަމެއް ވެސް ފެންނާކަށް ނެތެވެ. ނުވިތާކަށް އަދިވެސް ވަޢުދުނާމާ ނިމުމަކަށް ނާދެއެވެ. ރައީސް ވަޑައިގަންނަވާ ކޮންމެ ރަށެއްގައި މުޅިން އައު ވަޢުދު ލިސްޓެއް އިއުލާން ކުރައްވައެވެ.
އަދި ބިޑުކުރުމަކާނުލާ 2.7 ބިލިޔަން ރުފިޔާގެ މަޝްރޫޢުތައް ޕާޓީގެ ބޮޑުންގެ ކުންފުނިތަކަށް ބަހާލައިފި އެވެ. ކޮރަޕްޝަން ހުއްޓުވުމަށް ގޮވި ގޮވެލިފަތީގެ މަތިން އަދަކު އަމުދުން ހަނދުމަފުޅެއް ނުވިއެވެ. އެއް ޕާޓީން އަނެއް ޕާޓީއަށް ދަރަނިބޮލޭ ގޮވަ ގޮވާފައި އިތުރަށް ދަރުވާލުން ނޫންކަމެއް އެބަ ކުރެވޭތޯއެވެ.
ކިޔުންތެރިންގެ ހިޔާލު